Minister Parthasarathy | అందుకే ల్యాండ్‌ అండ్‌ టైటిలింగ్‌ యాక్ట్‌ రద్దు : మంత్రి పార్థసారథి

Minister Parthasarathy | ఆంధ్రప్రదేశ్‌లో ల్యాండ్‌ అండ్‌ టైటిలింగ్‌ యాక్ట్‌ (Land and Titling Act ) ను రద్దు చేస్తూ మంత్రి వర్గ సమావేశం నిర్ణయించిందని మంత్రి పార్థసారథి వెల్లడించారు.

అమరావతి : ఆంధ్రప్రదేశ్‌లో ల్యాండ్‌ అండ్‌ టైటిలింగ్‌ యాక్ట్‌ (Land and Titling Act ) ను రద్దు చేస్తూ మంత్రి వర్గ సమావేశం నిర్ణయించిందని మంత్రి పార్థసారథి (Minister Parthasarathy) వెల్లడించారు. మంగళవారం సచివాలయంలో ముఖ్యమంత్రి చంద్రబాబు ( Chandra Babu) అధ్యక్షతన జరిగిన మంత్రి వర్గ సమావేశంలో తీసుకున్న నిర్ణయాలను మంత్రి మీడియాకు వెల్లడించారు.

ల్యాండ్‌ టైటిలింగ్‌ చట్టంపై అనేక సందేహాలు ఉన్నాయని తెలిపారు. ఈ చట్టాన్ని బీజేపీ (BJP) పాలిత రాష్ట్రాలే అమలు చేయలేదని పేర్కొన్నారు . గత వైసీపీ (YCP) ప్రభుత్వం ఎవరితో చర్చించకుండానే చట్టాన్ని తీసుకొచ్చిందని ఆరోపించారు. నీతిఅయోగ్‌ ( Niti Aayog) ప్రతిపాదిత చట్టానికి, గత ప్రభుత్వం తెచ్చిన చట్టానికి సంబంధం లేదని వివరించారు. ఈ చట్టం వివాదాలను పెంచే విధంగా ఉందని, ప్రజలకు మేలు చేసేదిగా లేదని అన్నారు.

రెవెన్యూ (Revenue) , రిజిస్ట్రేషన్‌, ల్యాండ్‌ రికార్డ్సు వ్యవస్థను పూర్తిగా ధ్వంసం చేసేందుకు చట్టాన్ని తీసుకువచ్చారని ఆరోపించారు. రాష్ట్రంలో ఉచిత ఇసుకపై కమిటీ వేసి పర్యవేక్షణ చేయడానికి మంత్రి వర్గం ఆమోదం తెలిపిందని అన్నారు. ఇసుకపై గత ప్రభుత్వం కోర్టులకు తప్పుడు సమాచారం ఇచ్చిందని అన్నారు. పాత ఇసుక విధానం, పలు ఒప్పందాలు రద్దు చేశామని తెలిపారు.

కౌలు రైతులకు మేలు చేసేందుకు కార్డులు
రాష్ట్రంలో కౌలు రైతులకు మేలు చేయాలన్న లక్ష్యంతో ప్రభుత్వం చిత్తశుద్ధితో ఉందని మంత్రి పార్థసారథి పేర్కొన్నారు. కౌలు రైతుల సమస్యలపై పూర్తిగా అధ్యయనం చేసిన తరువాత స్పష్టమైన విధానాన్ని తీసుకువస్తామన్నారు. రాబోయే రోజుల్లో 50 లక్షల ఎకరాల్లో ప్రకృతి వ్యవసాయాన్ని విస్తరించి ప్రపంచానికి ఒక ఆదర్శవంతమైన సాగును అందుబాటులోకి తీసుకు రానున్నామని వివరించారు. దాదాపు రెండున్నర గంటల పాటు కొనసాగిన మంత్రి వర్గ సమావేశంలో డిప్యూటీ సీఎం పవన్‌ కల్యాణ్‌, మంత్రులు, సీఎస్‌, ఇతర శాఖల ఉన్నతాధికారులు పాల్గొన్నారు.

Read more : 

Chandrababu | ఉచిత ఇసుక విధానంలో జోక్యం చేసుకోకండి.. మంత్రులు, ఎమ్మెల్యేలకు చంద్రబాబు ఆదేశం

AP News | ఏపీ శాసన మండలి సెక్రటరీ జనరల్‌గా సూర్యదేవర ప్రసన్నకుమార్‌ నియామకం