ఇక స్వేచ్ఛగా వాణిజ్యం.. భారత్‌, బ్రిటన్‌ మధ్య కుదిరిన ఫ్రీ ట్రేడ్‌ అగ్రిమెంట్‌

భారత్‌-బ్రిటన్‌ మధ్య గురువారం చారిత్రాత్మక స్వేచ్ఛా వాణిజ్య ఒప్పందం (ఎఫ్‌టీఏ) కుదిరింది. ప్రధాన మంత్రి నరేంద్ర మోదీ రెండు రోజుల బ్రిటన్‌ పర్యటనలో భాగంగా ఆ దేశ ప్రధాని కీర్‌ స్టార్మర్‌తో లండన్‌లో జరిపిన చర్చల నేపథ్యంలో ఈ ద్వైపాక్షిక బిజినెస్‌ డీల్‌ చోటుచేసుకున్నది.

• వార్షిక ద్వైపాక్షిక వాణిజ్యం 34 బిలియన్‌ డాలర్లకు చేరే అవకాశం
• 99% భారతీయ ఎగుమతులకు తప్పుతున్న సుంకాల భారం
• తగ్గనున్న మద్యం, కార్లు, ఏరోస్పేస్‌-వైద్య ఇతర ఉత్పత్తులు

లండన్‌, జూలై 24 : భారత్‌-బ్రిటన్‌ మధ్య గురువారం చారిత్రాత్మక స్వేచ్ఛా వాణిజ్య ఒప్పందం (ఎఫ్‌టీఏ) కుదిరింది. ప్రధాన మంత్రి నరేంద్ర మోదీ రెండు రోజుల బ్రిటన్‌ పర్యటనలో భాగంగా ఆ దేశ ప్రధాని కీర్‌ స్టార్మర్‌తో లండన్‌లో జరిపిన చర్చల నేపథ్యంలో ఈ ద్వైపాక్షిక బిజినెస్‌ డీల్‌ చోటుచేసుకున్నది. ఈ సందర్భంగా ఒప్పందంపై కేంద్ర వాణిజ్య శాఖ మంత్రి పియూష్‌ గోయల్‌, బ్రిటన్‌ వ్యాపార-వాణిజ్య శాఖ మంత్రి జోనాథన్‌ రెనాల్డ్స్‌ సంతకాలు చేశారు. కాగా, యూరోపియన్‌ యూనియన్‌ (ఈయూ) నుంచి వైదొలగిన తర్వాత ఏ దేశంతోనైనా బ్రిటన్‌ చేసుకున్న ఒప్పందాల్లో ఇదే అతిపెద్దది. ఇక బ్రిటన్‌ ప్రధాని స్టార్మర్‌తో కలిసి విలేకరుల సమావేశంలో పాల్గొన్న ప్రధాని మోదీ.. ఈ ఎఫ్‌టీఏతో భారత్‌-బ్రిటన్‌ వార్షిక ద్వైపాక్షిక వాణిజ్యం 34 బిలియన్‌ డాలర్లకు చేరగలదన్న ఆశాభావాన్ని వెలిబుచ్చారు. ఈ క్రమంలోనే 2030 నాటికి 120 బిలియన్‌ డాలర్లకు చేరుకోవచ్చన్న అంచనాలు వినిపిస్తున్నాయి. ఈ ఒప్పందంతో ఇరు దేశాలకు పెద్ద ఎత్తున ప్రయోజనాలు కలుగుతాయన్న విశ్వాసాన్ని బ్రిటన్‌ ప్రధాని స్టార్మర్‌ వ్యక్తం చేశారు. అలాగే ఈ ఎఫ్‌టీఏతో బ్రిటన్‌కు ఎగుమతి అవుతున్న 99 శాతం భారతీయ వస్తూత్పత్తులపై సుంకాల భారం తప్పుతుందని వాణిజ్య మంత్రి గోయల్‌ అన్నారు.

దేశీయంగా ఇవి చౌక

బ్రిటన్‌తో స్వేచ్ఛా వాణిజ్య ఒప్పందం నేపథ్యంలో భారతీయ మార్కెట్‌లోకి ఆ దేశం నుంచి దిగుమతయ్యే ఆయా వస్తూత్పత్తుల ధరలు దిగిరానున్నాయి. ఇందులో ఏరోస్పేస్‌ విడిభాగాలు, వైద్య పరికరాలు, సాఫ్ట్‌ డ్రింక్స్‌, కాస్మటిక్స్‌, లగ్జరీ కార్లు, స్కాచ్‌ ప్రధానంగా చెప్పుకోవచ్చు. ప్రస్తుతం బ్రిటన్‌ నుంచి దేశంలోకి దిగుమతి అవుతున్న వాటిపై సగటున 15 శాతం సుంకాలు పడుతున్నాయి. అయితే ఎఫ్‌టీఏతో ఈ సుంకాలు 3 శాతానికి దిగిరానున్నాయి. అలాగే ఎఫ్‌టీఏ అమల్లోకి వచ్చిన వెంటనే బ్రిటన్‌ విస్కీపై విధిస్తున్న 150 శాతం సుంకం.. 75 శాతానికి పడిపోనున్నది. అంతేగాక వచ్చే పదేండ్లలో ఇది క్రమేణా 40 శాతానికి దిగివస్తుంది.

ప్రొఫెషనల్స్‌కు కిక్కు

ఎఫ్‌టీఏ నేపథ్యంలో బ్రిటన్‌లోని భారతీయ సంస్థలు, ఫ్రీలాన్సర్లకు 36 రంగాల్లో ఇక ‘ఎకనామిక్‌ నీడ్స్‌ టెస్ట్‌’ అవసరం లేదు. అంతేగాక 35 రంగాల్లో రెండేండ్లపాటు భారతీయ నిపుణులు ఆ దేశంలో కనీసం ఓ ఆఫీస్‌ను కూడా పెట్టుకోకుండా పనిచేసుకోవచ్చు. అలాగే మూడేండ్లు అక్కడి సామాజిక భద్రత చెల్లింపుల నుంచి మినహాయింపునూ పొందవచ్చు. కాగా, భారత్‌లో బ్రిటన్‌ ఆరో అతిపెద్ద విదేశీ మదుపరిగా ఉన్నది. అక్కడి కంపెనీలు ఇక్కడ దాదాపు 36 బిలియన్‌ డాలర్ల పెట్టుబడుల్ని పెట్టాయి. అలాగే బ్రిటన్‌లో వెయ్యికి భారతీయ సంస్థల కార్యకలాపాలు సాగుతున్నాయి. 2 బిలియన్‌ డాలర్లకుపైగా పెట్టుబడులు పెట్టగా, లక్ష మందికిపైగా ఉద్యోగాల్నిచ్చాయి. గత ఆర్థిక సంవత్సరం (2024-25) బ్రిటన్‌కు భారత ఎగుమతులు 12.6 శాతం పెరిగి 14.5 బిలియన్‌ డాలర్లకు చేరాయి. భారత్‌కు బ్రిటన్‌ నుంచి దిగుమతులూ 2.3 శాతం ఎగిసి 8.6 బిలియన్‌ డాలర్లుగా ఉన్నాయి. 2023-24లో ఇరు దేశాల ద్వైపాక్షిక వాణిజ్యం 21.34 బిలియన్‌ డాలర్లుగా ఉన్నది. అంతకుముందు ఇది 20.36 బిలియన్‌ డాలర్లు.

ఎఫ్‌టీఏతో ప్రయోజనాలు

• ఇకపై సరళతర కస్టమ్స్‌, సింగిల్‌ విండో అనుమతులతో సులభంగా బ్రిటన్‌ మార్కెట్‌లోకి భారతీయ ఎగుమతుల ప్రవేశం.
• వస్ర్తాలు, పాదరక్షలు, రత్నాలు-ఆభరణాలు, సముద్ర ఆహారోత్పత్తులు, ఇంజినీరింగ్‌ వస్తువుల మార్కెటింగ్‌కు వీలు.
• దేశీయ వ్యవసాయోత్పత్తులు, ప్రాసెస్డ్‌ ఫుడ్‌ పరిశ్రమకు బ్రిటన్‌ మార్కెట్‌లో మరిన్ని వ్యాపారావకాశాలు.
• పనస పండ్లు, చిరు ధాన్యాలు, సేంద్రీయ మూలికల ఎగుమతులు పెరిగేందుకు ఆస్కారం.
• భారతీయ తోలు ఉత్పత్తులపై 16 శాతం వరకు పడుతున్న బ్రిటన్‌ టారిఫ్‌లకు గుడ్‌బై.
• భారతీయ జనరిక్‌ ఔషధాలకు మరింత పెరగనున్న గిరాకీ. సుంకాల ఎత్తివేతతో బ్రిటన్‌ మార్కెట్‌లో చౌకగా లభ్యం.
• దేశీయ మార్కెట్‌లో తగ్గనున్న ఎక్స్‌-రే, ఈసీజీ మెషీన్ల ధరలు. భారతీయ మెడ్‌-టెక్‌ ఎక్స్‌పోర్టర్స్‌కూ తగ్గుతున్న వ్యయ భారం.
• నైపుణ్యం, ప్రతిభ కలిగిన భారతీయ ఐటీ, సేవా రంగ నిపుణులకూ లాభదాయకం.
• ఒప్పందంతో భారతీయ యువత, మహిళలు, రైతులు, మత్స్య కార్మికులకు, ఎంఎస్‌ఎంఈ రంగాలకు లాభమంటున్న బ్రిటన్‌.
• మూడేండ్లపాటు బ్రిటన్‌ సామాజిక భద్రత చెల్లింపుల నుంచి భారతీయ నిపుణులకు మినహాయింపు.

లగ్జరీ కార్లు చౌక

• జాగ్వార్‌, లాండ్‌ రోవర్‌ (ఇప్పుడు టాటా మోటర్స్‌ బ్రాండ్లు), రోల్స్‌ రాయిస్‌, బెంట్లీ, ఆస్టన్‌ మార్టిన్‌, లోటస్‌, మెక్‌లారెన్‌ వంటి లగ్జరీ కార్ల బ్రాండ్లకు పుట్టినిల్లు బ్రిటన్‌.
• ఈ కార్లపై భారత్‌లో దిగుమతి సుంకం 125-75 శాతంగా ఉన్నది.
• స్వేచ్ఛా వాణిజ్య ఒప్పందంతో ఈ సుంకాల భారం కేవలం 10 శాతానికి తగ్గనున్నది.
• ఎఫ్‌టీఏ దృష్ట్యా భారత్‌లోని అపర కుబేరులు ఆయా లగ్జరీ కార్ల కొనుగోలును వాయిదా వేసుకునే అవకాశం ఉందని, ఇప్పటికే చేసుకున్న బుకింగ్స్‌ను రద్దు చేసుకోవచ్చని కార్ల డీలర్లు చెప్తున్నారు. అయితే ధరలు తగ్గితే అమ్మకాలు పెరుగుతాయన్న అభిప్రాయాన్నీ కనబరుస్తున్నారు.