దేశంలో విద్యారంగ ప్ర‌క్షాళ‌న కేసీఆర్ తోనే సాధ్యం

కేంద్రంలోని బీజేపీ సర్కారు హయాంలో అంతర్జాతీయంగా మంటగలుస్తున్న దేశ పరువు నిలువాలన్నా.. విశ్వవేదికలపై మన ప్రతిష్ట పెరగాలన్నా.. విద్యతోనే సాధ్యమవుతుంది.

• రోల్‌మోడల్‌గా తెలంగాణ గురుకులాలు
• ఇంగ్లిష్‌ మీడియం బోధన, డిజిటల్‌ తరగతులు
• ‘మన ఊరు.. మన బడి’తో బళ్లకు కొత్త హంగులు
• ఉపాధ్యాయులకు రెండు సార్లు పీఆర్సీ, తెలంగాణ ఇంక్రిమెంట్‌
• దేశంలో అందుకు భిన్నంగా పరిస్థితి
• బీజేపీ హయాంలో విద్యావ్యవస్థ అధోగతి
• కేసీఆర్‌ జాతీయ రాజకీయాలోకి వెళ్తేనే సమూల మార్పులు
• స్పష్టం చేస్తున్న ఉపాధ్యాయులు, విద్యారంగ నిపుణులు

కేంద్రంలోని బీజేపీ సర్కారు హయాంలో అంతర్జాతీయంగా మంటగలుస్తున్న దేశ పరువు నిలువాలన్నా.. విశ్వవేదికలపై మన ప్రతిష్ట పెరగాలన్నా.. విద్యతోనే సాధ్యమవుతుంది. అందుకోసం దేశ విద్యారంగం ప్రక్షాళన జరగాల్సిన ఆవశ్యకత ఎంతైనా ఉన్నది. విద్యావ్యవస్థపై పూర్తి అవగాహన ఉజ్వల భారత్‌కు ఏదైనా చేయాలనే సంకల్ప బలం ఉన్న నాయకుడు కేసీఆర్‌తోనే అవుతుందని ఉపాధ్యాయులు, సంఘాల నాయకులు ముక్తకంఠంతో చెబుతున్నారు. వినూత్న సంస్కరణలు తేవడంతోపాటు బోధించే ఉపాధ్యాయులు, అధ్యాపకులకు ప్రోత్సాహం అందిస్తే దేశం ప్రగతి పథంలో ముందుకెళ్తుందని, ఇది జరగాలంటే తెలంగాణలో ముఖ్యమంత్రి చేస్తున్న కృషి దేశవ్యాప్తం కావాలని పేర్కొంటున్నారు. కార్పొరేట్‌ తరహాలో ఏర్పాటు చేసిన గురుకులాలు, ప్రాథమిక విద్యారంగంలో మౌలిక సదుపాయాల కోసం ప్రారంభించిన ‘మన ఊరు-మన బడి’, ప్రాథమిక స్థాయి నుంచి ఇంగ్లిష్‌ మీడియం, డిజిటల్‌ బోధన, కొత్త జోనల్‌ వ్యవస్థ.. వంటి విప్లవాత్మక మార్పులు ఉజ్వల భారత్‌ నిర్మాణానికి అవసరమన్న అభిప్రాయాలు వ్యక్తం చేస్తున్నారు.

కరీంనగర్‌ ప్రతినిధి/నిర్మల్‌, సెప్టెంబర్‌ 12 (నమస్తే తెలంగాణ): ఎనిమిదేండ్ల పాలనలో సంక్షేమం, సాగునీరు, విద్యుత్‌ రంగాలల్లో వినూత్న సంస్కరణలకు శ్రీకారం చుట్టడమే కాకుండా.. విద్యారంగంలో పెను మార్పులు చేపట్టిన ఘనత సీఎం కేసీఆర్‌కే దక్కుతుంది. అన్ని వర్గాల పేద బిడ్డలకు కార్పొరేట్‌ విద్యను అందించాలన్న లక్ష్యంతో గురుకులాలను నెలకొల్పగా.. భారీ స్పందన వస్తుండడంతో యేటా పెంచుతూ పోతున్నారు. ఒక్కో విద్యార్థిపై రాష్ట్ర సర్కారు రూ.1.25 లక్షలు ఖర్చు చేస్తున్నది. విద్యారంగంలో గురుకులాలు కొత్త చరిత్రకు నాంది పలికాయన్న అభిప్రాయాలు సర్వత్రా వ్యక్తం అవుతున్నాయి. ప్రైవేట్‌ బాట వీడి గురుకులాల్లో చాలా మంది విద్యార్థులు చేరుతున్నారంటే.. వీటిని ఏ స్థాయిలో అభివృద్ధి పర్చారో అర్థం చేసుకోవచ్చు. ఉమ్మడి ఆదిలాబాద్‌ జిల్లాలో ఎస్సీ, ఎస్టీ, బీసీ, మైనార్టీ గురుకులాలు ఉండగా.. వేలాది మంది విద్యను అభ్యసిస్తూ లబ్ధి పొందుతున్నారు.

• ప్రపంచీకరణకు అనుగుణంగా డిజిటల్‌ తరగతులు అమలులోకి తెచ్చిన కేసీఆర్‌ సర్కారు.. ఈ యేడాది మరో విప్లవాత్మక నిర్ణయం తీసుకున్నది. 1-8 తరగతుల వరకు ఇంగ్లిష్‌ మీడియం ప్రవేశపెట్టారు. ఫలితంగా లక్షలాది మంది విద్యార్థులకు ఆంగ్ల మాద్యమం అందే అవకాశం ఉంది.
• విద్యారంగాన్ని పటిష్టం చేయాలంటే క్షేత్రస్థాయిలో మౌలిక వసతులు కల్పించాలని నిర్ణయించింది. ఇందుకోసం ఈ ఏడాది నుంచే ‘మన ఊరు-మన బడి’ కార్యక్రమాన్ని అమలు చేస్తున్నది. ఈ పథకం కింద మౌలిక వసతుల కోసం రూ.7,289 కోట్లు కేటాయించింది. ప్రాథమిక విద్యారంగంలో ఇదో మైలురాయిలా నిలిచింది.
• సీఎం కేసీఆర్‌ కేంద్రంపై పోరాడి కొత్త జోనల్‌ వ్యవస్థను అమల్లోకి తెచ్చారు. దీని ద్వారా.. స్థానికేతర కోటాకు భారీగా కోత పడి స్థానికులకే ఉద్యోగావకాశాలు లభిస్తున్నాయి. ఈ విషయంలో ముఖ్యమంత్రి కేసీఆర్‌ తీసుకున్న నిర్ణయం దేశవ్యాప్తంగా ప్రశంసలు అందుకుంది. పాత జోనల్‌ విధానం ప్రకారం జిల్లా కేడర్‌లో 80:20 శాతం, జోనల్‌ కేడర్‌లో 70:30 శాతం, బహుళ జోన్‌లో 60:40 శాతం రిజర్వేషన్లు అమలయ్యాయి. కొత్త విధానం ద్వారా జిల్లా, జోనల్‌, బహుళ జోన్‌ పరిధిలో జరిగే ప్రత్యక్ష నియామకాల్లో ఇక ముందు 95 శాతం పోస్టులు స్థానికులకే దక్కే విధంగా ముఖ్యమంత్రి అమల్లోకి తెచ్చిన జోనల్‌ వ్యవస్థ ద్వారా ఉద్యోగావకాశాలు పెరిగాయి. దీని ద్వారా శాస్త్రీయంగా ఉద్యోగాల భర్తీతోపాటుగా, బదిలీలు, పదోన్నతులు జరిగేందుకు మార్గం సుగమం అయింది. తాజాగా 80 వేల పైచిలుకు ఉద్యోగాలు భర్తీ చేయడానికి ప్రభుత్వం సన్నాహాలు చేస్తూ.. ఇప్పటికే పలు నోటిఫికేషన్లు విడుదల చేసింది. కొత్త జోనల్‌ వ్యవస్థ అమల్లోకి రావడం వల్ల కొత్త పోస్టుల్లో ఉమ్మడి జిల్లావాసులకు సుమారు 10 వేలకు పైగా ఉద్యోగాలు వస్తాయన్న అంచనాలున్నాయి.
• మౌలిక వసతులు కల్పించడం, బోధకులకు వేతనంతోపాటు అన్ని రకాల సౌకర్యాలు కల్పించినపుడే ఆశించిన ఫలితాలు వస్తాయని కేసీఆర్‌ నమ్మారు. ఇందులో భాగంగానే.. ఉపాధ్యాయులు, ఉద్యోగులకు రెండు సార్లు పీఆర్సీ, తెలంగాణ ఇంక్రిమెంట్‌, కాలానికి అనుగుణంగా డీఏ, నూతన జోనల్‌ విధానం ప్రకారం శాస్త్రీయబద్ధంగా 317 జీవో ప్రకారం బదిలీ కార్యక్రమాలు నిర్వహించారు. దీనివల్ల ఇతర రాష్ర్టాలతో పోల్చితే తెలంగాణ ఉద్యోగుల, ఉపాధ్యాయుల వేతనాలు అధికం అయ్యాయి. ఈ ఘనత కేసీఆర్‌కే దక్కుతుందని పలువురు చర్చించుకుంటున్నారు.
• స్వరాష్ట్రం ఏర్పడిన తదుపరి ముందుగా.. వ్యవసాయం, సాగునీరు, విద్యుత్‌ రంగానికి అధిక ప్రాధాన్యత ఇచ్చారు. ఇక విద్యా, వైద్యంపై దృష్టిపెట్టి పలు సంస్కరణలు చేయాలని ముఖ్యమంత్రి కేసీఆర్‌ పలు మార్లు ప్రకటించారు. అన్నట్లుగానే.. సంస్కరణలు, పథకాలు పెడుతూ ముందుకెళ్తున్నారు. సమైక్య రాష్ట్రంతో పోల్చితే విద్యారంగం మూడు పూలు ఆరు కాయలుగా వర్ధిల్లుతోంది. కానీ.. దేశంలో మాత్రం విద్యారంగం తిరోగమనంలో ఉంది.యేటా విద్యారంగానికి బడ్జెట్‌లో కోతలు పెడుతూ వస్తున్నారు. అంతేకాదు.. సర్వశిక్ష అభియాన్‌ వంటి పథకాలకు చరమగీతం పాడారు. సరికొత్త పథకాలను అమల్లోకి తేవడం లేదు. ఈ నేపథ్యంతో దేశం ప్రగతి పథంలో నడువాలన్నా.. మత విద్వేషాల వంటివి పోవాలన్నా.. అది విద్య ద్వారా మాత్రమే సాధ్యమవుతుందన్న అభిప్రాయాలు వ్యక్తం అవుతున్నయి. దేశం ఎదుర్కొంటున్న సంక్లిష్ట పరిస్థితుల్లో బీజేపీ సర్కారుకు విద్యారంగంపై చిన్నచూపు ఉందని, ఈ రంగం ప్రక్షాళన కావాలంటే.. జాతీయ రాజకీయాల్లో పెనుమార్పులు రావాలని, అది కేసీఆర్‌ లాంటి వ్యక్తి ద్వారా మాత్రమే సాధ్యమవుతుందంటున్నారు ఉపాధ్యాయులు, ఉపాధ్యాయ సంఘాలు. తక్కువ కాలంలో తెలంగాణలో అమలు చేసిన పథకాలు.. దేశవ్యాప్తంగా అమలు చేస్తే విద్యారంగంలో కొత్త శకం ఆవిష్కృతం అవుతుందన్న అభిప్రాయాలు వ్యక్తం చేశారు.

ఆ శక్తి కేసీఆర్‌కే ఉంది..

ఎదులాపురం, సెప్టెంబర్‌ 12: పాలన గాడి తప్పినపుడు సామాన్యులు, మేధావులు సహజంగానే మార్పు ఆశిస్తారు. దేశంలో ధరల భారం సామాన్యుడు మోయలేక పోతున్నాడు. జాతీయ స్థాయిలో రాజకీయాలు పరాకాష్టకు చేరాయి. రాష్ర్టాలతో సమన్వయం లేకుండా ఎన్నో ఇబ్బందులు పెడుతున్నారు. ప్రస్తుతం ఉన్న పరిస్థితుల్లో జాతీయ రాజకీయాల్లోకి సమర్థులు రావడం అనేది అవసరం. కేసీఆర్‌ లాంటి విజన్‌ ఉన్న నాయకుడు జాతీయ రాజకీయాల్లోకి వెళ్తే దేశమంతటికీ ఆయన ఉపయోగపడు తారు.. రాష్ట్రంలో సర్కారు బడులకు వెలుగు వచ్చిన మాట నిజం. మా ప్రాథమికోన్నత పాఠశాలలోనే 200 మంది విద్యార్థులు చదువుతున్నారు. మన ఊరు మన బడి ప్రణాళిక అమలుతో ఫలితాలు మంచిగ వచ్చాయి. ఏదేమైనా ఉజ్వల భారత భవిష్యత్‌ కోసం తెలం గాణ నుంచి ఒక మంచి నాయకుడు కేంద్రంలో పాగా వేస్తే మనకు అంతకన్నా శుభం ఏముంటది. సామాన్యుడికి, రైతులకు ఏం చేయాల్నో కేసీఆర్‌కు తెలిసినంతగా ఏ నాయకుడికి తెలియదు. రానున్న రోజుల్లో జాతీయ రాజకీయాల్లో పెను మార్పు తప్పదు. దక్షణా ది రాష్ర్టాలు సత్తా చాటాలంటే ఇదే మంచి సమయం. తెలంగాణ ప్రజలతో పాటు దేశ ప్రజలందరి ఆశీస్సులు సీఎం కేసీఆర్‌కు ఉంటాయి. దేశంలో మార్పు తీసుకొచ్చే శక్తి కేసీఆర్‌కే ఉంది.
– శ్రీకాంత్‌ ,హెచ్‌ఎం,( టీయూటీఎఫ్‌ జిల్లా అధ్యక్షుడు),అంతర్గాం, యూపీఎస్‌, భీంపూర్‌ మండలం

యావత్‌ ప్రజానీకం ఎదురుచూస్తున్నది

కోటపల్లి, సెప్టెంబర్‌ 12 : తెలంగాణ రాష్ర్టాన్ని దేశంలోనే తిరుగులేని శక్తిగా తయారు చేసిన సీఎం కేసీఆర్‌ దేశ రాజకీయాల్లోకి వెళ్లాల్సిన అవసరముంది. ఇందుకోసం యావత్‌ దేశ ప్రజానీకం ఎదురు చూస్తున్నది. వ్యవసాయం విద్య, వైద్యం రంగాల్లో పెను మార్పులు తీసుకువచ్చిన కేసీఆర్‌ దేశ రాజకీయాల్లోకి వెళ్లడాన్ని ప్రతి ఒక్కరూ స్వాగతిస్తున్నారు. మన రాష్ట్రంలో అమలవుతున్న సంక్షేమం పథకాలను పొరుగు రాష్ర్టాల ప్రజలు కూడా కోరుకుంటున్నారు. చిన్న జిల్లాలతో పాలన సులభతరం అవుతుందనే ఉద్దేశంతో 10 జిల్లాలను 33 జిల్లాలుగా వీకేంద్రికరించి సక్సెస్‌ సాధించారు. అలాంటి ముఖ్యమంత్రి ప్రధాని అయితే దేశంలో మరిన్ని కొత్త రాష్ర్టాలు ఏర్పడడం ఖాయం. రైతుబంధు, కల్యాణలక్ష్మి, ఆసరా పింఛన్లు, రైతుబీమా, కేసీఆర్‌ కిట్‌, గొర్రెల పంపిణీ, వ్యవపాయానికి ఉచిత విద్యుత్‌, మిషన్‌ భగీరథ, మిషన్‌ కాకతీయ, నూతన గురుకులాల ఏర్పాటులాంటివి దేశవ్యాప్తంగా అమలు కావాలంటే కేసీఆర్‌ తప్పనిసరిగా దేశ రాజకీయాలకు వెళ్లాలి.
– అంజన్‌కుమార్‌, ఉపాధ్యాయుడు, కోటపల్లి

ఆత్మగౌరవం పెంచిన ధీశాలి కేసీఆర్‌

నిర్మల్‌,సెప్టెంబర్‌ 12 (నమస్తే తెలంగాణ): నీళ్లు, నిధులు, నియామకాల కోసం పోరాడి సాధించుకున్న తెలంగాణను బంగారు తెలంగాణగా మార్చిన ఘనత ముమ్మాటికీ సీఎం కేసీఆర్‌కే దక్కుతుంది. ఆయన తెలంగాణ ఆత్మగౌరవాన్ని పెంచిన ధీశాలి. అసాధ్యమనుకున్న కాళేశ్వరం ప్రాజెక్టును ప్రపంచంలోనే ఉన్నతంగా నిర్మించి రైతురాజ్యం స్థాపించిన కార్యశీలి కేసీఆర్‌. రాష్ట్రంలోని అన్ని వర్గాలకు ప్రాధాన్యతనిస్తూ అనేక సంక్షేమ పథకాలను అమలు చేసి చూపుతున్న దార్శనికుడు సీఎం కేసీఆర్‌. మన రాష్ట్రంలోని అనేక పథకాలను ఇతర రాష్ర్టాలే కాకుండా కేంద్రంలోని బీజేపీ ప్రభుత్వం కూడా కాపీ కొడుతున్నది. ఇలాంటి సందర్భంలో ప్రజల అభివృద్ధిపై పరిపూర్ణ అవగాహన ఉన్న నేత కేసీఆర్‌ జాతీయ రాజకీయాల్లోకి రావాలి. అన్ని వర్గాల ప్రజలు ఆయన్ను స్వాగతిస్తున్నారు. రానున్న రోజుల్లో దేశ రాజకీయాల్లో తెలంగాణ కీలక పాత్ర పోషించబోతున్నది.
-గంగుల చిన్నన్న, ఉపాధ్యాయుడు, తానూర్‌

కేసీఆర్‌ జాతీయ రాజకీయాల్లోకి రావాలి..

నిర్మల్‌,సెప్టెంబర్‌ 12(నమస్తే తెలంగాణ):దేశంలో మతసామరస్యం వర్ధిల్లాలన్నా , ఆమెరికా, చైనా దేశాల మాదిరిగా మన దేశం కూడా అభివృద్ధి చెందాలన్నా సీఎం కేసీఆర్‌ లాంటి నాయకులు జాతీయ రాజకీయాల్లోకి రావాల్సిన అవసరం ఎంతైనా ఉంది. తెలంగాణ ఉద్యమ సమయంలో కేసీఆర్‌ను ఎందరో మాటలతో అవమానించినప్పటికీ అవేమి పట్టించుకోకుండా పట్టు వదలని విక్రమార్కుడిలా ప్రత్యేక రాష్ర్టాన్ని సాధించారు. ఆమరణ నిరాహార దీక్షతో ప్రత్యేక తెలంగాణ తెచ్చారు. సాధించుకున్న తెలంగాణలో అభివృద్ధి, సంక్షేమ కార్యక్రమాలను పెద్ద ఎత్తున అమలు చేసి దేశంలోనే మన రాష్ర్టాన్ని అగ్ర భాగాన నిలిపారు. తెలంగాణ మాదిరిగా భారతదేశం కూడా అన్ని రంగాల్లో అభివృద్ధి చెందాలంటే కేసీఆర్‌ లాంటి విజన్‌ ఉన్న నాయకుడు దేశ ప్రధాని కావాల్సిన అవసరం ఉంది. తెలంగాణ సమాజం అంతా ఆయనకు అండగా ఉంటుంది. ఆయన జాతీయ రాజకీయాల్లో రాణిస్తారనే నమ్మకం నాకు ఉంది.
-జీ చంద్రశేఖర్‌, తెలంగాణ టీచర్స్‌ యూనియన్‌ జిల్లా అధ్యక్షుడు, నిర్మల్‌

ఉద్యోగులు కూడా లబ్ధి పొందాలి…

నిర్మల్‌,సెప్టెంబర్‌ 12(నమస్తే తెలంగాణ):సీఎం కేసీఆర్‌ నాయకత్వంలో రాష్ట్రంలోని పాఠశాలల్లో విద్యార్థులకు పౌష్టికాహారంతోపాటు గుణాత్మకమైన విద్య అందుతున్నది. గతంలో కంటే ఇప్పుడు చాలా వరకు మౌలిక సదుపాయాలు మెరుగుపడ్డాయి. తెలంగాణ రాకముందు మా జీతం కేవలం రూ.15 వేలు ఉండే. రాష్ట్రం ఏర్పడిన తర్వాత రెండు సార్లు జీతాలు పెంచారు. ప్రస్తుతం రూ.32,500 తీసుకుంటున్నాం. మాలాగే దేశంలోని ఉద్యోగులు కూడా బాగుపడాలంటే కేసీఆర్‌ దేశ రాజకీయాల్లోకి రావాలి. ప్రధాని కావాలి. దేశమంతా ఆయన పాలనను ఇప్పటికే మెచ్చుకుంటున్నది. రైతులు బ్రహ్మరథం పడుతున్నారు. నాకు తెలిసి కేసీఆర్‌ కంటే మంచి నాయకుడు దేశ రాజకీయాల్లో లేడు. తెలంగాణను సస్యశ్యామలం చేసినట్లే దేశం మొత్తానికి మంచి చేస్తారనే నమ్మకం ఉంది.
– డీఎల్‌.సునీతారాణి, స్పెషల్‌ ఆఫీసర్‌, కేజీబీవీ, మస్కాపూర్‌

మన విద్యావిధానం ఇతర రాష్ర్టాలకు స్ఫూర్తి

బెల్లంపల్లి రూరల్‌, సెప్టెంబర్‌ 12 : తెలంగాణ రాష్ట్రం ఏర్పాటు అయ్యాక గ్రామీణ విద్యార్థులకు నాణ్యమైన విద్యను అందించేందుకు గురుకులాలను పెద్ద సంఖ్యలో ఏర్పాటు చేశారు. ప్రతి విద్యార్థికి నాణ్యమైన విద్యను అందించేందకు సీఎం కేసీఆర్‌ ప్రత్యేక ప్రణాళికతో ముందుకు సాగుతున్నారు. జాతీయ స్థాయి ప్రవేశ పరీక్షల్లో పేదింటి కుసుమాలు ప్రతిభ చూపేలా ప్రత్యేక శిక్షణాలయాలను ఏర్పాటు చేశారు. కేజీ టూ పీజీ మిషన్‌ దేశానికే ఆదర్శనీయమైనది. మన విద్యా విధానం ఇతర రాష్ర్టాల అధికారులను సైతం ఆకర్షిస్తుంది. గతేడాది బెల్లంపల్లి గురుకులానికి బీహార్‌ నుంచి అధికారులు వచ్చి ప్రణాళికలను తెలుసుకొని వెళ్లారు. గ్రామీణ ప్రాంత విద్యార్థులు కూడా ఆంగ్లంలో అనర్గళంగా మాట్లాడేలా ప్రస్తుత విద్యా విధానం ఉంది. తెలంగాణలోని విద్యావిధానం దేశ వ్యాప్తంగా అమలు కావాలంటే కేసీఆర్‌ దేశ రాజకీయాల్లోకి వెళ్లాలి.
– ఐనాల సైదులు, ప్రిన్సిపాల్‌, సెంటర్‌ ఆఫ్‌ ఎక్సలెన్సీ, బెల్లంపల్లి