మార్కెట్లకు టారిఫ్‌ సెగ.. భారీగా నష్టపోయిన స్టాక్‌ మార్కెట్లు

దేశీయ స్టాక్‌ మార్కెట్లు భారీగా నష్టపోయాయి. భారత్‌పై మరోసారి సుంకాలను మోపనున్నట్టు అమెరికా అధ్యక్షుడు డొనాల్డ్‌ ట్రంప్‌ హెచ్చరించడంతో మదుపరులు అమ్మకాలకు మొగ్గుచూపారు.

ముంబై, జనవరి 5: దేశీయ స్టాక్‌ మార్కెట్లు భారీగా నష్టపోయాయి. భారత్‌పై మరోసారి సుంకాలను మోపనున్నట్టు అమెరికా అధ్యక్షుడు డొనాల్డ్‌ ట్రంప్‌ హెచ్చరించడంతో మదుపరులు అమ్మకాలకు మొగ్గుచూపారు. ఫలితంగా బ్లూచిప్‌ సంస్థలైన హెచ్‌డీఎఫ్‌సీ, రిలయన్స్‌తోపాటు ఐటీ సూచీలు తీవ్ర హెచ్చుతగ్గుదలకు లోనయ్యాయి.

ఇంట్రాడేలో 500 పాయింట్ల వరకు నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు మార్కెట్‌ ముగిసే సమయానికి 322.39 పాయింట్లు కోల్పోయి 85,439.62 వద్ద స్థిరపడింది. మరో సూచీ నిఫ్టీ సైతం నష్టపోయింది. ఇంట్రాడేలో రికార్డు స్థాయి 26,373.20 పాయింట్లకు చేరుకున్న నిఫ్టీ చివరకు ఈ లాభాలను నిలుపుకోలేకపోయింది.

అంతర్జాతీయ మార్కెట్ల నుంచి వచ్చిన ప్రతికూల సంకేతాలు మదుపరులను నష్టాలవైపు నడిపించాయి. ఫలితంగా నిఫ్టీ 78.25 పాయింట్లు కోల్పోయి 26,250.30 వద్ద ముగిసింది. నిఫ్టీ చారిత్రక గరిష్ఠ స్థాయికి చేరుకున్నప్పటికీ మదుపరులు చివర్లో ప్రాఫిట్‌ బుకింగ్‌ మొగ్గుచూపడంతో తన కీలక మైలురాయి 26, 200ని అధిగమించిందని దలాల్‌స్ట్రీట్‌ వర్గాలు వెల్లడించాయి. వెనెజువెలాపై అమెరికా దాడులు చేస్తుండటంతో ప్రపంచ మార్కెట్ల లో అలజడి నెలకొన్నదని, ఫలితంగా మదుపరులు అమ్మకాలకు మొగ్గుచూపారని జియోజిట్‌ ఫైనాన్షియల్‌ రీసర్చ్‌ హెడ్‌ వినోద్‌ నాయర్‌ తెలిపారు.

• హెచ్‌డీఎఫ్‌సీ, ఇన్ఫోసిస్‌, హెచ్‌సీఎల్‌ షేర్లు రెండు శాతానికి పైగా నష్టపోయాయి.
• వీటితోపాటు బజాజ్‌ ఫైనాన్స్‌, టీసీఎస్‌, టెక్‌ మహీంద్రా, రిలయన్స్‌ షేర్లు ఒక్క శాతం వరకు కోల్పోయాయి.
• అలాగే ఎటర్నల్‌, ఎన్‌టీపీసీ, ఎల్‌అండ్‌టీ, మహీంద్రాఅండ్‌ మహీంద్రా, కొటక్‌ బ్యాంక్‌, ఐటీసీ, భారతీ ఎయిర్‌టెల్‌, ఇండిగో షేర్లు కూడా పతనం చెందాయి.
• కానీ బీఈఎల్‌, అల్ట్రాటెక్‌ సిమెంట్‌, టాటా స్టీల్‌, హెచ్‌యూఎల్‌, ఏసియన్‌ పెయింట్స్‌, యాక్సిస్‌ బ్యాంక్‌, ఐసీఐసీఐ బ్యాంక్‌, మారుతి, టైటాన్‌, ఎస్బీఐ, ట్రెంట్‌, అదా నీపోర్ట్స్‌, పవర్‌గ్రిడ్‌, సన్‌ఫార్మా షేర్లు కదంతొక్కాయి.
• సూచీల్లో 2,545 షేర్లు నష్టపోగా, 1,723 షేర్లు లాభాల్లో ముగిశాయి.
• రంగాలవారీగా ఐటీ సూచీ అత్యధికంగా 1.37 శాతం కోల్పోయింది. దీంతోపాటు ఆయిల్‌ అండ్‌ గ్యాస్‌ 1.18 శాతం, ఎనర్జీ, టెలికాం, యుటిలిటీస్‌, ఆర్థిక సేవల సూచీలు కూడా నష్టపోయాయి.
• రియల్టీ రంగ సూచీ మాత్రం 2.16 శాతం ఎగబాకింది. అలాగే కన్జ్యూమర్‌ డ్యూరబుల్‌ 1.25 శాతం, మెటల్‌, కమోడిటీస్‌, ఎఫ్‌ఎంసీజీ, పీఎస్‌యూ బ్యాంకింగ్‌ సూచీలు లాభాల్లో కదంతొక్కాయి.
• కార్పొరేట్ల నిరుత్సాహక ఫలితాల అంచనా కూడా పతనానికి కారణం.