కావేరీ సీడ్స్‌ లాభం మూడింతలు

ప్రముఖ విత్తనాల విక్రయ సంస్థ కావేరీ సీడ్స్‌ అంచనాలకుమించి రాణించింది. ప్రస్తుత ఆర్థిక సంవత్సరం రెండో త్రైమాసికానికిగాను సంస్థ రూ.10.72 కోట్ల పన్నులు చెల్లించిన తర్వాత నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.2.72 కోట్లతో పోలిస్తే ఇంచుమించు మూడు రెట్లు పెరిగాయి.

• క్యూ2లో రూ.10.72 కోట్లుగా నమోదు
• 97కోట్ల ఆదాయాన్ని ఆర్జించిన సంస్థ

హైదరాబాద్‌, నవంబర్‌ 8: ప్రముఖ విత్తనాల విక్రయ సంస్థ కావేరీ సీడ్స్‌ అంచనాలకుమించి రాణించింది. ప్రస్తుత ఆర్థిక సంవత్సరం రెండో త్రైమాసికానికిగాను సంస్థ రూ.10.72 కోట్ల పన్నులు చెల్లించిన తర్వాత నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.2.72 కోట్లతో పోలిస్తే ఇంచుమించు మూడు రెట్లు పెరిగాయి. గత త్రైమాసికానికిగాను సంస్థ రూ.96.12 కోట్ల రాబడిని ఆర్జించింది. 2022-23 ఏడాది ఇదే త్రైమాసికంలో వచ్చిన రూ.84.49 కోట్ల ఆదాయం కంటే ఇది 13.77 శాతం అధికమని పేర్కొంది. ఎబిటా 70 శాతం ఎగబాకి రూ.19.79 కోట్లు ఆర్జించింది.

తొలి ఆరు నెలల్లో..

ప్రస్తుత ఆర్థిక సంవత్సరం తొలి ఆరు నెలలు(ఏప్రిల్‌ నుంచి సెప్టెంబర్‌ వరకు) ఆదాయ, లాభాల పరంగా భారీ వృద్ధిని నమోదు చేసుకున్నది. నిర్వాహణ ఆదాయం ఏడాది ప్రాతిపదికన 5.75 శాతం ఎగబాకి రూ.816.44 కోట్ల నుంచి రూ.863.42 కోట్లకు చేరుకున్నట్లు తెలిపింది. ఎబిటా కూడా 15 శాతం వృద్ధితో రూ.298.88 కోట్లకు చేరుకున్నది. నికర లాభం రూ.243.39 కోట్ల నుంచి రూ.278.56 కోట్లుగా నమోదైనట్టు వెల్లడించింది.

రెండో త్రైమాసికంలో ముఖ్య అంశాలు..

• పత్తి విత్తనాలు విక్రయించడంతో సంస్థకు సమకూరిన ఆదాయంలో 6.77 శాతం పెరుగుదల కనిపించింది.
• హైబ్రిడ్‌ వరి ద్వారా వచ్చే ఆదాయంలో 9.97 శాతం అధిక వృద్ధి నమోదైంది. ఎంపిక చేసిన వరి విక్రయాలు 4.87 శాతం పెరుగగా, ఆదాయంలోనూ 14.80 శాతం వృద్ధి నమోదైంది.
• మొక్కజొన్న విత్తనాలతో వచ్చే ఆదాయంలో 13.96 శాతం పెరుగుదల నమోదైంది.
• సంస్థకు వచ్చిన మొత్తం ఆదాయంలో నూతన ఉత్పత్తుల వాటా రెండంకెల వృద్ధి
• విదేశాల్లో కంపెనీకి చెందిన ఉత్పత్తులకు డిమాండ్‌ అధికంగా ఉండటంతో ఎగుమతుల్లో వృద్ధి 146.49 శాతంగా నమోదైంది. వీటిలో మొక్కజొన్న విత్తనాలు ఎగుమతులు 129.91 శాతం పెరుగగా, ఆదాయ పరంగా చూస్తే 140.52 శాతంగా ఉన్నది.
• రూ.2 ముఖ విలువ కలిగిన ప్రతిషేరుకు రూ.5 లేదా 250 శాతం డివిడెండ్‌ను బోర్డు ప్రకటించింది.

‘కీలకమైన విత్తన విభాగంలో అత్యుత్తమ వృద్ధిరేటును సాధించాం. వరి, పత్తి విత్తనాలు నిలకడైన వృద్ధిని నమోదు చేసుకున్నప్పటికీ, వ్యూహాత్మక విధానాలతో ఆదాయంలో అంచనాలకుమించి రాణించగలిగాం. అంతర్జాతీయ మార్కెట్లో వరి ధరలు భారీగా పెరగడం కూడా కలిసొచ్చింది. దీంతో అక్కడ వరి సాగు 11 శాతం వరకు పెరిగింది. అంతర్జాతీయ వ్యాపార విస్తరణలో భాగంగా తాంజానియా, అల్జేరియా, థాయ్‌లాండ్‌, బంగ్లాదేశ్‌, మధ్య ప్రాచ్య దేశాలపై ప్రత్యేక దృష్టి సారిస్తున్నాం. వాటాదారులకు ఆర్థిక ప్రయోజనాలు కల్పించాలనే ఉద్దేశంతో రూ.2 ముఖ విలువ కలిగిన ప్రతిషేరుకు రూ.5 మధ్యంతర డివిడెండ్‌ను ప్రకటించాం.

– జీవీ భాస్కర్‌ రావు, కావేరీ సీడ్స్‌ సీఎండీ