ప్రతి పనికో రేటు అవినీతి బల్దియా

నిర్మల్‌ జిల్లా కేంద్రంలోని మున్సిపల్‌ కార్యాలయం అవినీతికి కేరాఫ్‌గా మారింది. ప్రతి పనికి ఓ రేటు కట్టి మరీ పైసలు వసూలు చేస్తున్నారు. కార్యాలయం చుట్టూ చెప్పులు అరిగేలా తిరిగినా పని కావడం లేదు.

• లంచాలకు కేరాఫ్‌గా నిర్మల్‌ మున్సిపాలిటీ
• వరుస ఘటనలు జరుగుతున్న మారని తీరు
• పట్టుబడుతున్న అవినీతి అధికారులు
• ప్రజల్లో వెల్లివిరుస్తున్న చైతన్యం
• లంచం అడిగితే 94404 46106 కాల్‌ చేయండి..

నిర్మల్‌ అర్బన్‌, జూన్‌ 10 ః నిర్మల్‌ జిల్లా కేంద్రంలోని మున్సిపల్‌ కార్యాలయం అవినీతికి కేరాఫ్‌గా మారింది. ప్రతి పనికి ఓ రేటు కట్టి మరీ పైసలు వసూలు చేస్తున్నారు. కార్యాలయం చుట్టూ చెప్పులు అరిగేలా తిరిగినా పని కావడం లేదు. దీంతో కొందరు పైసలు ఇస్తూ పనులు చేయించుకుంటుండగా.. మరీ కొందరు అవినీతి అధికారుల భరతం పడుతున్నారు.

అవినీతి నిరోదక శాఖ(ఏసీబీ)ను ఆశ్రయిస్తూ పట్టిస్తున్నారు. ఏసీబీ దాడుల్లో అత్యధికంగా మున్సిపల్‌ కార్యాలయం సిబ్బంది ఉండడం.. ఇందులో రెవెన్యూ శాఖలోనే పట్టుబడడం విమర్శలకు తావిస్తున్నది. కాగా.. ప్రభుత్వ ఉద్యోగులు ప్రజలకు కావాల్సిన పనులు చేయాలి. ఇందుకోసం సర్కారు వారికి జీతాలు చెల్లిస్తున్నది. అవినీతికి అలవాటు పడిన అధికారులు లంచాల పేరిట సామాన్యులను వేధిస్తున్నారు. పైసలు ఇవ్వనిదే పని చేయడం లేదనే ఆరోపణలు ఉన్నాయి. సాధారణంగా పనిని బట్టి మూడు, ఐదు, ఏడు, 15 రోజుల్లో పనులు పూర్తి చేయాలి. కాగా.. అధికారులు లంచం అడిగితే 94404 46106 నంబర్‌కు సమాచారం అందించాలని ఏసీబీ డీఎస్పీ విజయ్‌కుమార్‌ తెలిపారు.

జిల్లాలో ఘటనలు..

తాజాగా నిర్మల్‌ మున్సిపల్‌ కార్యాలయంలోని రెవెన్యూ విభాగంపై ఏసీబీ అధికారులు దాడులు చేశారు. నూతనంగా ఇంటి నిర్మాణం చేస్తున్న యజమానికి ఇంటి నంబర్‌ జారీ చేయాల్సి ఉండగా.. అధికారులు లంచం అడిగారు. సీనియర్‌ అసిస్టెంట్‌గా విధులు నిర్వహిస్తున్న ఇన్‌చార్జి ఆర్‌ఐ సంతోష్‌, ఔట్‌ సోర్సింగ్‌ విభాగంలో బిల్‌ కలెక్టర్‌గా విధులు నిర్వహిస్తున్న షోయబ్‌లు రూ.6 వేలు లంచం అడుగగా ఏసీబీని ఆశ్రయించి ఇద్దరిని పట్టించాడు.

• నిర్మల్‌ మున్సిపాల్టీలో జూనియర్‌ అసిస్టెంట్‌గా విధులు నిర్వహిస్తున్న షాకీర్‌ ఖాన్‌ సర్వీస్‌ బుక్‌లో వివరాలు నమోదు చేసేందుకు బిల్‌ కలెక్టర్‌ నుంచి రూ.10 వేలు లంచం తీసుకుంటుండగా పట్టుబడ్డాడు.
• జనవరి 25న నిర్మల్‌ మున్సిపల్‌ కార్యాలయంలో ఆర్వో గంగాధర్‌, బిల్‌ కలెక్టర్‌ నవంత్‌ ఇంటి అసిస్‌మెంట్‌కు రూ.3500 తీసుకుంటుండగా ఏసీబీ అధికారులు పట్టుకున్నారు.
• దడువాయి (వే మాన్‌) లైసెన్స్‌ కోసం మార్కెటింగ్‌ శాఖ జిల్లా అధికారి తంగిడిపల్లి శ్రీనివాస్‌ రూ.7 వేలు లంచం తీసుకుంటుండగా పట్టుబడ్డారు.
  ల్యాండ్‌ అండ్‌ సర్వే కార్యాలయంలో విధులు నిర్వహిస్తున్న జూనియర్‌ అసిస్టెంట్‌ జగదీష్‌, అటెండర్‌ ప్రశాంత్‌లు సల్లా హరీశ్‌ నుంచి సేత్వార్‌ కోసం రూ.10 వేలు లంచం తీసుకుంటుండగా పట్టుబడ్డారు.
• 2024 జనవరి 10న కడెం తహసీల్దార్‌ రాజేశ్వరి, డిప్యూటీ తహసీల్దార్‌ చిన్నయ్యలు గిఫ్ట్‌ డీడీకి రూ.9 వేలు లంచం ఇస్తుండగా పట్టుబడ్డారు.