ఆహారశుద్ధి రంగం అదుర్స్‌

ఆహారశుద్ధి రంగంలోనూ తెలంగాణ రాష్ట్రం దూసుకుపోతున్నది. గడిచిన ఎనిమిదిన్నరేండ్లలో రాష్ట్రంలో ఏర్పాటైన పరిశ్రమల్లో ఇంజినీరింగ్‌ తర్వాత అత్యధికంగా ఈ రంగానివే కావడం విశేషం.

• 4,126 పరిశ్రమల ఏర్పాటు
• సగటున 8.3 శాతం వార్షిక వృద్ధి

హైదరాబాద్‌, ఫిబ్రవరి 8 (నమస్తే తెలంగాణ): ఆహారశుద్ధి రంగంలోనూ తెలంగాణ రాష్ట్రం దూసుకుపోతున్నది. గడిచిన ఎనిమిదిన్నరేండ్లలో రాష్ట్రంలో ఏర్పాటైన పరిశ్రమల్లో ఇంజినీరింగ్‌ తర్వాత అత్యధికంగా ఈ రంగానివే కావడం విశేషం. ఈ రంగాన్ని ప్రోత్సహించడానికి రాష్ట్ర ప్రభుత్వం ప్రత్యేక చర్యలు తీసుకోవడం, అలాగే ప్రాధాన్య రంగాల్లో ఒకటిగా గుర్తించడం కూడా ఇందుకు దోహదం చేస్తున్నాయి. టీఎస్‌ ఐ-పాస్‌తో ఇప్పటి వరకు 22 వేల యూనిట్లకు అనుమతులు మంజూరు కాగా, వీటిలో ఆహార శుద్ధి పరిశ్రమలకు సంబంధించినవి 4,126 ఉన్నాయి. వీటితోపాటు ఆగ్రో ఇండస్ట్రీస్‌, సిమెంట్‌-కాంక్రీట్‌ ఉత్పత్తులు, ప్లాస్టిక్‌, రబ్బర్‌ పరిశ్రమలు, గ్రానైట్‌ తదితర పరిశ్రమలు కూడా అధికంగా ఏర్పాటయ్యాయి.

తెలంగాణ ఆహారశుద్ధి పరిశ్రమ ముఖ్యాంశాలు….

• గత ఎనిమిదేండ్లలో ఆహారశుద్ధి పరిశ్రమ 8.3 శాతం వృద్ధి సాధించింది.
• సిమెంట్‌, కాంక్రీట్‌ రంగాల్లోకి పెట్టుబడులు 10.3 శాతానికి పెరిగాయి.
• తెలంగాణ స్టేట్‌ ఫుడ్‌ ప్రాసెసింగ్‌ సొసైటీ సంస్థలో రూ.2,676 కోట్ల పెట్టుబడిగల 39,748 యూనిట్లు నమోదయ్యాయి.
• వంట నూనెల్లో స్వయం సమృద్ధి సాధించేందుకుగాను రూ.16 వేల కోట్ల పెట్టుబడితో 100 నూనె మిల్లుల ఏర్పాటు చేయాలని ప్రతిపాదించింది.
• 9 ఉమ్మడి జిల్లాల్లో 7,150 ఎకరాల విస్తీర్ణంలో 21 ప్రత్యేక ఫుడ్‌ ప్రాసెసింగ్‌ జోన్ల ఏర్పాటు. వీటిలో 1,031 యూనిట్లకు 3 వేల ఎకరాల భూమి కేటాయింపు.