ఎన్నాళ్లకెన్నాళ్లకు..!

దేశీయ స్టాక్‌ మార్కెట్లు ఎట్టకేలకు లాభాల్లోకి వచ్చాయి. గతవారంరోజులుగా నష్టాలే పరమావధిగా కొనసాగిన సూచీలు బుధవారం ఒక్క శాతం వరకు కోలుకున్నాయి. ఆసియా, యూరప్‌ స్టాక్‌ మార్కెట్ల నుంచి వచ్చిన సానుకూల అంశాలు సూచీలకు ఉత్సాహాన్ని ఇచ్చాయి. లాభాల్లో ప్రారంభమైన సూచీలు చివరి వరకు ఇదే ట్రెండ్‌ను కొనసాగించాయి.

• ఎనిమిది రోజుల తర్వాత లాభాల్లోకి మార్కెట్లు
• ఒక్క శాతం వరకు పెరిగిన సెన్సెక్స్‌, నిఫ్టీ సూచీలు

ముంబై, మార్చి 1: దేశీయ స్టాక్‌ మార్కెట్లు ఎట్టకేలకు లాభాల్లోకి వచ్చాయి. గతవారంరోజులుగా నష్టాలే పరమావధిగా కొనసాగిన సూచీలు బుధవారం ఒక్క శాతం వరకు కోలుకున్నాయి. ఆసియా, యూరప్‌ స్టాక్‌ మార్కెట్ల నుంచి వచ్చిన సానుకూల అంశాలు సూచీలకు ఉత్సాహాన్ని ఇచ్చాయి. లాభాల్లో ప్రారంభమైన సూచీలు చివరి వరకు ఇదే ట్రెండ్‌ను కొనసాగించాయి. ఇంట్రాడేలో 500 పాయింట్లకు పైగా లాభపడిన 30 షేర్ల ఇండెక్స్‌ సూచీ సెన్సెక్స్‌ చివరకు 448.96 పాయింట్లు ఎగబాకి 59,411.08 వద్ద ముగిసింది. ఎన్‌ఎస్‌ఈ నిఫ్టీ కూడా 146.95 పాయింట్లు అధికమై 17,450.90 వద్ద స్థిరపడింది.
ఎస్బీఐ, యాక్సిస్‌ బ్యాంక్‌, ఇండస్‌ఇండ్‌ బ్యాంక్‌, టెక్‌ మహీంద్రా, హెచ్‌సీఎల్‌ టెక్నాలజీ, టీసీఎస్‌, మారుతి, టాటా స్టీల్‌, టాటా మోటర్స్‌ లాభాల్లో ముగిశాయి.

• పవర్‌ గ్రిడ్‌, హెచ్‌డీఎఫ్‌సీ బ్యాంక్‌లు మాత్రం నష్టపోయాయి.
• బీఎస్‌ఈ స్మాల్‌క్యాప్‌ 1.38 శాతం, మిడ్‌క్యాప్‌ ఇండెక్స్‌ 1.35 శాతం లాభపడ్డాయి.
• రంగాలవారీగా చూస్తే మెటల్‌ 2.61 శాతం, కమోడిటీ 2.30 శాతం, ఐటీ 1.36 శాతం, టెక్‌ 1.28 శాతం, ఇండస్ట్రియల్‌ 1.25 శాతం, బ్యాంకింగ్‌ 1.15 శాతం, క్యాపిటల్‌ గూడ్స్‌ 1.11 శాతం చొప్పున పెరిగాయి.
• గత ఎనిమిది సెషన్లలో సెన్సెక్స్‌ 2,357.39 పాయింట్లు లేదా 3.84 శాతం, నిఫ్టీ 731.9 పాయింట్లు లేదా 4.22 శాతం పతనం చెందాయి.

3 లక్షల కోట్లు పెరిగిన సంపద

ఎట్టకేలకు మదుపరుల సంపద పెరిగింది. గత ఎనిమిది సెషన్లుగా లక్షల కోట్ల రూపాయలు నష్టపోయిన పెట్టుబడిదారుల సంపద బుధవారం రూ.3 లక్షల కోట్ల పైగా పెరిగింది. బీఎస్‌ఈలో లిైస్టెన సంస్థల మార్కెట్‌ విలువ రూ.3,20, 574.19 కోట్లు పెరిగి రూ.2,60,93,075 .59 కోట్లకు చేరుకున్నది.
ఎనిమిది సెషన్ల తర్వాత మార్కెట్లకు ఇది రిలీఫ్‌ ర్యాలీ. యూరోపియన్‌, ఆసియా మార్కెట్ల నుంచి వచ్చిన సానుకూల అంశాలు మార్కెట్లకు ఉత్సాహాన్నిచ్చాయి.
– శ్రీకాంత్‌ చౌహాన్‌, కొటక్‌ సెక్యూరిటీ ఈక్విటీ రీసెర్చ్‌ హెడ్‌