ఎస్బీఐ లాభం 16,884 కోట్లు

దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) అంచనాలకుమించి రాణించింది. మొండి బకాయిలు తగ్గుముఖం పట్టడంతోపాటు వడ్డీల మీద వచ్చే ఆదాయం పెరగడంతో ప్రస్తుత ఆర్థిక సంవత్సరం తొలి త్రైమాసికానికిగాను రూ.16,884 కోట్ల స్టాండ్‌లోన్‌ నికర లాభాన్ని గడించింది.

• క్యూ1లో రెండింతలైన ప్రాఫిట్‌

న్యూఢిల్లీ, ఆగస్టు 4: దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) అంచనాలకుమించి రాణించింది. మొండి బకాయిలు తగ్గుముఖం పట్టడంతోపాటు వడ్డీల మీద వచ్చే ఆదాయం పెరగడంతో ప్రస్తుత ఆర్థిక సంవత్సరం తొలి త్రైమాసికానికిగాను రూ.16,884 కోట్ల స్టాండ్‌లోన్‌ నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.6,068 కోట్ల కంటే ఇది రెండింతలు అధికం. కానీ, మార్చి త్రైమాసికంలో నమోదైన రూ.16,695 కోట్ల కంటే కేవలం 1.14 శాతం పెరుగుదల నమోదైంది. గత త్రైమాసికంలో బ్యాంక్‌ రూ. 1,08,039 కోట్ల ఆదాయాన్ని ఆర్జించింది. గతేడాది ఇది రూ.74,989 కోట్లుగా ఉన్నది.

• బ్యాంక్‌కు వడ్డీల మీద వచ్చే ఆదాయం రూ.72,676 కోట్ల నుంచి రూ.95,975 కోట్లకు చేరుకున్నది.
• ఏడాది క్రితం 3.91 శాతంగా ఉన్న బ్యాంక్‌ స్థూల నిరర్థక ఆస్తుల విలువ గత త్రైమాసికానికిగాను 2.76 శాతానికి దిగొచ్చింది. విలువ పరంగా చూస్తే రూ.1,13,272 కోట్ల నుంచి రూ.91,328 కోట్లకు తగ్గాయి.
• నికర ఎన్‌పీఏ ఒక్క శాతం నుంచి 0.71 శాతానికి తగ్గింది. రూ.28,258 కోట్ల నుంచి రూ.22,905 కోట్లకు తగ్గాయి.
• ఎన్‌ఐఎం 3.47 శాతం నుంచి 3.23 శాతానికి దిగొచ్చింది.
• బ్యాంక్‌ అడ్వాన్స్‌లు రూ.29 లక్షల కోట్ల నుంచి రూ.33 లక్షల కోట్లకు, డిపాజిట్లు రూ.40 లక్షల కోట్ల నుంచి రూ.45 లక్షల కోట్లకు చేరుకున్నాయి.
• లక్ష కోట్ల కంటే అధికంగా వాహన రుణాలు ఇచ్చింది బ్యాంక్‌.
• వ్యవసాయ రుణాలు 15 శాతం పెరుగగా, కార్పొరేట్‌ రుణాల్లో 12.38 శాతం అధికమయ్యాయి.
• గత త్రైమాసికంలో నాన్‌-లైఫ్‌ ఇన్సూరెన్స్‌ వెంచర్‌ ఎస్బీఐ జనరల్‌ ఇన్సూరెన్స్‌లోకి రూ.489.67 కోట్ల నిధులను కేటాయించింది.
• ఎస్బీఐ షేరు 2.94 శాతం నష్టపోయి రూ.573.25 వద్దకు పడిపోయింది. దీంతో బ్యాంక్‌ మార్కెట్‌ విలువ రూ. 15,484.2 కోట్లు కరిగిపోయి రూ. 5,11,603.38 కోట్లకు పడిపోయింది.

‘గత త్రైమాసికంలో రికార్డు స్థాయి లాభాలను ఆర్జించగలిగాం. మొండి బకాయిలు తగ్గుముఖం పట్టడం, వడ్డీల మీద వచ్చే ఆదాయం పుంజుకోవడం ఇందుకు కారణం. ట్యాక్స్‌ రిఫండ్‌కు సంబంధించి రూ.830 కోట్ల నిధులు సమకూరడం కూడా లాభాలు పెరగడానికి దోహదం చేశాయి.

– దినేశ్‌ ఖారా, ఎస్బీఐ చైర్మన్‌