గుడిహత్నూర్ సెప్టెంబర్ 21: ఆదిలాబాద్ జిల్లాలో 2535 ఎకరాల్లో టమాట సాగు చేస్తున్నారు. వాటిలో 2వేల ఎకరాలు ఊతకర్రల సహాయంతో (స్టేకింగ్ పద్ధతి), మిగతాది నేల సాగు పద్ధతిలో పండిస్తున్నారు. వర్షాలు అధికంగా కురిసిన సమయంలో టమాటకు నష్టం వాటిల్లకుండా కొత్త పద్ధతిలో సాగు చేస్తే లాభదాయకంగా ఉంటుందని ఉద్యానవన శాఖ అధికారులు రైతులకు అవగాహన కల్పించారు. దీంతో ప్రతి ఏటా ఆ పద్ధతిలో సాగు చేయడానికి రైతులు ఆసక్తి చూపుతున్నారు. దీంతో జిల్లాలో ప్రస్తుతం 85 శాతం స్టేకింగ్ పద్ధతిలోనే టమాట పండిస్తున్నారు..
స్టేకింగ్తో లాభం..
స్టేకింగ్ పద్ధతి సాగుకు ఖర్చు ఎక్కువ. అయినప్పటికీ లాభసాటిగా ఉందని రైతులంటున్నారు. నేలపై పండే టమాటకు, ఊతకర్రల సహాయంతో పండించే దానికి చాలా వ్యత్యాసం ఉంటుంది. సంప్రదాయ పద్ధతిలో( నేలపై) పండించే టమాట వర్షాలు ఎక్కువ పడితే కుళ్లిపోపడం, కాయకు మచ్చలు, గాలి, వెలుతురు సరిగా ఆడక చీడపీడలు త్వరగా సోకుతాయి. పంటలో కలుపు తీయడం కష్టం. దీంతో నష్టం ఎక్కువగా వస్తుంది. అదే స్టేకింగ్లో విధానంలో సాగు చేస్తే అధిక వర్షాలు పడినప్పుడు కూడా టమాట కుళ్లిపోదు. మచ్చలు రావు. సాళ్ల మధ్య కలుపు సులభంగా తీయవచ్చు. మందు కూడా సరైన మోతాదు, అవసరమైన ప్రదేశంలో చల్లి రోగాల బారి నుంచి పంటను రక్షించుకోవచ్చు. సంప్రదాయ పద్ధతిలో దిగుబడి ఎకరానికి 6 నుంచి 10 టన్నులు వస్తే, స్టేకింగ్లో 20 నుంచి 30 టన్నులు వస్తుందని రైతులు పేర్కొంటున్నారు.
సాగులో గుడిహత్నూర్ టాప్..
జిల్లాలోనే గుడిహత్నూర్ మండలం టమాట పండించడంలో టాప్గా నిలుస్తున్నది. ఈ ఏడాది మండలంలో మొత్తం టమాట సాగు విస్తీర్ణం 898.28 ఎకరాలు. ఆ తర్వాత ఇంద్రవెల్లి మండలంలో 820.64 ఎకరాల్లో సాగు చేస్తూ జిల్లాలో రెండో స్థానంలో ఉంది. వర్షాధారం కింద రెండు వేల ఎకరాలు, బోర్లు, బావుల కింద రెండు వందల ఎకరాలు, సంప్రదాయ పద్ధతిలో 600 ఎకరాల్లో, కొత్త పంథాలో ఊతకర్రల సహాయంతో (స్టేకింగ్ పద్దతి) పెద్ద ఎత్తున పండిస్తున్నారు. ఇంతకుముందు తక్కువ విస్తీర్ణంలో సాగు చేయగా.. కొనుగోలుకు ఇతర ప్రాంతాల నుంచి ప్రతి ఏటా ఎక్కువ మంది వస్తుండడం, మార్కెటింగ్ సౌకర్యం ఉండడం, నేరుగా చేను దగ్గరికి వచ్చి టమాటను తీసుకెళ్తుండడంతో పండించడానికి రైతులు మరింత ఆసక్తి చూపుతున్నారు. ప్రతి రైతు రెండు నుంచి పది, పదిహేను ఎకరాల్లో పండిస్తున్నారు. మండలంలోని తోషం, కొల్హారి, గుడిహత్నూర్, మన్నూర్, మాన్కాపూర్, లింగాపూర్, ముత్నూర్, మచ్చాపూర్, శాంతాపూర్ గ్రామాల్లో అధికంగా టమాట సాగు చేస్తున్నారు.
సబ్సిడీ ఎత్తి వేసినా..
స్టేకింగ్ పద్ధతిలో టమాట సాగు చేస్తే లాభసాటిగా ఉంటుందని, దాని ఖర్చుకు ప్రభుత్వం సబ్సిడీ రూపంలో మొదట ఆర్థిక సహాయం అందించడంతో ఆ పద్ధతిలో పండించడానికి రైతులు ఆసక్తి చూపారు. ప్రస్తుతం సబ్సిడీ అందకున్నా ఆ సాగు పద్ధతిలోనే రైతులు టమాట పండించి దిగుబడి పొందుతున్నారు. ముందుగా స్టేకింగ్ పద్ధతిలో పండించడానికి పెట్టుబడి పెట్టే స్థోమతలేక సన్న, చిన్నకారు రైతులు నేల సాగులోనే టమాట పండిస్తున్నారు. కాగా, ప్రభుత్వం స్టేకింగ్ సాగును ప్రోత్సహించి సబ్సిడీని పునరుద్ధరించి ఆదుకోవాలని పలువురు రైతులు కోరుతున్నారు.
మండలాల వారీగా సాగు ఇలా..
జిల్లాలోని మండలాల్లో గుడిహత్నూర్, ఇంద్రవెల్లి, ఉట్నూర్, ఇచ్చోడ మండలాల్లో టమాటను ఎక్కువగా పండిస్తున్నారు. ఆదిలాబాద్లో 31.47 ఎకరాలు, ఆదిలాబాద్ రూరల్లో 7.02, బేలలో 8.57, జైనథ్లో 41.07, మావలలో 26.06, బ జార్హత్నూర్లో 40.54, బోథ్లో 21.25, నేరడిగొండలో 52.29, గుడిహత్నూర్లో 898.28, ఇచ్చోడలో 192.16, సిరికొండలో 21.73, తలమడుగులో 70.13, భీంపూర్లో 0.1, తాంసిలో 26.21, గాదిగూడలో 3.34, ఇంద్రవెల్లిలో 820. 64, నార్నూర్లో 45.57, ఉట్నూర్లో 228.24 ఎకరాల చొప్పున టమాట సాగు చేస్తున్నారు.
స్టేకింగ్ సాగు లాభదాయకం..
కర్రలతో పండిస్తే ఎక్కువ వర్షం పడినా టమాట కుళ్లిపోవడం లేదు. మచ్చలు వస్తలేవు. కలుపు సులువుగా తీసుకుంటున్నాం. పురుగు మందును అవసరమైన చోట పిచికారీ చేస్తున్నాం. ఈ పద్ధతిలో పండించిన టమాటకు మార్కెట్లో డిమాండ్ ఉంది. అందుకే స్టేకింగ్ పద్ధతిలో సాగు చేస్తున్నా.
సబ్సిడీ, బీమా సౌకర్యం కల్పిస్తే మంచిది
జిల్లాలోనే గుడిహత్నూర్ మండలం టమాట సాగులో ముందుంది. ఉద్యానవన శాఖ అధికారుల ప్రోత్సాహంతో స్టేకింగ్ పద్ధతిలో పండిస్తున్నాం. దీంతో నేల సాగులో వచ్చే దిగిబడికి ఈ పద్ధతికి 40 నుంచి 50 శాతం తేడా వస్తున్నది. స్టేకింగ్ సాగుకు సబ్సిడీ, బీమా సౌకర్యం కల్పిస్తే బాగుంటుంది.
స్టేకింగ్ పద్ధతికే రైతుల మొగ్గు..
స్టేకింగ్ పద్ధతిలో టమాట సాగు లాభదాయకంగా ఉంటుంది. దీంతో రైతులు ఆ పద్ధతిలో సాగుకు మొగ్గు చూపుతున్నారు. ఈ పద్ధతి సాగుతో పంట చీడపీడల బారిన పడదు. చెట్టుకు గాలి ప్రసరణ బాగుంటుంది. కాయలకు మచ్చలు లేకుండా మంచి రంగులో నాణ్యతగా ఉంటాయి. అధిక వర్షాలు పడినా టమాట కుళ్లిపోదు. గుడిహత్నూర్ మండలంలో దాదాపుగా ప్రతి రైతూ తనకున్న భూమిలో కొంత భాగం టమాట సాగు చేస్తున్నాడు. దీంతో జిల్లాలోనే ఈ మండలం ప్రథమ స్థానంలో ఉంది. – శ్రీనివాస్రెడ్డి, జిల్లా హార్టికల్చర్ అధికారి, ఆదిలాబాద్