Supreme Court | రాజకీయాల్లోకి దేవుళ్లను లాగొద్దు.. చంద్రబాబుకు సుప్రీం తలంటు

తిరుమల శ్రీవారి లడ్డూ ప్రసాదం తయారీలో కల్తీ నెయ్యి వాడారన్న వివాదం దేశవ్యాప్తంగా చర్చనీయాంశమైంది. ఈ అంశంపై సోమవారం విచారణ చేపట్టిన సుప్రీంకోర్టు ఆంధ్రప్రదేశ్‌ ముఖ్యమంత్రి చంద్రబాబు వైఖరిని తీవ్రంగా తప్పుబట్టింది.

• తిరుమల లడ్డూలో కల్తీ జరిగినట్టు సాక్ష్యాలున్నాయా?
• కల్తీ జరుగలేదని ఈవో చెప్పాక.. మీరెలా జరిగిందంటారు?
• కల్తీపై ఇతర ల్యాబ్స్‌లో సెకండ్‌ ఒపీనియన్‌ తీసుకొన్నారా?
• జూలైలో నివేదిక వస్తే, సెప్టెంబర్‌లో తీరిగ్గా చెప్పడమేంటి?
• సిట్‌ విచారణకు ఆదేశించిన తర్వాత ముఖ్యమంత్రి మీడియా ముందుకొచ్చి మాట్లాడాల్సిన అవసరమేంటి?
• రాజ్యాంగబద్ధమైన పదవిలో ఉన్న సీఎం ఇలా చేయొచ్చా?
• తన వ్యాఖ్యలతో భక్తుల మనోభావాలను గాయపర్చారు
• తిరుమల లడ్డూ వివాదంపై సుప్రీంకోర్టు ఘాటు వ్యాఖ్యలు
• కల్తీపై ఆధారాలేవీ కనిపించట్లేదన్న సర్వోన్నత న్యాయస్థానం

Supreme Court | (స్పెషల్‌ టాస్క్‌ బ్యూరో)హైదరాబాద్‌, సెప్టెంబర్‌ 30 (నమస్తే తెలంగాణ): తిరుమల శ్రీవారి లడ్డూ ప్రసాదం తయారీలో కల్తీ నెయ్యి వాడారన్న వివాదం దేశవ్యాప్తంగా చర్చనీయాంశమైంది. ఈ అంశంపై సోమవారం విచారణ చేపట్టిన సుప్రీంకోర్టు ఆంధ్రప్రదేశ్‌ ముఖ్యమంత్రి చంద్రబాబు వైఖరిని తీవ్రంగా తప్పుబట్టింది. కనీసం దేవుడినైనా రాజకీయాలకు దూరంగా ఉంచాలని హితవుపలికింది. లడ్డూలో కల్తీ నెయ్యి వినియోగించారనడానికి తగిన ఆధారాలు తమకైతే కనిపించడంలేదన్న అత్యున్నత ధర్మాసనం.. కల్తీ నెయ్యిని లడ్డూలో వాడారో లేదో పూర్తిగా తెలియకుండా ఎలా ప్రకటన చేస్తారని చంద్రబాబును నిలదీసింది.

ఈ వివాదంపై విచారణకు ప్రత్యేక దర్యాప్తు బృందాన్ని (సిట్‌) రాష్ట్రప్రభుత్వం నియమించిందని గుర్తుచేసిన ధర్మాసనం.. ఒకవైపు సిట్‌ విచారణ జరుగుతున్న సమయంలో సీఎం మీడియా ముందుకు వచ్చి ప్రకటన చేయాల్సిన అవసరం ఏమున్నదని సూటిగా ప్రశ్నించింది. ప్రస్తుత పరిస్థితుల్లో కొత్తగా నియమించిన సిట్‌ సరిగ్గా విచారణ జరపగలదా? అన్న సందేహాలు లేవనెత్తింది. ఈ మేరకు లడ్డూ వివాదంపై జస్టిస్‌ బీఆర్‌ గవాయి, జస్టిస్‌ కేవీ విశ్వనాథన్‌తో కూడిన ద్విసభ్య ధర్మాసనం పలు కీలక వ్యాఖ్యలు చేసింది. తదుపరి విచారణను అక్టోబర్‌ 3కు వాయిదా వేసింది.

సుప్రీంకోర్టు కీలక వ్యాఖ్యలు

• స్వామి వారి లడ్డూ ప్రసాదం తయారీలో కల్తీ నెయ్యిని వినియోగించినట్లు ఎలా తెలిసింది? అయినా, కల్తీ నెయ్యిని వాడకుండా పక్కనబెట్టామని టీటీడీ ఈవో చెప్పారు కదా! అలాంటప్పుడు, లడ్డూ తయారీలో ఆ నెయ్యిని వాడినట్లు ఎలా చెప్తారు?
• దీన్నిబట్టి కల్తీ నెయ్యిని లడ్డూలో వాడినట్టు ఆధారాలు లేవని అర్థమవుతున్నది. అలాంటప్పుడు లడ్డూ కల్తీ జరిగిందని ఎలా చెప్తారు?
• లడ్డూ కల్తీ జరిగిందనుకొందాం. అయితే, ఆ శాంపిల్స్‌ను ల్యాబ్‌కు పంపించారా? పంపితే, వాటి రిపోర్టులేవి?
• టెస్టుల కోసం గుజరాత్‌లోని ఎన్‌డీడీబీ ల్యాబ్‌కే నెయ్యిని ఎందుకు పంపాల్సి వచ్చింది?
• మైసూరు, ఘజియాబాద్‌లో కూడా ల్యాబ్‌లు ఉన్నాయి కదా. సెకండ్‌ ఒపీనియన్‌ కోసం అక్కడికి శాంపిల్స్‌ ఎందుకు పంపలేదు.
• (సీఎం చంద్రబాబును ఉద్దేశిస్తూ..) నెయ్యి కల్తీ జరిగినట్టు జూలైలో నివేదిక వచ్చిందంటున్నారు. మరి ఆ విషయాన్ని సెప్టెంబర్‌లో తీరిగ్గా ఎందుకు చెప్పాల్సి వచ్చింది?
• నెయ్యి కల్తీ అయ్యిందా? లేదా? ఆ నెయ్యిని లడ్డూకి వాడారా? లేదా? అని తేల్చేందుకే సిట్‌ ఏర్పాటు చేశారు.
• ఒకవైపు సిట్‌ను ఏర్పాటు చేసిన మీరు (సీఎం).. లడ్డూ తయారీలో జంతువుల కొవ్వుతో చేసిన కల్తీ నెయ్యిని గత ప్రభుత్వ హయాంలో వాడారంటూ మీడియా ముఖంగా తేల్చిచెప్పడమేంటి? అలాంటప్పుడు సిట్‌ దర్యాప్తు ఎందుకు?
• కల్తీ నెయ్యిని లడ్డూలో వాడారో లేదో పూర్తిగా తెలియకుండా మీడియా ముందుకు మీరు (సీఎం) వెళ్లాల్సిన అవసరమేంటి?
• ఇక్కడ మరో విషయం. ఒకవైపు లడ్డూ తయారీలో కల్తీ నెయ్యి వాడారని సీఎం ప్రకటిస్తే, టీటీడీ చీఫ్‌ ఎగ్జిక్యూటివ్‌ ఆఫీసర్‌ (ఈవో) మాత్రం కల్తీగా తేలిన నెయ్యిని అసలు లడ్డూ తయారీలో వాడలేదంటూ స్టేట్‌మెంట్‌ ఇచ్చారు. దీన్ని ఎలా అర్థం చేసుకోవాలి?
• ఇది కోట్లాది మంది భక్తుల మనోభావాలకు సంబంధించిన విషయం. దేవుడిని రాజకీయాల్లోకి లాగొద్దు. కనీసం దేవుడినైనా రాజకీయాలకు దూరంగా ఉంచండి. సీఎం తన వ్యాఖ్యలతో లక్షలాది మంది మనోభావాలను గాయపర్చారు.
• ప్రస్తుత పరిస్థితుల్లో ప్రభుత్వం నియమించిన సిట్‌ సరిగ్గా విచారణ జరపగలదా? అనే అనుమానాలు మాకు కలుగుతున్నాయి.
• ఈ లడ్డూ వివాదంపై కేంద్రం ఏర్పాటు చేసే స్వతంత్ర కమిటీ విచారణ జరిపితే బావుంటుందేమో? అని మాకు అనిపిస్తున్నది.

ఏమిటీ వివాదం?
గత వైఎస్సార్సీపీ ప్రభుత్వ హయాంలో తిరుమల శ్రీవారి లడ్డూ ప్రసాదం తయారీలో వాడే నెయ్యి కల్తీకి గురైనట్టు ఎన్‌డీడీబీ ల్యాబ్‌ తన నివేదికలో ఆరోపించింది. ఈ విషయాన్ని సెప్టెంబర్‌ 18న సీఎం చంద్రబాబు మీడియాకు తెలియజేశారు. దీంతో ప్రపంచవ్యాప్తంగా ఉన్న శ్రీవారి భక్తులు తీవ్ర ఆగ్రహం వ్యక్తం చేశారు. ఈ క్రమంలో తిరుమల స్వామి వారి లడ్డూ ప్రసాదం తయారీలో కల్తీ నెయ్యి విషయంలో నిజం నిగ్గూ తేల్చాలంటూ బీజేపీ సీనియర్‌ నేత సుబ్రమణ్య స్వామి, వైసీపీ సీనియర్‌ నేత వైవీ సుబ్బారెడ్డి వేర్వేరుగా సుప్రీంకోర్టులో పిటిషన్లు దాఖలు చేశారు. వీటిపై సోమవారం విచారణ జరిపిన సుప్రీంకోర్టు సీఎం చంద్రబాబు వైఖరిని తప్పుబడుతూ పలు కీలక వ్యాఖ్యలు చేసింది.