పెరిగిన సిమెంట్‌ ధరలు.. బస్తాపై రూ.50 వడ్డన

సిమెంట్‌ ధరలు మళ్లీ పెరిగాయి. గడిచిన నెలలో బస్తా సిమెంట్‌ ధర రూ.50 చొప్పున పెరిగింది. దీంతో గత నెలలో 50 కిలోల బరువు కలిగిన సిమెంట్‌ బస్తా ధర రూ.50 అధికం కావడంతో రూ.360కి చేరుకున్నట్లు దేశీయ రేటింగ్‌ ఏజెన్సీ ఇక్రా విడుదల చేసిన నివేదికలో ఈ విషయాన్ని వెల్లడించింది.

న్యూఢిల్లీ, జూన్‌ 28: సిమెంట్‌ ధరలు మళ్లీ పెరిగాయి. గడిచిన నెలలో బస్తా సిమెంట్‌ ధర రూ.50 చొప్పున పెరిగింది. దీంతో గత నెలలో 50 కిలోల బరువు కలిగిన సిమెంట్‌ బస్తా ధర రూ.50 అధికం కావడంతో రూ.360కి చేరుకున్నట్లు దేశీయ రేటింగ్‌ ఏజెన్సీ ఇక్రా విడుదల చేసిన నివేదికలో ఈ విషయాన్ని వెల్లడించింది. అలాగే సిమెంట్‌ అమ్మకాలు ఏడాది ప్రాతిపదికన 9 శాతం అధికమై 39.6 మిలియన్‌ మెట్రిక్‌ టన్నులకు చేరుకున్నట్లు తెలిపింది.

ఉత్పత్తి వ్యయం తగ్గుముఖం పట్టడంతోపాటు బొగ్గు, పెట్‌కోక్‌, డీజిల్‌ ధరలు తగ్గడం కూడా సిమెంట్‌ తయారీ సంస్థలకు భారీ ఊరట లభించిందని, ముఖ్యంగా నిర్వహణ లాభాలు అంతకంతకు పెరిగాయని తెలిపింది. ప్రస్తుత ఆర్థిక సంవత్సరం తొలి రెండు నెలల్లో సిమెంట్‌ ధరలు ఏడు శాతం వరకు అధికమై రూ.360కి చేరుకున్నట్టు తెలిపింది. కానీ, గతేడాది ఇదే నెలల్లో ధరలు 7 శాతం తగ్గాయి.

మరోసారి పెరిగే అవకాశం

• ప్రస్తుత నెలలోనే సిమెంట్‌ ధరలు పెంచడానికి సంస్థలు సిద్ధమవుతున్నట్టు తెలుస్తున్నది. ప్రస్తుతం తెలంగాణలో బస్తా సిమెంట్‌ ధర రూ.310 మొదలుకొని రూ.350 గరిష్ఠ స్థాయిలో లభ్యమవుతున్నది. ఈ నెల 31 నుంచి బస్తా ధర మరో రూ.30 పెరిగే అవకాశాలున్నాయని ఇండస్ట్రీ వర్గాలు వెల్లడించాయి.
• ఈ ఏడాది ఏప్రిల్‌-మే నెలల్లో సిమెంట్‌ విక్రయాలు 8 శాతం పెరిగి 78.7 మిలియన్‌ మెట్రిక్‌ టన్నులకు చేరుకున్నది.
• ప్రస్తుత ఆర్థిక సంవత్సరంలో సిమెంట్‌ అమ్మకాలు 6-7 శాతం పెరిగి 480-485 మిలియన్‌ మెట్రిక్‌ టన్నులకు చేరుకునే అవకాశం ఉన్నదని ఇక్రా అంచనావేస్తున్నది.
• సిమెంట్‌ తయారీదారుల ఆపరేటింగ్‌ మార్జిన్లు 80-150 బేసిస్‌ పాయింట్లు పెరిగి 16.3-17.0 పాయింట్లకు చేరుకునే అవకాశాలున్నాయి.
• రాజకీయ అస్తిరతతో బొగ్గు, పెట్‌కోక్‌పై ఉత్పత్తి వ్యయం తగ్గుముఖం పట్టగా, డీజిల్‌ ధరలు యథాతథంగా కొనసాగాయి.
• ప్రస్తుత నెలలో బొగ్గు ధరలు 19 శాతం తగ్గి 100 డాలర్లకు పడిపోగా, పెట్‌కోక్‌ ధరలు 2 శాతం తగ్గాయి.