Home Loan | హోంలోన్‌ తీసుకున్న వారికి అలర్ట్‌.. వడ్డీరేటు పెరిగినప్పుడు ఈ చిన్న టిప్స్‌ పాటించండి
Home Loan | సొంతింటి కల నెరవేర్చుకున్న సగటు మనిషికి.. ఆర్బీఐ ద్రవ్య పరపతి విధాన సమీక్ష నిర్వహిస్తున్నదంటే పీడకలే! ఎక్కడ రెపోరేట్లు పెరుగుతాయో, దాని ప్రభావం రుణ వాయిదాలపై ఏమేరకు పడుతుందో అని లెక్కలు వేసుకుంటూ ఉంటాడు. రెపో రేటు పాతిక బేసిక్‌ పాయింట్లు పెరిగిందంటే.. వడ్డీ రేటు నడ్డి విరగ్గొడుతుందని బెంబేలెత్తిపోతాడు.
Home Loan | సొంతింటి కల నెరవేర్చుకున్న సగటు మనిషికి.. ఆర్బీఐ ద్రవ్య పరపతి విధాన సమీక్ష నిర్వహిస్తున్నదంటే పీడకలే! ఎక్కడ రెపోరేట్లు పెరుగుతాయో, దాని ప్రభావం రుణ వాయిదాలపై ఏమేరకు పడుతుందో అని లెక్కలు వేసుకుంటూ ఉంటాడు. రెపో రేటు పాతిక బేసిక్‌ పాయింట్లు పెరిగిందంటే.. వడ్డీ రేటు నడ్డి విరగ్గొడుతుందని బెంబేలెత్తిపోతాడు. అయితే, అప్పు భారం పెరుగుతుందని కంగారుపడొద్దు అని సూచిస్తున్నారు ఆర్థికరంగ నిపుణులు. ఈ చిక్కులెక్కలను పక్కనపెట్టి.. ప్రాధాన్యాల క్రమంగా వ్యవహరించాలని సూచిస్తున్నారు.
సుధాకర్‌కు 42 ఏండ్లు. రెండేండ్ల కిందట రూ.50 లక్షలు బ్యాంక్‌ లోన్‌ తీసుకొని ఇల్లు తీసుకున్నాడు. 20 ఏండ్ల కాలపరిమితి. వడ్డీ రేటు 7.5 శాతం కాగా, నెలకు రూ.37వేల వాయిదా కడుతున్నాడు. రెండేండ్లలో రెపో రేటు బాగా పెరిగే సరికి, వడ్డీ రేటూ 9.5 శాతానికి చేరుకుంది. ఈ ప్రభావం రుణంపై ఎంత పడుతుందో తెలుసుకుందామని బ్యాంకుకు వెళ్లిన సుధాకర్‌కు పట్టపగలే చుక్కలు కనిపించాయి. పెరిగిన వడ్డీ రేటు పోటు ఏ పాటిదో తెలుసుకొని, అందులోంచి తేరుకోవడానికి అతనికి చాలా సమయమే పట్టింది. తాజా వడ్డీ రేట్ల ప్రకారం రుణ కాలపరిమితి మరో 12 ఏండ్లు పెరిగిందని చెప్పారు. 20 ఏండ్లలోనే రుణం తీరాలంటే నెలకు రూ.46 వేల వరకు వాయిదా చెల్లించాల్సి ఉంటుందని చెప్పారు. దీంతో కంగారుపడ్డ సుధాకర్‌ రిటైర్‌ అయ్యాక వాయిదాలు చెల్లించలేను కాబట్టి, వాయిదా మొత్తం పెంచాలని భావించాడు.
కాల పరిమితి పెంపు మేలు
ఎక్కువ మొత్తంలో ఈఎమ్‌ఐ చెల్లించాల్సిన సుధాకర్‌ ఆలోచన తప్పు కాదు. తను రిటైర్‌ అయిన తర్వాత వాయిదా చెల్లించలేకపోతానన్న ఆందోళన కొద్దీ, అధిక ఈఎమ్‌ఐ కట్టాలని అనుకున్నాడు. అలాగని ఆయనది సరైన నిర్ణయమూ అనలేం! 42 ఏండ్ల సుధాకర్‌కు పన్నెండేండ్ల కూతురు, పదేండ్ల కొడుకు ఉన్నారు. మరో నాలుగేండ్లు గడిస్తే ఇద్దరూ పెద్ద చదువులకు వస్తారు. రుణ కాల పరిమితి పెంచుకొని ఉంటే.. ప్రస్తుతానికి సంపాదనపై అదనపు భారం పడకుండా ఉంటుంది. పిల్లల చదువుల కోసం ఆ మొత్తాన్ని బదలాయించొచ్చు. రెపో రేట్లు, రుణ వాయిదాల కన్నా.. పిల్లలకు మనం కల్పించే అవకాశాలు ప్రాధాన్యం కలిగినవి అని గుర్తించాలి. కుటుంబ అవసరాలకు మించిన ఆదాయం ఉన్నట్లయితే అధిక వాయిదా చెల్లించొచ్చు. అంతేకానీ, ఇప్పుడు కడుతున్న వాయిదానే భారంగా భావించే పరిస్థితిలో ఉన్నట్లయితే, కాల పరిమితి పెంపును అంగీకరించడమే మేలు!
కంగారొద్దు!
రెపో రేట్లు స్థిరంగా ఉండవు. ద్రవ్యోల్బణం, ఆర్థిక వృద్ధిరేటు, ఉద్యోగాల కల్పన, వస్తు ఉత్పత్తి తదితర ఎన్నో అంశాల ఆధారంగా రిజర్వ్‌ బ్యాంక్‌ ఆఫ్‌ ఇండియా ద్రవ్య పరపతి విధానాన్ని ప్రకటిస్తూ ఉంటుంది. వీటన్నిటికి అనుగుణంగా రెపో రేటును పెంచడమో, తగ్గించడమో చేస్తుంటుంది. వరుసగా రెండేండ్లు రెపో రేటు పెరుగుతూ వచ్చిందని, మళ్లీ అది తగ్గదని అనుకోవడానికి లేదు. మరో రెండేండ్లకు రెపో రేటు దిగి రావచ్చు. అప్పుడు ఈఎమ్‌ఐ భారం తగ్గవచ్చు. ఈ నేపథ్యంలో వడ్డీ రేటు పెరిగిందని కంగారుపడాల్సిన పనిలేదు. ఆర్థికంగా శక్తి ఉన్నట్లయితే పెరిగిన ఈఎమ్‌ఐని కట్టడం మంచిదే! లేకపోతే కాలపరిమితిని పెంచుకోవడం వల్ల కలిగే నష్టం ఏమీ ఉండదు. కాల పరిమితి పెరిగిందన్న భావన కలుగుతుందే కానీ, రెండు విధానాల్లోనూ మనం బ్యాంకుకు చెల్లించేది అటూ ఇటుగా ఒకే మొత్తమే.
భరించే భారమే!
రెపో రేట్లు అధికమై, ఈఎమ్‌ఐ భారం పెరిగే సందర్భంలో బ్యాంకర్లు రుణ గ్రహీతలకు రకరకాల అవకాశాలు ఇస్తారు. కాలపరిమితి, వాయిదా పెరగకుండా ఉండేందుకు అప్పు అసలులో 15 శాతం (ఉదాహరణకు అసలు 50 లక్షలు అయితే 7.50 లక్షలు) చెల్లించొచ్చు! అయితే, ఇంటి రుణం చెల్లిస్తూ.. రూ.ఏడున్నర లక్షలు కూడబెట్టగలిగితే.. పెరిగిన ఈఏమ్‌ఐని భారంగా భావించే పరిస్థితే ఉండదు కదా! పైగా, రెపో రేటు ఏటికేడూ పెరుగుతూ ఉండదు. మళ్లీ తగ్గుతుంది. రుణ కాలపరిమితి 20 ఏండ్లలో రెండు, మూడు లక్షల రూపాయలు అధికంగా కట్టాల్సి వస్తుందేమో! అంతేకానీ, మనం ఊహించినట్టుగా లక్షలాది రూపాయలు మీదపడవు. అయితే, ఆర్బీఐ పరపతి విధానాన్ని బట్టి వడ్డీ రేట్లలో మార్పులు ఉంటాయి. అంతేకానీ, మనం అనుకున్నట్టుగా ఇవి ఉంటాయి అనుకోవడం సరికాదు.
– ఎం. రాం ప్రసాద్‌, సర్టిఫైడ్‌ ఫైనాన్షియల్‌ ప్లానర్‌
ram@rpwealth.in, www.rpwealth.in
Read More :
“Commercial Property | ఇల్లు కొంటే మంచిదా? కమర్షియల్‌ ప్రాపర్టీ కొంటే లాభమా?”
Bank Auction Property | తక్కువలో వస్తుందని వేలంలో ఇల్లు కొంటున్నారా? ఈ నష్టాల గురించీ ఆలోచించండి
Read Today's Latest Business News in Telugu and Telugu News
- Follow Us :
-
