కామోల్.. గ్రామం అభివృద్ధికి కేరాఫ్గా నిలుస్తున్నది. ఉమ్మడి రాష్ట్రంలో అసౌకర్యాల నడుమ కొట్టుమిట్టాడిన ఈ పల్లె.. తెలంగాణ ఏర్పాటు తర్వాత సీఎం కేసీఆర్ నేతృత్వంలో అభివృద్ధిలో దూసుకుపోతున్నది. అన్ని రకాల నిధులను సక్రమంగా సద్వినియోగం చేసుకుంటూ ఆదర్శంగా నిలుస్తున్నది. ఎటు చూసినా అన్ని రకాల పనులు పూర్తిచేసుకున్న ఈ పంచాయతీ.. తన రూపురేఖలన్నీ మార్చుకున్నది. ఇంటింటా ఏదో ఒక సంక్షేమ పథకం అందుతుండగా, సర్వత్రా హర్షం వ్యక్తమవుతున్నది.
– భైంసాటౌన్, జనవరి 2
ఎమ్మెల్యే సహకారంతో అభివృద్ధి..
మా గ్రామంలో ఎప్పుడూ లేని విధంగా ఎమ్మెల్యే విఠల్ రెడ్డి సహకారంతో అభివృద్ధి జరిగింది. గ్రామంలో ఏ సమస్య వచ్చినా ఆయన దృష్టికి తీసుకెళ్తే పరిష్కరిస్తున్నారు. నిధులు మంజూరు చేసి పనులు పూర్తి చేయించారు. గ్రామాన్ని మరింత అభివృద్ధి చేసుకుంటాం. పల్లె ప్రగతి కార్యక్రమాన్ని సీఎం కేసీఆర్ పకడ్బందీగా అమలు చేయడంతో, వార్డు సభ్యుల సహకారంతో గ్రామాన్ని ఆదర్శంగా తీర్చిదిద్దాం.గ్రామాభివృద్ధే లక్ష్యంగా ముందుకెల్తున్నాం. పారిశుధ్య కార్యక్రమాలు సక్రమంగా చేపట్టేలా చర్యలు తీసుకుంటున్నాం.
– ముత్తవ్వ, సర్పంచ్, కామోల్
అన్ని సౌకర్యాలు కల్పించారు..
గతంలో మా గ్రామాన్ని అభివృద్ధి చేస్తామని ఓట్లు వేయించుకున్న నాయకులు గెలిచిన తర్వాత మా వంక కూడా చూడలేదు. తెలంగాణ ప్రభుత్వంలో సర్పంచ్, ఎమ్మెల్యే మా గ్రామాన్ని బ్రహ్మాండంగా అభివృద్ధి చేశారు. అన్ని సౌకర్యాలు కల్పించారు. తెలంగాణ ప్రభుత్వానికి, ఎమ్మెల్యేకు కృతజ్ఞతలు. వర్షం పడితే మొత్తం బురదమయమయ్యేది. సీసీ రోడ్లు ఏర్పాటు చేయడంతో ఇబ్బందులు తప్పాయి. శ్మశానవాటిక, స్నానాలు చేసేందుకు వేర్వేరు గదులు నిర్మించారు. దీంతో ఏళ్ల నుంచి పడుతున్న ఇబ్బందులు తప్పాయి.
– విఠల్, గ్రామస్తుడు, కామోల్