కాల్చొద్దు.. కలియదున్నాలి

యాసంగి వరి కోతలు ముగిశాయి. వానకాలం సాగు సన్నద్ధతలో భాగంగా పొలాల్లోని గడ్డికి, వ్యర్థ్యాలకు నిప్పంటిస్తుండడం ప్రమాదాలకు దారి తీస్తోంది. అవగాహన లోపంతో రైతులు కొయ్యలను కాల్చడం వల్ల తీవ్ర నష్టం వాటిల్లుతున్నది. భూసారం దెబ్బతిని దిగుబడులపై ప్రభావం చూపుతున్నది. పంట భూమిలో వరి కొయ్యలకు నిప్పుపెట్టడం వలన అనేక అనర్థాలు ఉన్నాయి.

• వరి కొయ్యలకు నిప్పు పెడితే అన్ని విధాలా నష్టం
• గడ్డిని సేంద్రియ ఎరువుగా మారిస్తే సిరుల పంట
• రైతులకు వ్యవసాయ అధికారుల సూచన

దస్తురాబాద్‌, జూన్‌ 8: యాసంగి వరి కోతలు ముగిశాయి. వానకాలం సాగు సన్నద్ధతలో భాగంగా పొలాల్లోని గడ్డికి, వ్యర్థ్యాలకు నిప్పంటిస్తుండడం ప్రమాదాలకు దారి తీస్తోంది. అవగాహన లోపంతో రైతులు కొయ్యలను కాల్చడం వల్ల తీవ్ర నష్టం వాటిల్లుతున్నది. భూసారం దెబ్బతిని దిగుబడులపై ప్రభావం చూపుతున్నది. పంట భూమిలో వరి కొయ్యలకు నిప్పుపెట్టడం వలన అనేక అనర్థాలు ఉన్నాయి. పొలం మడుల్లో మిగిలిపోయిన వరి కొయ్యలను కలియదున్నడానికి బదులు నిప్పుపెడుతున్నారు. దీంతో పర్యావరణ కలుషితం, నేలను సారవంతం చేసే జీవులు నశించిపోవడం, పంట దిగుబడిలో మార్పు వంటి దుష్ఫరిమాలు కలిగే అవకాశాలు ఉన్నాయి. ప్రధానంగా భూసారం దెబ్బతింటుంది. నేలను కాపాడుకోవాలంటే వరి కొయ్యలను కాల్చొద్దు .సేంద్రియ ఎరువుగా మలుచుకుంటే రైతులకు ఎంతో మేలు జరుగుతుంది. కలియదున్నడంతో ఎన్నో ప్రయోజనాలు ఉన్నాయని, ఈ సమయంలో రైతులు ప్రత్యామ్నాయ పద్ధతులు పాటించాలని వ్యవసాయశాఖ అధికారులు సూచిస్తున్నారు.

అవగాహనతోనే ప్రయోజనం

పొలాల్లో గడ్డికి నిప్పంటించడం వల్ల భూమి భౌతిక స్థితి దెబ్బతింటుంది. పంట ఆరోగ్యంగా ఎదిగేందుకు దోహదపడే సేంద్రియ కర్బనం, నత్రజని, సూక్ష్మ పోషకాలు పూర్తిగా నశించిపోతాయి. వరి, పత్తి, మక్క తదితర పంటల కోతల అనంతరం పొలంలో మిగిలిపోయే పంట కొయ్యలను కాల్చడం ద్వారా రైతులు స్వయంగా నష్టపోవడమే కాకుండా వాతావరణ కాలుష్యం ఏర్పడుతుంది.

• కాల్చిన చోట భూమి సేంద్రియ పదార్థం కోల్పోతుంది. అత్యంత కీలకమైన సూక్ష్మ జీవరాసులు, శిలీంధ్రాల సంతతి నశింపోతాయి. భూమి సేంద్రియ లక్షణాలు నాననమవుతాయి.
• వరి గడ్డి, ఇతర వ్యర్థాలు కాలుస్తుండడంతో కార్బన్‌ మోనాక్సైడ్‌ విడుదలవుతుంది. పంపు సెట్లు, విద్యుత్‌ తీగలు, పైపులైన్లు దగ్ధం అవుతాయి. పొగతో శ్వాసకోశ ఇబ్బందులు తలెత్తడంతోపాటు పర్యావరణం దెబ్బతింటుంది.
• వరి కొయ్యలను నేలలో కలియదున్నడం వల్ల కర్బన శాతం పెరిగి దిగుడులు వచ్చే అవకాశం ఉంది.
• దుక్కి దున్నే సమయంలో సూపర్‌ ఫాస్పేట్‌ చల్లితే అవశేషాలు రెండు వారాల్లో మురిగి పోషకాలు అందుబాటులోకి వస్తాయి. ఫలితంగా డీఏపీ వాడకం సగం వరకు తగ్గుతుంది.
• కలియదున్నితే ఎకరాకు దాదాపు ఒక టన్ను ఎరువు తయారువుతుంది. మొక్కలకు నత్రజని (యూరియా), ఫాస్ఫరస్‌ అదనంగా అందజేస్తుంది.
• జింక్‌, మాంగనీస్‌, ఇనుము, కాల్షియం లాంటి సూక్ష్మధాతువులు పంటకు మేలు చేకూర్చుతాయి.
• నేలలో కరగని మూలకాలను అనుకూలంగా మార్చుకొని, నీటి నిల్వ పెంచుతుంది.

పంట దిగుబడులపై తీవ్ర ప్రభావం

పంట వ్యర్థాలు భూమిలో కలియదున్నితే భూమి సారవంతంగా మారుతుంది. చాలా మంది రైతులు వరి పంటను కోసిన తరువాత కొయ్యలను కాల్చివేస్తుంటారు. ఇది పర్యావణం, మానవాళికి అత్యంతమైన ముప్పు. నేల పొరల్లో ఉన్న తేమ శాతం తగ్గి పంట దిగుబడులపై తీవ్ర ప్రభావం చూపుతుంది. అత్యంత కీలకమైన సూక్ష్మ జీవరాసులు, శిలీంధ్రాల సంతతి నశింపోతుంది, భూమి సేంద్రియ లక్షణాలు నాశానమవుతాయి.వరి కొయ్యాలను తగలబెట్టకుండా భూమిలోనే కలియదున్నితే వాటిలోని పోషకాలు తిరిగి భూమిలోకి చేరుతాయి.

-జాడి తిరుపతి, ఏఈవో, దస్తురాబాద్‌ క్లస్టర్‌