మరో 4 కంపెనీలు

రాష్ట్రంలోకి పెట్టుబడులు వరదలా వస్తున్నాయి. ఇప్పటికే పలు రంగాల్లో పెట్టుబడులు పెట్టిన సంస్థలు..తాజాగా ఆహార శుద్ధి (ఫుడ్‌ ప్రాసెసింగ్‌), ఎలక్ట్రిక్‌ వాహన (ఈవీ) రంగాల్లో ఇన్వెస్ట్‌ చేయడానికి మరో 4 కంపెనీలు ముందుకొచ్చాయి.

• ఫుడ్‌ ప్రాసెసింగ్‌, ఈవీ రంగాల్లో పెట్టుబడులు
• మూడు కంపెనీల నుంచి రూ.397 కోట్లు

హైదరాబాద్‌, జూన్‌ 6 (నమస్తే తెలంగాణ): రాష్ట్రంలోకి పెట్టుబడులు వరదలా వస్తున్నాయి. ఇప్పటికే పలు రంగాల్లో పెట్టుబడులు పెట్టిన సంస్థలు..తాజాగా ఆహార శుద్ధి (ఫుడ్‌ ప్రాసెసింగ్‌), ఎలక్ట్రిక్‌ వాహన (ఈవీ) రంగాల్లో ఇన్వెస్ట్‌ చేయడానికి మరో 4 కంపెనీలు ముందుకొచ్చాయి. వీటిలో 3 కంపెనీలు కలిసి రూ.397 కోట్ల పెట్టుబడి పెట్టనున్నాయి. మరో కంపెనీ తమ పెట్టుబడి వివరాలను వెల్లడించాల్సి ఉన్నది. ఇందుకు సంబంధించిన సోమవారం ఈ నాలుగు కంపెనీలు రాష్ట్ర ప్రభుత్వంతో ఒప్పందాలు కుదుర్చుకొన్నాయి. రాష్ట్ర పరిశ్రమల శాఖ మంత్రి కేటీఆర్‌ సమక్షంలో ఆయా సంస్థల ప్రతినిధులు పరిశ్రమల శాఖ ముఖ్య కార్యదర్శి జయేశ్‌ రంజన్‌తో ఒప్పంద పత్రాలను మార్చుకొన్నారు.

పెట్టుబడి పెట్టనున్న కంపెనీలు ఇవే..

• ఫార్మాస్యూటికల్‌, కన్స్యూమర్‌ హెల్త్‌కేర్‌ ఉత్పత్తుల్లో ఒకటైన మ్యాన్‌కైండ్‌ కన్స్యూమర్‌ హెల్త్‌కేర్‌ సంస్థ పెంపుడు జంతువుల కోసం ఆహారాన్ని తయారు చేసేందుకు రూ.159 కోట్ల పెట్టుబడితో ప్రపంచస్థాయి ప్లాంటు ఏర్పాటుకు ముందుకొచ్చింది. వరి, మొక్కజొన్న లాంటి ధాన్యాలతోపాటు మాంసం, చేపల వ్యర్థాలను కూడా ఈ ఆహార తయారీకి ఉపయోగిస్తారు. దీంతో వ్యవసాయం, మాంసం, మత్స్య రంగాలకు మద్దతు లభిస్తుంది.
• బేకరీ ఐటమ్స్‌ తయారీలో ఖ్యాతి పొందిన 3ఎఫ్‌ సంస్థ బండతిమ్మాపూర్‌ పుడ్‌ ప్రాసెసింగ్‌ ఇండస్ట్రియల్‌ ఏరియాలో రూ.123 కోట్ల పెట్టుబడితో చాక్లెట్లు, బేకరీ ఉత్పత్తుల తయారీ యూనిట్‌ను ఏర్పాటు చేయనున్నది. బేకరీ ఉత్పత్తుల్లో 3ఎఫ్‌ దేశంలో అగ్రగామి సంస్థగా కొనసాగుతున్నది.
• బేకరీ ఐటమ్స్‌, మిఠాయిల తయారీలో ప్రపంచ ప్రఖ్యాతి పొందిన రవి ఫుడ్స్‌ ప్రైవేట్‌ లిమిటెడ్‌(ఆర్‌ఎఫ్‌పీఎల్‌) కొత్తూరులో రూ.115 కోట్లతో తమ యూనిట్‌ను విస్తరించనున్నది. 30 ఏండ్ల నుంచి బిస్కెట్లు, కుకీలు, చాక్లెట్లు, క్యాండీలు, మిఠాయిలను తయారు చేస్తున్న ఈ సంస్థ తన ఉత్పత్తులను దాదాపు 120 దేశాలకు ఎగుమతి చేస్తున్నది.
• యునైటెడ్‌ అరబ్‌ ఎమిరేట్స్‌ (యూఏఈ)కి చెందిన మెటా4 సంస్థ స్మార్ట్‌ గ్రీన్‌ మొబిలిటీ కార్యక్రమంలో భాగంగా తన సోదర సంస్థ ఓల్ట్‌లీ ఎనర్జీతో కలిసి తెలంగాణలో ఎలక్ట్రిక్‌ వాహనాల తయారీ ప్లాంట్‌ను స్థాపించేందుకు ముందుకొచ్చింది. నాణ్యమైన ఈవీలను భారత మార్కెట్‌లోకి తేవాలని లక్ష్యంగా పెట్టుకొన్న ఈ సంస్థ.. పూర్తిగా భారత్‌లో అభివృద్ధి చేసిన ఫీచర్లు, సాఫ్ట్‌వేర్‌లతో తెలంగాణను ఈవీల రంగంలో పటిష్ఠ శక్తిగా మార్చేందుకు చేయనున్నది. కానీ, తెలంగాణలో ఎంత పెట్టుబడి పెట్టనున్నదీ మెటా4 ఇంకా ప్రకటించలేదు.