మార్కెట్లకు చమురు సెగ

దేశీయ స్టాక్‌ మార్కెట్లపై క్రూడాయిల్‌ పిడుగు పడింది. రష్యా-ఉక్రెయిన్‌ దేశాల మధ్య జరుగుతున్న యుద్ధంతో ఇప్పటికే నష్టాలతో ఉక్కిరిబిక్కిరి అవుతున్న సూచీలపై తాజాగా ఇంధన ధరలు రికార్డు స్థాయికి చేరుకోవడం భారీ నష్టాలను మిగిల్చింది

• కుప్పకూలిన దేశీయ స్టాక్‌ మార్కెట్లు
• సెన్సెక్స్‌ 1,491, నిఫ్టీ 382 పాయింట్ల నష్టం

ముంబై, మార్చి 7: దేశీయ స్టాక్‌ మార్కెట్లపై క్రూడాయిల్‌ పిడుగు పడింది. రష్యా-ఉక్రెయిన్‌ దేశాల మధ్య జరుగుతున్న యుద్ధంతో ఇప్పటికే నష్టాలతో ఉక్కిరిబిక్కిరి అవుతున్న సూచీలపై తాజాగా ఇంధన ధరలు రికార్డు స్థాయికి చేరుకోవడం భారీ నష్టాలను మిగిల్చింది. ఇంట్రా డేలో 2 వేల వరకు నష్టపోయిన సెన్సెక్స్‌.. వరుసగా నాలుగోరోజు సోమవారం 1,491 పాయింట్లు పతనం చెంది 52,842.75 వద్ద నిలిచింది. నిఫ్టీ 16 వేల పాయింట్ల దిగువకు జారుకున్నది. 382.20 పాయింట్లు తగ్గి 15,863.15 వద్ద ముగిసింది. రెండు సూచీలు ఏడు నెలల కనిష్ఠ స్థాయికి జారుకున్నట్లు అయింది. గత నాలుగు సెషన్లలో సెన్సెక్స్‌ 3,404.53 పాయింట్లు పడిపోయింది. విదేశీ నిధులు వెళ్లిపోవడం మార్కెట్ల పతనాన్ని శాసించిందని దలాల్‌స్ట్రీట్‌ వర్గాలు వెల్లడించాయి.

• ఇండస్‌ఇండ్‌ బ్యాంక్‌ 7.63 శాతం తగ్గి టాప్‌ లూజర్‌గా నిలిచింది
• యాక్సిస్‌, మారుతి, బజాజ్‌ఫిన్‌, మహీంద్రా, అల్ట్రాటెక్‌, ఐసీఐసీఐ బ్యాంక్‌ 5శాతానికిపైగా కోల్పోయాయి.
• ఎస్బీఐ, ఎల్‌అండ్‌టీ, హెచ్‌డీఎఫ్‌సీ, హెచ్‌యూఎల్‌, రిలయన్స్‌, హెచ్‌డీఎఫ్‌సీ బ్యాంక్‌, కొటక్‌ బ్యాంక్‌, టైటాన్‌, టెక్‌ మహీంద్రా, డాక్టర్‌ రెడ్డీస్‌, టీసీఎస్‌, సన్‌ఫార్మా, విప్రోలు నష్టపోయాయి.
• కేవలం భారతీ ఎయిర్‌టెల్‌, హెచ్‌సీఎల్‌ టెక్‌, టాటా స్టీల్‌లు 3 శాతం వరకు బలపడ్డాయి.
• బీఎస్‌ఈ స్మాల్‌క్యాప్‌, మిడ్‌క్యాప్‌ ఇండెక్స్‌లు 2.30 శాతం వరకు కోల్పోయాయి.
• రంగాలవారీగా చూస్తే రియల్టీ, బ్యాంక్‌, ఫైనాన్స్‌, ఆటో రంగ షేర్లు ఒత్తిడికి గురికాగా..టెలికం, మెటల్‌, ఆయిల్‌అండ్‌గ్యాస్‌, టెక్నాలజీ రంగ షేర్లు మాత్రం లాభపడ్డాయి.

11 లక్షల కోట్లు మటాష్‌
గడిచిన నాలుగు ట్రేడింగ్‌లలో మదుపరులు రూ.11.28 లక్షల కోట్ల సంపదను కోల్పోయారు. దీంతో బీఎస్‌ఈలో లిైస్టెన సంస్థల మార్కెట్‌ క్యాపిటలైజేషన్‌ రూ.11,28,214.05 కోట్లు కరిగిపోయి రూ.2,41,10.831.04 కోట్లకు చేరుకున్నది. క్రూడాయిల్‌, రూపాయి దెబ్బతో మార్కెట్లు మూడు శాతం వరకు పతనమయ్యాయి.

రికార్డు కనిష్ఠానికి రూపాయి
రష్యా-ఉక్రెయిన్‌ యుద్ధ ప్రభావంతో భారత్‌ కరెన్సీ రూపాయి విలువ రికార్డు కనిష్ఠస్థాయికి పడిపోయింది. సోమవారం అమెరికా డాలర్‌తో రూపాయి మారకపు విలువ ఒక్కసారిగా 83 పైసలు పతనమై 77 వద్ద ముగిసింది. కొవిడ్‌ సంక్షోభం నేపథ్యంలో 2020 ఏప్రిల్‌ 22నాడు నమోదైన 76.90 స్థాయి దిగువకు తాజాగా తగ్గింది. ప్రపంచ మార్కెట్లో ముడి చమురు ధర మరింతగా పెరగడం, స్టాక్‌ మార్కెట్లలో విదేశీ ఇన్వెస్టర్లు అమ్మకాలు వేగవంతం కావడంతో డాలర్లకు డిమాండ్‌ పెరిగిందని ఫారెక్స్‌ డీలర్లు తెలిపారు.