AP Politics : ఢిల్లీ కేంద్రంగా సెగ పుట్టిస్తున్న ఏపీ రాజకీయాలు

AP Politics : ఢిల్లీ కేంద్రంగా ఏపీ రాజకీయాలు సెగ పుట్టిస్తున్నాయి. ఒకరిపై మరొకరు ఫిర్యదు చేస్తూ పైచేయి సాధించే పనిలో వైసీపీ, టీడీపీ నిమగ్నమయ్యాయి...

October 28, 2021 / 09:12 PM IST

AP Politics : ఢిల్లీ కేంద్రంగా సెగ పుట్టిస్తున్న ఏపీ రాజకీయాలు

న్యూఢిల్లీ : (AP Politics) ఢిల్లీ కేంద్రంగా ఏపీ రాజకీయాలు సెగ పుట్టిస్తున్నాయి. ఒకరిపై మరొకరు ఫిర్యదు చేస్తూ పైచేయి సాధించే పనిలో వైసీపీ, టీడీపీ నిమగ్నమయ్యాయి. టీడీపీ నేతలు రాష్ట్రపతిని కలువడంతో.. వైసీపీ నేతలు సీఈసీతో భేటీ అయ్యారు. కేంద్ర హోంమంత్రి అమిత్‌షాతో రెండు పార్టీల నేతలు తమ గోడు వెల్లబోసుకున్నారు. అమిత్‌షాతో పోటాపోటీగా మంతనాలు జరిపేందుకు ఇరుపార్టీలు పోటీపడ్డారు వైసీపీ, టీడీపీ ఎంపీలు. పార్లమెంటరీ స్థాయీ సంఘాల సమావేశం సందర్భంగా లాబీల్లో ఈ సీన్‌ కనిపించింది. ఒకవైపు టీడీపీ ఎంపీ కనకమేడల రవీంద్రకుమార్‌, మరోవైపు వైసీపీ ఎంపీ గోరంట్ల మాధవ్‌ అమిత్‌షాతో మాట్లాడేందుకు పోటీ పడ్డారు. ఇరు పార్టీల నేతల పరస్పర దూషణలు, ఫిర్యాదులతో ఢిల్లీలో ఏపీ రాజకీయాలు హాట్‌హాట్‌గా మారాయి.

ఎంపీ విజయసాయి రెడ్డి నేతృత్వంలోని వైసీపీ ఎంపీల బృందం గురువారం ఉదయం కేంద్ర ఎన్నికల సంఘాన్ని కలిసింది. ముఖ్యమంత్రి జగన్‌పై టీడీపీ నేత చేసిన వ్యాఖ్యలను ఆధారాలతో వివరించిన వైసీపీ ఎంపీలు.. టీడీపీ గుర్తింపును రద్దు చేయాలని విజ్ఞప్తి చేశారు. టీడీపీ నేతలు లోకేశ్‌, బోండా ఉమ, దేవినేని, పట్టాభి చేసిన వ్యాఖ్యలను సీఈసీ దృష్టికి తీసుకెళ్లామని ఎంపీ విజయసాయి రెడ్డి చెప్పారు. రాజ్యాంగ పదవిలో ఉన్న వ్యక్తిపై అలాంటి చౌకబారు వ్యాఖ్యలు చేయడంపై ఫిర్యాదు చేసినట్లు ఆయన తెలిపారు. చంద్రబాబు ఉగ్రవాదుల ముఠాకు నాయకత్వం వహిస్తున్నారంటూ విజయసాయి రెడ్డి ఆరోపించారు. దొంగల ముఠాను ఎన్నికలకు అనుమతిస్తే దేశం పరిస్థితి అధోగతి పాలవుతుందని చెప్పుకొచ్చారు.

కాగా, స్థాయి సంఘాల సమావేశం సందర్భంగా అమిత్‌షాతో తమ గోడు వెళ్లబోసుకునేందుకు ఇరు పార్టీల నేతలు తహతహలాడారు. అమిత్‌షాకు వైసీపీ ఎంపీ గోరంట్ల మాధవ్‌ లేఖ అందించగా.. టీడీపీ ఎంపీ కనకమేడల రవీంద్రకుమార్‌ మాత్రం అమిత్‌షాతో మాట్లాడి ఫిర్యాదు చేశారు. అంతకుముందే చంద్రబాబు.. అమిత్‌షాతో ఫోన్లో మాట్లాడి వైసీపీ తీరుపై ఫిర్యాదు చేసినట్లు సమాచారం.