Airways | వారానికి 24 వేల విమానాలు.. వేసవి షెడ్యూల్‌ను ప్రకటించిన సంస్థలు

ప్రస్తుత వేసవి సీజన్‌లో ప్రయాణికుల రద్దీని దృష్టిలో పెట్టుకొని విమానయాన సంస్థలు భారీ స్థాయిలో సర్వీసులు అందించడానికి సిద్ధమయ్యాయి. ఈ నెల 31 నుంచి వారానికి 24,275 చొప్పున దేశీయంగా విమాన సర్వీసులు అందించబోతున్నట్లు ప్రకటించాయి.

Airways | న్యూఢిల్లీ, మార్చి 25: ప్రస్తుత వేసవి సీజన్‌లో ప్రయాణికుల రద్దీని దృష్టిలో పెట్టుకొని విమానయాన సంస్థలు భారీ స్థాయిలో సర్వీసులు అందించడానికి సిద్ధమయ్యాయి. ఈ నెల 31 నుంచి వారానికి 24,275 చొప్పున దేశీయంగా విమాన సర్వీసులు అందించబోతున్నట్లు ప్రకటించాయి. గతంతో పోలిస్తే ఇది 6 శాతం అధికమని ఏవియేషన్‌ రెగ్యులేటర్‌ డీజీసీఏ వెల్లడించింది. ఇండిగో, ఎయిర్‌ ఇండియా, విస్తారాలు అత్యధికంగా విమాన సర్వీసులు నడపనుండగా..స్పైస్‌జెట్‌ మాత్రం తన సర్వీసుల సంఖ్యను తగ్గించుకుంటున్నది. మార్చి 31 నుంచి అక్టోబర్‌ 26 వరకు ఈ ఏడాదికిగాను సమ్మర్‌ షెడ్డ్యూల్‌ను ప్రకటించాయి సంస్థలు. ఈ సమ్మర్‌ సీజన్‌లో దేశీయ విమానయాన సంస్థలు అమెరికాతోపాటు బ్రిటన్‌, ఉజ్బెకిస్తాన్‌, మాల్దీవ్స్‌, జార్ఝియాతోపాటు 37 దేశాలకు విమాన సర్వీసులు నడుపుతున్నాయి.

• 27 దేశీయ విమానాశ్రయాల నుంచి అంతర్జాతీయ రూట్‌లో విమాన సేవలు.
• వారానికి 1,922 అంతర్జాతీయ రూట్లలో విమాన సర్వీసులు.
• ఈ నెల 28 నుంచి ఆకాశ ఎయిర్‌ అంతర్జాతీయ రూట్‌లో విమాన సేవలు.
• ఈ సీజన్‌ నుంచి కొత్తగా అజామ్‌గఢ్‌, అలిగఢ్‌, చిత్రకూట్‌, గోండియా, జలగాన్‌, మోరదాబాద్‌, పిథోర్‌గర్‌ విమానాశ్రయాలు అందుబాటులోకి.
• ఇండిగో ఈ సమ్మర్‌లో 13,050 విమాన సర్వీసులను నడపబోతున్నది.
• ఎయిర్‌ ఇండియా 2,278, విస్తారా 2,324, ఆకాశ ఎయిర్‌ 903 సర్వీసులు.
• 1,657కి కుదించిన స్పైస్‌జెట్‌.
• అంతర్జాతీయ రూట్‌లో ఎయిర్‌ ఇండియా 455 విమానాలు నడపనుండగా, ఇండిగో 731, విస్తారా 184కి పెంచుకుంటున్నాయి.