దూసుకుపోయిన మహీంద్రా

దేశీయ ఆటోమొబైల్‌ దిగ్గజం మహీంద్రా అండ్‌ మహీంద్రా అంచనాలకుమించి ఆర్థిక ఫలితాలు ప్రకటించింది. సెప్టెంబర్‌ త్రైమాసికానికిగాను సంస్థ రూ.2,773 కోట్ల కన్సాలిడేటెడ్‌ నికర లాభాన్ని గడించింది. విక్రయాలు టాప్‌ గేర్‌లో దూసుకుపోవడంతో గతేడాది ఇదే త్రైమాసికంలో వచ్చిన రూ.1,929 కోట్ల లాభంతో పోలిస్తే 44 శాతం వృద్ధిని కనబరిచింది

• క్యూ2లో రూ.2,773 కోట్ల లాభం

న్యూఢిల్లీ, నవంబర్‌ 11: దేశీయ ఆటోమొబైల్‌ దిగ్గజం మహీంద్రా అండ్‌ మహీంద్రా అంచనాలకుమించి ఆర్థిక ఫలితాలు ప్రకటించింది. సెప్టెంబర్‌ త్రైమాసికానికిగాను సంస్థ రూ.2,773 కోట్ల కన్సాలిడేటెడ్‌ నికర లాభాన్ని గడించింది. విక్రయాలు టాప్‌ గేర్‌లో దూసుకుపోవడంతో గతేడాది ఇదే త్రైమాసికంలో వచ్చిన రూ.1,929 కోట్ల లాభంతో పోలిస్తే 44 శాతం వృద్ధిని కనబరిచింది. అటు కంపెనీ ఆదాయం కూడా రూ.21,470 కోట్ల నుంచి రూ.29,870 కోట్లకు చేరుకున్నట్లు బీఎస్‌ఈకి సమాచారం అందించింది. ఒక త్రైమాసికంలో ఇంతటి స్థాయి ఆదాయాన్ని ఆర్జించడం ఇదే తొలిసారి కావడం విశేషం.

• కంపెనీకి వచ్చిన ఆదాయంలో ఆటోమోటివ్‌ డివిజన్‌ నుంచి రూ.15,231 కోట్లు సమకూరగా..వ్యవసాయ ఉత్పత్తుల నుంచి రూ. 7,506 కోట్లు లభించాయి.
• అలాగే ఆర్థిక సేవలు అందించడంతో మరో రూ.2,974 కోట్లు, ఆతిథ్య రంగం నుంచి రూ.598 కోట్లు, రియల్‌ ఎస్టేట్‌ నుంచి రూ.70 కోట్లు లభించాయి.
• ఏకీకృత విషయానికి వస్తే రూ.20,839 కోట్ల ఆదాయంపై రూ.2,090 కోట్ల నికర లాభాన్ని గడించింది.
• గత త్రైమాసికంలో సంస్థ 1,74,098 వాహనాలను విక్రయించింది. క్రితం ఏడాది అమ్ముడైన 99,334 వాహనాలతో పోలిస్తే 75 శాతం అధికం.
• ట్రాక్టర్‌ అమ్మకాలు ఏడాది ప్రాతిపదికన 5 శాతం పెరిగి 92,590లకు చేరుకున్నాయి. ఏడాది క్రితం ఇది 88 వేల యూనిట్లు.
• కంపెనీ షేరు ధర స్వల్పంగా లాభపడి రూ.1,287.15 వద్ద ముగిసింది.

 

‘వాహన విక్రయాలు టాప్‌గేర్‌లో దూసుకోవడం వల్లనే ఆర్థిక ఫలితాల్లో రాణించగలిగాం. పండుగ సీజన్‌లో నూతన వాహనాలను కూడా విడుదల చేయడం సంస్థకు కలిసొచ్చింది.
– అనిశ్‌ షా, ఎం అండ్‌ ఎం మేనేజింగ్‌ డైరెక్టర్‌, సీఈవో