కదంతొక్కిన సూచీలు.. సెన్సెక్స్‌ 639, నిఫ్టీ 195 పాయింట్ల లాభం

దేశీయ స్టాక్‌ మార్కెట్ల వరుస పతనాలకు బ్రేక్‌ పడింది. బ్లూచిప్‌ సంస్థలైన రిలయన్స్‌, సన్‌ఫార్మా షేర్లకు మదుపర్ల నుంచి లభించిన మద్దతుతోపాటు అంతర్జాతీయ మార్కెట్ల నుంచి వచ్చిన సానుకూల అంశాలు సూచీల్లో జోష్‌ పెంచాయి.

ముంబై, ఏప్రిల్‌ 27: దేశీయ స్టాక్‌ మార్కెట్ల వరుస పతనాలకు బ్రేక్‌ పడింది. బ్లూచిప్‌ సంస్థలైన రిలయన్స్‌, సన్‌ఫార్మా షేర్లకు మదుపర్ల నుంచి లభించిన మద్దతుతోపాటు అంతర్జాతీయ మార్కెట్ల నుంచి వచ్చిన సానుకూల అంశాలు సూచీల్లో జోష్‌ పెంచాయి. పశ్చిమాసియాలో నెలకొన్న ఉద్రిక్త పరిస్థితులు త్వరలో తగ్గుముఖం పట్టే అవకాశాలున్నట్టు వచ్చిన వార్తలు మదుపర్లను కొనుగోలు వైపు నడిపించాయి. ఇంట్రాడేలో 700 పాయింట్లకు పైగా ఎగబాకిన 30 షేర్ల ఇండెక్స్‌ సూచీ సెన్సెక్స్‌ చివరకు మార్కెట్‌ ముగిసే సమయానికి 639.42 పాయింట్లు లాభపడి 77,303.63 వద్ద ముగిసింది. మరో సూచీ నిఫ్టీ 194.75 పాయింట్లు అందుకొని 24,092.70 వద్ద స్థిరపడింది.

రిలయన్స్‌ షేరు జోరు

గత త్రైమాసికంలో నిరాశాజనక ఆర్థిక ఫలితాలు ప్రకటించినప్పటికీ రిలయన్స్‌ షేరు భారీగా పుంజుకున్నది. బ్లూచిప్‌ సంస్థల షేర్లలో అత్యధిక విలువ కలిగిన రిలయన్స్‌ షేరు ఇంట్రాడేలో మూడు శాతానికి పైగా లాభపడిన షేరు చివరకు మార్కెట్‌ ముగిసే సమయానికి 2.88 శాతం అందుకొని రూ.1,365.95 వద్ద ముగిసింది. అటు ఎన్‌ఎస్‌ఈ లోనూ 2.86 శాతం ఎగబాకి రూ.1,365.80 వద్ద స్థిరపడింది. దీంతో కంపెనీ మార్కెట్‌ క్యాపిటలైజేషన్‌ విలువ రూ.51,837.41 కోట్లు పెరిగి రూ.18,48,477.13 కోట్లకు చేరుకున్నది.

• సన్‌ఫార్మా షేరు 7 శాతం ఎగబాకి టాప్‌ గెయినర్‌గా నిలిచింది. అమెరికాకు చెందిన ఆర్గానన్‌ అండ్‌ కో సంస్థను కొనుగోలు చేయనున్నట్టు ప్రకటించడంతో షేరు ధర రివ్వున ఎగిసింది.
• అదానీ పోర్ట్స్‌, టెక్‌ మహీంద్రా, మహీంద్రా అండ్‌ మహీంద్రా, ఎన్‌టీపీసీ, హెచ్‌సీఎల్‌, టీసీఎస్‌, టాటా స్టీల్‌, కొటక్‌ బ్యాంక్‌, పవర్‌గ్రిడ్‌, మారుతి, ఇన్ఫోసిస్‌ షేర్లు ఒక్క శాతంకు పైగా బలపడ్డాయి.
• వీటితోపాటు ఎస్బీఐ, ఎల్‌అండ్‌టీ, ఇండిగో, టైటాన్‌, ఐటీసీ, హెచ్‌డీఎఫ్‌సీ బ్యాంక్‌, భారతీ ఎయిర్‌టెల్‌, బజాజ్‌ ఫైనాన్స్‌, అల్ట్రాటెక్‌ సిమెంట్‌, ఏషియన్‌ పెయింట్స్‌ షేర్లు లాభపడ్డాయి.
• హెచ్‌యూఎల్‌, ఎటర్నల్‌, ఐసీఐసీఐ బ్యాంక్‌, ట్రెంట్‌, బీఈఎల్‌, యాక్సిస్‌ బ్యాంక్‌ షేర్లు 3 శాతం వరకు నష్టపోయాయి.
• అన్ని రంగాల షేర్లు కదంతొక్కాయి. యుటిలిటీ రంగ షేరు అత్యధికంగా 2.50 శాతం లాభపడగా, హెల్త్‌కేర్‌ 2.43 శాతం, ఐటీ 2.41 శాతం, రియల్టీ 2.35 శాతం, పవర్‌ 2.05 శాతం, సర్వీసెస్‌ 1.92 శాతం చొప్పున బలపడ్డాయి.