ప‌ర్వదినాల్లో శ్రీవారి చెంత ఆర్జిత సేవ‌లు ర‌ద్దు..

tirumala|పండుగల సందర్భంగా తిరుమలలో శ్రీవారికి నిర్వహించే ఆర్జిత సేవలు రద్దు చేసినట్టు టీటీడీ అధికారులు ప్రకటించారు. ఏప్రిల్ 2న ఉగాది

తిరుమల : పండుగల సందర్భంగా తిరుమలలో శ్రీవారికి నిర్వహించే ఆర్జిత సేవలు రద్దు చేసినట్టు టీటీడీ అధికారులు ప్రకటించారు. ఏప్రిల్ 2న ఉగాది సంద‌ర్భంగా క‌ల్యాణోత్సవం, ఊంజ‌ల్‌సేవ‌, ఆర్జిత బ్రహ్మోత్సవం, ఏప్రిల్ 10న శ్రీ‌రామ‌న‌వ‌మి సంద‌ర్భంగా తోమాల‌, అర్చన‌, స‌హ‌స్రదీపాలంకార సేవలను రద్దు చేశామని వివరించారు. వ‌సంతోత్సవాల సంద‌ర్భంగా ఏప్రిల్ 14 నుంచి 16వ తేదీ వ‌ర‌కు క‌ల్యాణోత్సవం, ఊంజ‌ల్‌సేవ‌, ఆర్జిత బ్రహ్మోత్సవం, స‌హ‌స్రదీపాలంకార సేవల‌ను, ఏప్రిల్ 15న నిజ‌పాద ద‌ర్శనం సేవ‌లను ర‌ద్దు చేసినట్లు వెల్లడించారు.

శ్రీ ప‌ద్మావ‌తి ప‌రిణ‌యోత్సవాల సంద‌ర్భంగా మే 10 నుంచి 12వ తేదీ వ‌ర‌కు ఆర్జిత బ్రహ్మోత్సవం, స‌హ‌స్రదీపాలంకార సేవలు, జూన్ 14న జ్యేష్టాభిషేకం మూడో రోజున అష్టద‌ళ‌పాద‌ ప‌ద్మారాధ‌న‌, క‌ల్యాణోత్సవం, ఊంజ‌ల్‌సేవ‌, ఆర్జిత బ్రహ్మోత్సవం సేవ‌లు రద్దయ్యాయని భ‌క్తులు ఈ విష‌యాన్ని గ‌మ‌నించాలని కోరారు. అదేవిధంగా సాధారణ రోజుల్లో తిరుమ‌ల శ్రీ‌వారి ఆల‌యంలో ఏప్రిల్ 1వ తేదీ నుంచి ఆర్జిత సేవ‌లు తిరిగి ప్రారంభించి భ‌క్తుల‌ను అనుమ‌తించాల‌ని టీటీడీ నిర్ణయించింది.

ఇందులో భాగంగా ఏప్రిల్‌, మే, జూన్ నెల‌ల‌కు సంబంధించిన ఆర్జిత సేవా టికెట్లను మార్చి 20, ఉద‌యం 10 గంట‌ల‌కు ఆన్‌లైన్‌లో విడుద‌ల చేయ‌నుంది. భ‌క్తులు tirupatibalaji.ap.gov.in వెబ్‌సైట్ ద్వారా బుక్ చేసుకోవ‌చ్చని చెప్పారు.