కార్మిక పక్షం.. టీబీజీకేఎస్‌

టీబీజీకేఎస్‌.. సింగరేణి ప్రగతిలో కీలకపాత్ర పోషించడమేగాక అనేక హక్కులు సాధించి నల్లసూర్యుల మనసు గెలుచుకున్నది. ఇప్పటికే ‘గుర్తింపు’ ఎన్నికల్లో రెండుసార్లు విజయం సాధించగా, ముచ్చటగా మూడోసారి గెలిచే లక్ష్యంతో ముందుకెళ్తున్నది.

• సింగరేణి చరిత్రలో లేని విధంగా హక్కులు సాధించిన ఘనత
• కేసీఆర్‌ సర్కారు సాయంతో కార్మికులకు అనేక ప్రయోజనాలు
• మరోసారి గెలిచేందుకు ఉవ్విళ్లూరుతున్న బీఆర్‌ఎస్‌ అనుబంధ సంఘం
• హ్యాట్రికే లక్ష్యంగా ముందుకు..
• ఆఖరి రోజూ జోరుగా ప్రచారం
• బాణం గుర్తుకు ఓటేసి గెలిపించాలని విజ్ఞప్తి

టీబీజీకేఎస్‌.. సింగరేణి ప్రగతిలో కీలకపాత్ర పోషించడమేగాక అనేక హక్కులు సాధించి నల్లసూర్యుల మనసు గెలుచుకున్నది. ఇప్పటికే ‘గుర్తింపు’ ఎన్నికల్లో రెండుసార్లు విజయం సాధించగా, ముచ్చటగా మూడోసారి గెలిచే లక్ష్యంతో ముందుకెళ్తున్నది. వారసత్వ ఉద్యోగాలు పోగొట్టిన జాతీయ సంఘాల వైఖరిని ఎండగడుతూనే.. తాము సాధించిన ఘనతను వివరిస్తూ ఓట్లు అభ్యర్థిస్తున్నది. గౌరవ అధ్యక్షురాలు కల్వకుంట్ల కవిత సారథ్యంలో చేపట్టిన సంక్షేమ కార్యక్రమాలు, సౌకర్యాలే తిరిగి గెలిపిస్తాయన్న ధీమా నాయకుల్లో వ్యక్తమవుతున్నది. ఇక ఏఐటీయూసీ, ఐన్‌టీయూసీలు చేసిందేమీ లేదని, తమను కంటికి రెప్పలా కాపాడుకున్న బీఆర్‌ఎస్‌ అనుబంధ సంఘాన్నే గెలిపించుకుంటామని కార్మిక లోకం స్పష్టం చేస్తున్నది.

శ్రీరాంపూర్‌, డిసెంబర్‌ 25 : తెలంగాణ బొగ్గు కార్మిక సంఘం.. సింగరేణి చరిత్రలో లేని విధంగా అనేక అభివృద్ధి, సంక్షేమ కార్యక్రమాలు చేపట్టడమేగాక లెక్కకు మించి హకులు సాధించి కార్మికుల మనసును గెలుచుకున్నది. కేసీఆర్‌ సర్కారు ప్రోత్సాహం, టీబీజీకేఎస్‌ గౌరవ అధ్యక్షురాలు కల్వకుంట్ల కవిత సారథ్యంలో సంస్థ ప్రగతికి కృషి చేయడమేగాక కార్మికుల పక్షాన నిలిచి అనేక ప్రయోజనాలు సాధించింది. కార్మికులను కంటికి రెప్పలా కాపాడుకొని ఒక పోరాటమైనా లేకుండా దేశ చరిత్రలో ఏ ప్రభుత్వ రంగ సంస్థ సాధించని అభివృద్ధి సాధించింది. నూతన హకులతో పాటు జాతీయ కార్మిక సంఘాలు పోగొట్టిన హకులను కూడా సాధించి కార్మికుల గుండెల్లో గూడు కట్టుకున్నది.

ఏఐటీయూసీ, ఐఎన్‌టీయూసీ చేసిందేమిటి?

1998, 2001లో గుర్తింపు కార్మిక సంఘం ఎన్నికల్లో విజయం సాధించిన ఏఐటీయూసీ ఎలాంటి హకులు, ప్రయోజనాలు కల్పించిందో కార్మిక వర్గానికి తెలుసు. అందుకే 2003లో జరిగిన ఎన్నికల్లో ఆ సంఘాన్ని ఓడించి.. ఐఎన్‌టీయూసీకి పట్టం కట్టారు. ఐన్‌టీయూసీతోనైనా తమకు లాభం జరుగుతుందేమోనని ఆశించిన కార్మిక లోకానికి చివరికి నిరాశే మిగిలింది. ఇలా ఏఐటీయూసీ కాకపోతే.. ఐఎన్‌టీయూసీ.. ఐఎన్‌టీయూసీ కాకపోతే.. ఏఐటీయూసీ గెలుచుకుంటూ వచ్చాయి. 12 ఏళ్లు గుర్తింపు కార్మిక సంఘాలుగా ఉండి కార్మికులకు చేసిందేమీ లేకపోగా.. వారసత్వ ఉద్యోగాలు ఊడగొట్టింది. ఈ విషయాన్ని కార్మిక కుటుంబాలు ఇప్పటికీ జీర్ణించుకోలేక పోతున్నాయి. అలాంటి వారికి ఓట్లు అడిగే హక్కు లేదని, ఈ ఎన్నికల్లోనూ టీబీజీకేఎస్‌కే పట్టం కట్టి.. ఏఐటీయూసీ, ఐన్‌టీయూసీలకు తగిన గుణపాఠం చెబుతామని హెచ్చరిస్తున్నారు.

హ్యాట్రిక్‌పై టీబీజీకేఎస్‌ దృష్టి..

2012 అక్టోబర్‌ 5న.. జరిగిన గుర్తింపు సంఘం ఎన్నికల్లో కార్మిక వర్గం టీబీజీకేఎస్‌ను ఆదరించింది. 23,311 ఓట్లు అందించి గుర్తింపు కార్మిక సంఘంగా టీబీజీకేఎస్‌ను నిలబెట్టింది. కేసీఆర్‌ సర్కారు సహకారంతో సింగరేణి చరిత్రలో లేనివిధంగా అనేక హకులు సాధించి కార్మికుల చేత ప్రశంసలు అందుకున్నది. 2017లో జరిగిన గుర్తింపు కార్మిక సంఘం ఎన్నికల్లోనూ విజయం సాధించింది. 23,845 ఓట్లు సాధించింది. కార్మికులు గత ఎన్నికలకంటే 534 ఎక్కువ ఓట్లతో గెలిపించారు. ఇక ఈ నెల 27న నిర్వహించనున్న గుర్తింపు ఎన్నికల్లోనూ మరోసారి గెలిచేందుకు టీబీజీకేఎస్‌ ఉవ్విళ్లూరుతున్నది. టీబీజీకేఎస్‌ గౌరవ అధ్యక్షురాలు కవిత సూచనలతో నాయకులు హ్యాట్రిక్‌ సాధించాలన్న లక్ష్యంతో ముందుకెళ్తున్నారు.

ఆఖరి రోజు టీబీజీకేఎస్‌ జోరు

సింగరేణి గుర్తింపు కార్మిక సంఘం ఎన్నికల ప్రచారం సోమవారంతో ముగిసింది. పక్షం రోజులుగా శ్రీరాంపూర్‌ ఏరియాలోని గనులు, ఓసీపీలపై బీఆర్‌ఎస్‌ అనుబంధ టీబీజీకేఎస్‌ నాయకులు విస్తృత ప్రచారం చేశారు. ఆఖరి రోజు శ్రీరాంపూర్‌ ఏరియా ఆర్కే 5, 6, 7, వర్కషాప్‌లో సోమవారం టీబీజీకేఎస్‌ నాయకులు జోరుగా ప్రచారం చేశారు. టీబీజీకేస్‌ ఏరియా చర్చల ప్రతినిధి పెట్టం లక్షణ్‌, మాజీ ఉపాధ్యక్షుడు బండి రమేశ్‌, బ్రాంచ్‌ కార్యదర్శి పానగంటి సత్తయ్య, ఆర్గనైజింగ్‌ కార్యదర్శి తొంగల రమేశ్‌, అసిస్టెంట్‌ పిట్‌ కార్యదర్శి సాదుల భాస్కర్‌, వెంకట్‌రెడ్డి, మల్లేశ్‌, రాజునాయక్‌, ప్రసాద్‌, పవణ్‌, లాల్‌లు గనులపై తిరిగి బాణం గుర్తుకు ఓటు వేసి గెలపించాలని కోరారు. సింగరేణి కార్మికులకు కేసీఆర్‌ సర్కారు 20 వేల ఉద్యోగాలు కల్పించిందని, యువ కార్మికులు టీబీజీకేఎస్‌ను గెలిపించి కేసీఆర్‌కు కృతజ్ఞత చాటు కోవాలని కోరారు.

హక్కులు సాధించిన టీబీజీకేఎస్‌ కావాల్నో.. ఉన్న హక్కులు పోగొట్టిన ఏఐటీయూసీ, ఐన్‌టీయూసీ కావాల్నో నిర్ణయించుకోవాలని సూచించారు. వికాస్‌, గోనె స్వామి, గరిగె చేరాలు, సతీష్‌, ప్రశాంత్‌, రాజయ్య, ఉత్తేజ్‌రెడ్డి, హరీశ్‌ పాల్గొన్నారు. ఇక శ్రీరాంపుర్‌ ఏరియా ఆర్కే 7, 7ఏ, ఏరియా వర్కషాప్‌పై మంచిర్యాల ఎమ్మెల్యే ప్రేమ్‌సాగర్‌రావు, ఐఎన్‌టీయూసీ కేంద్ర ఉపాధ్యక్షుడు జే శంకర్‌రావు, కలవేణ శ్యాంకుమార్‌ ప్రచారం నిర్వహించారు. అలాగే ఆర్కే-5గనిపై కేంద్ర నాయకులు కే సురేందర్‌రెడ్డి, ప్రచారం చేశారు. ఐఎన్‌టీయూసీ నాయకులు గరిగె స్వామి, తిరుపతిరెడ్డి పాల్గొన్నారు. సోమవారం ఆర్కే 7గనిపై ఏర్పాటు చేసిన సమావేశంలో హెచ్‌ఎంఎస్‌ ఏరియా ఉపాధ్యక్షుడు తిప్పారుపు సారయ్య మాట్లాడారు.

నాయకులు రాజేంద్రస్రాద్‌, అశోక్‌, నవీణ్‌, నర్సయ్య, బాలయ్య, రమేశ్‌, శ్రీనివాస్‌, తులా అనిల్‌, వెంకటస్వామి పాల్గొన్నారు. శ్రీరాంపూర్‌ ఏరియా ఆర్కే 5గనిపై బీఎంఎస్‌ జాతీయ బొగ్గు గనుల ఇన్‌చార్జి కొత్తకాపు లక్ష్మారెడ్డి ప్రచారం చేశారు. బీఎంఎస్‌ అధ్యక్షుడు యాదగిరి సత్తయ్య, బ్రాంచ్‌ కార్యదర్శి నాతాడి శ్రీధర్‌రెడ్డి, నాయకులు నాగేశ్వర్‌రావు, తిరుపతి, రమేశ్‌, గూడ శ్రీకాంత్‌రెడ్డి, వంశీకృష్ణ, రాజు, మహేశ్‌, రాజేంద్ర, పోతరాజు పాల్గొన్నారు. కాగా, ఎన్నికల్లో గెలుపొందేందుకు కొన్ని సంఘాలు డబ్బులు, మద్యం పంపిణీ చేస్తూ కార్మికులను ప్రలోభాలకు గురిచేయడం మొదలు పెట్టాయి. కార్మిక వర్గానికి కేసీఆర్‌ ప్రభుత్వం సాధించి పెట్టిన కారుణ్య ఉద్యోగాలు, చేపట్టిన సంక్షేమ కార్యక్రమాలు, సౌకర్యాలే తిరిగి టీబీజీకేఎస్‌ను గెలిపిస్తాయని ఆ సంఘం నాయకులు ధీమా వ్యక్తం చేస్తున్నారు.

టీబీజీకేఎస్‌ సాధించిన హక్కులు

• జాతీయ కార్మిక సంఘాలు కాలరాసిన వారసత్వపు ఉద్యోగాల హక్కును కారుణ్యం ద్వారా తీసుకువచ్చింది. 16,000 మందికి ఉద్యోగాలిప్పించింది.
• పెండింగ్‌లో ఉన్న 600 మంది డిపెండెంట్‌లకు తిరిగి ఉద్యోగాలు. l ఎక్స్‌టర్నల్‌ నోటిఫికేషన్ల ద్వారా 4200 మందికి కొత్తగా ఉద్యోగాలు. l 600 మంది డిస్మిస్డ్‌ కార్మికులకు తిరిగి ఉద్యోగాలు. l వికలాంగులకు సర్ఫేస్‌ ఉద్యోగాలు. lలాభాల వాటా 16 శాతం నుంచి 32 శాతానికి పెంపు. సకలజనుల సమ్మె కాలపు వేతనం పంపిణీ.
• తెలంగాణ ఇంక్రిమెంట్‌ l కార్మిక కుటుంబాలకు ఉచితంగా కార్పొరేట్‌ వైద్యం, రూ.10 లక్షల గృహ రుణం, వడ్డీ చెల్లింపు.
• ఉద్యోగం వద్దనుకుంటే డిపెండెంట్‌లకు రూ. 25 లక్షల చెల్లింపు (కోలిండియాలో లేదు) l ఐఐటీ, ఐఐఎంలలో సీటు సాధించిన కార్మికుల పిల్లలకు ట్యూషన్‌ ఫీజు, రీయింబర్స్‌మెంట్‌. l సొంత ఇల్లు ఉండే కార్మికులకు 100 యూనిట్ల విద్యుత్‌ చార్జీల చెల్లింపు.
• కార్మికుల కమ్యూనిటీ హాళ్లకు ఏసీ సౌకర్యం
• గని ప్రమాదంలో మరణించిన కార్మిక కుటుంబానికి రూ. 20 లక్షల మ్యాచింగ్‌ గ్రాంట్‌.
• విధులు, డ్యూటీలో సహజ మరణం పొందిన కార్మిక కుటుంబానికి రూ.20 లక్షల మ్యాచింగ్‌ గ్రాంట్‌.
• రూ. 175 కోట్ల వృత్తి పన్ను బకాయిలు పర్మినెంటుగా రద్దు.
• మహిళలకు ప్రసూతి సెలవులు l పీఎంఈ మస్టర్‌ కల్పన.
• కోలిండియాలో లేనివిధంగా సింగరేణిలో మహిళలకు డిపెండెంట్‌ ఉద్యోగాల్లో అవకాశం l పెళ్లయిన, విడాకులైన, వితంతువు, ఒంటరి మహిళ కూతురు, వితంతువు కోడలుకు కూడా డిపెండెంట్‌ ఉద్యోగాలకు అవకాశం.
• మహిళా కార్మికులకు చైల్డ్‌ కేర్‌ లీవ్‌ రెండేళ్లు.
• సింగరేణి కార్మికుల ఆరోగ్యం, పిల్లల భవిష్యత్తు కోసం రామగుండంలో సింగరేణి మెడికల్‌ కళాశాల ఏర్పాటు. కార్మికుల పిల్లలకు 5 శాతం రిజర్వేషన్‌.
• సింగరేణి ఏరియా ఆసుపత్రి, కొత్తగూడెం కార్పొరేట్‌ ఆసుపత్రిలో సిటీ సాన్‌, ఎంఆర్‌ఐ సాన్‌ ఏర్పాటు.
• 2014 మార్చి 31 వరకు వేచి ఉన్న 3200 మంది డిపెండెంటులందరికీ ఒకేసారి ఉద్యోగాలు
• బేసిక్‌పై 1 శాతం విద్యుత్‌ చార్జీలు రద్దు చేసి ఏసీ పెట్టుకోవడానికి అనుమతి, ఉచిత విద్యుత్‌.
  190/240 మస్టర్‌లు నిండిన సంవత్సరంలోపే బదిలీ వరర్లను జనరల్‌ మజ్దూర్‌గా క్రమబద్ధీకరణ.
• సంస్థలో ఇక ముందు డబుల్‌ బెడ్‌రూమ్‌ క్వార్టర్స్‌ నిర్మించాలని నిర్ణయం. భూపాలపల్లిలో 994, సత్తుపల్లిలో 440 డబుల్‌ బెడ్‌ రూమ్‌ క్వార్టర్ల నిర్మాణం.
• సింగరేణి వ్యాప్తంగా ఏసీ ఫంక్షన్‌ హాళ్లు ఏర్పాటు.
• తెలంగాణ సకళజనుల సమ్మె కాలపు వేతనాలు, ఇంక్రిమెంట్‌ల అందజేత.

టీబీజీకేఎస్‌ గెలిస్తే ..

• కార్మికులకు సొంతింటి కల
• గృహ రుణాలు రూ. 20 లక్షలకు పెంపు
• అలవెన్స్‌లపై ఐటీ రద్దుకు హామీ
• డిపెండెంట్‌ ఉద్యోగానికి వయసు పరిమితి 35 నుంచి 40కు పెంపు.
• కార్మికుల పేర్లలో తప్పుల సవరణ
• విజిలెన్స్‌ వల్ల పెండింగ్‌లో ఉన్న డిపెండెంట్లకు నిర్ణీత సమయంలో ఉద్యోగాలు
• కేంద్ర ప్రభుత్వ బొగ్గు గనుల ప్రైవేటీకరణకు వ్యతిరేకం
• సింగరేణి ఆధ్వర్యంలో సూపర్‌ స్పెషాలిటీ హాస్పిటళ్ల ఏర్పాటు
• సింగరేణి కార్మికుల నివాసాలకు రక్షిత మంచినీటి (ఆర్‌ఓ)ప్లాంట్ల దారా సరఫరా
• బొగ్గు గనుల వేలంలో సింగరేణి యాజమాన్యం కూడా పాల్గొనేలా కృషి
• ప్లేడే పీహెచ్‌డీ విషయంలో ఎన్‌-1 విధానం రద్దు
• మైనింగ్‌ స్టాఫ్‌, ఈఅండ్‌ఎం సూపర్‌వైజర్స్‌, ట్రేడ్స్‌మెన్‌, ఈపీ ఆపరేటర్స్‌, ఎంవీ డ్రైవర్స్‌, మెడికల్‌ అన్‌ఫిట్‌ అయితే వారికి సర్ఫేస్‌లో సూటబుల్‌ ఉద్యోగం.