బంగారు తెలంగాణలో భాగస్వాములవ్వాలి

• అందరి సహకారంతోనే జిల్లా సర్వతోముఖాభివృద్ధి
• మన సంక్షేమ పథకాలు దేశానికే ఆదర్శం
• రాష్ట్ర ఆవిర్భావ వేడుకల్లో ప్రభుత్వ విప్‌లు బాల్క సుమన్‌, అరికెపూడి గాంధీ
• మంచిర్యాల, ఆసిఫాబాద్‌ జిల్లాల్లో అంబరాన్నంటిన సంబురాలు
• దళిత బంధు లబ్ధిదారులకు యూనిట్లు పంపిణీ
• ఆయాచోట్ల హాజరైన ఎమ్మెల్యేలు, కలెక్టర్లు

‘తెలంగాణ రాష్ట్రం అభివృద్ధి పథంలో దూసుకెళ్తున్నది. ముఖ్యమంత్రి కల్వకుంట్ల చంద్రశేఖర్‌రావు బంగారు తెలంగాణ కోసం ధృఢ సంకల్పంతో ఉన్నారు. ఇందులో ప్రతి ఒక్కరూ భాగస్వాములు కావాలి. వివిధ రంగాల్లో రాష్ట్రం సాధించిన ప్రగతి, అమలు చేస్తున్న పథకాలు దేశానికే ఆదర్శంగా నిలువడం గర్వకారణం’ అని ప్రభుత్వ విప్‌లు బాల్క సుమన్‌, అరికెపూడి గాంధీ పేర్కొన్నారు. గురువారం మంచిర్యాల, కుమ్రం భీం ఆసిఫాబాద్‌ జిల్లా కేంద్రాల్లో నిర్వహించిన తెలంగాణ రాష్ట్ర ఆవిర్భావ వేడుకల్లో ఎమ్మెల్యేలు నడిపెల్లి దివాకర్‌రావు, కోనేరు కోనప్ప, ఆత్రం సక్కు, జడ్పీ చైర్‌పర్సన్‌ కోవ లక్ష్మి, కలెక్టర్లు భారతీ హోళికేరి, రాహుల్‌రాజ్‌తో కలిసి ముఖ్య అతిథిగా హాజరయ్యారు. మొదట పోలీసుల గౌరవ వందనం స్వీకరించారు. తెలంగాణ అమరులకు నివాళులర్పించారు. తెలంగాణ తల్లి విగ్రహానికి పూలమాల వేశారు. జాతీయ జెండాను ఆవిష్కరించారు. ‘దళితబంధు’ లబ్ధిదారులకు వాహనాలు అందజేశారు.

మంచిర్యాల, జూన్‌ 2 (నమస్తే తెలంగాణ : బంగారు తెలంగాణలో, అభివృద్ధిలో ప్రతి ఒక్కరూ భాగస్వాములు కావాలని ప్రభుత్వ విప్‌ బాల్క సుమన్‌ పిలుపునిచ్చారు. మంచిర్యాల జిల్లా కేంద్రంలోని జిల్లా పరిషత్‌ బాలుర ఉన్నత పాఠశాల మైదానంలో నిర్వహించిన తెలంగాణ రాష్ట్ర ఆవిర్భావ వేడుకలకు మంచిర్యాల ఎమ్మెల్యే నడిపెల్లి దివాకర్‌రావు, కలెక్టర్‌ భారతీ హోళీకేరి, అదనపు కలెక్టర్‌ మధుసూదన్‌నాయక్‌తో కలిసి ముఖ్య అతిథిగా హాజరయ్యారు. జాతీయ జెండాను ఎగురవేశారు. అంతకుముందు జిల్లాకేంద్రంలోని అమరవీరుల స్తూపం వద్ద నివాళులర్పించారు.

తెలంగాణ తల్లి విగ్రహానికి పూల మాల వేశారు. అనంతరం ప్రజలనుద్దేశించి ప్రసంగించారు. ఆయన మాటల్లోనే.. రాష్ట్రాన్ని బంగారు తెలంగాణగా మార్చాలన్న ధృఢ సంకల్పంతో ముఖ్యమంత్రి కల్వకుంట్ల చంద్రశేఖర్‌రావు అనతి కాలంలోనే అనేక పథకాలకు రూపకల్పన చేసి అమలు చేస్తున్నారు. వివిధ రంగాల్లో రాష్ట్రం సాధించిన ప్రగతి, అమలు చేస్తున్న పథకాలు దేశానికే ఆదర్శంగా నిలుస్తున్నాయి. విదేశాల నుంచి సైతం ప్రశంసలు అందుతున్నాయి. జాతీయ స్థాయిలో మన రాష్ట్రం సాధించిన అవార్డులు సమర్థవంతంగా సాగుతున్న పరిపాలనకు గీటురాళ్లు. ప్రణాళికాబద్ధమైన విధానాలు, ఆర్థిక క్రమశిక్షణ, ప్రజలదీవెనలతో అన్ని రంగాల్లో రాష్ట్రం ముందడుగు వేస్తున్నది. అందరి సహకారంతో జిల్లా సర్వతోముఖాభివృద్ధి చెందుతుంది.

• ప్రభుత్వం ‘దళితబంధు’ పథకం ద్వారా అర్హులైన ప్రతి కుటుంబానికీ రూ. 10 లక్షలు కేటాయిస్తున్నది. ఇది చారిత్రాత్మకమైన నిర్ణయం. ఈ పథకం ద్వారా ప్రతి అసెంబ్లీ నియోజకవర్గానికి 100 యూనిట్ల చొప్పున కేటాయించగా, జిల్లాలో ఈ పథకం కింద ఎంపికైన 251 మంది లబ్ధిదారుల ఖాతాల్లో రూ. 23 వేల కోట్లు జమయ్యాయి.
• జిల్లా ప్రజలకు మరింత మెరుగైన వైద్య సేవలందించడంతో పాటు వైద్యులు, సిబ్బందిని పెంచేందుకు ఈ విద్యా సంవత్సరం నుంచి వైద్య కళాశాల తరగతులు ప్రారంభించేందుకు చర్యలు తీసుకుంటున్నాం. 17 ప్రాథమిక, మూడు సామాజిక ఆరోగ్య కేంద్రాలు, మూడు ప్రాంతీయ దవాఖానలు, 149 వివిధ రకాల ఉప ఆరోగ్య కేంద్రాల ద్వారా జిల్లా ప్రజలకు మెరుగైన వైద్య సేవలు అందిస్తున్నాం. 25 ప్రభుత్వ ఆరోగ్య కేంద్రాలు, 3 సింగరేణి దవాఖానలు, 25 ప్రైవేట్‌ దవాఖానల్లో కొవిడ్‌ పరీక్షలు చేయడంతోపాటు మెరుగైన వైద్య సేవలు అందిస్తున్నాం.
• ధరణి పోర్టల్‌ ద్వారా జిల్లాలో పారదర్శకతతో కూడిన సురక్షితమైన 24,852 కొనుగోలు, బహుమతి, పాలి పంపకం, వ్యవసాయేతర భూమిగా మార్చి రిజిస్ట్రేషన్లు చేయడం జరిగింది. ధరణిలో ఉన్న 33 షెడ్యూల్స్‌ ద్వారా 15,384 దరఖాస్తులు రాగా, 96 శాతంతో 14,890 దరఖాస్తులు పరిష్కరించాం. l సింగరేణి ప్రాంతంలో నివాసముంటున్న అర్హులైన వారిని గుర్తించి జీవో 76 ప్రకారం క్రమబద్ధీకరణ ప్రక్రియను ప్రభుత్వం మొదలు పెట్టింది. శ్రీరాంపూర్‌, రామకృష్ణాపూర్‌లలో వేలాది కుటుంబాలకు పట్టాలు పంపిణీ చేయడంతోపాటు లబ్ధిదారులకు ఆ భూమిపై క్రయ, విక్రయ, వినిమయ, తనఖా ఇతరత్రా సర్వ హక్కులు కల్పించాం. l ఉపాధి హామీ పథకంలో ప్రతి శ్రామిక కుటుంబానికి ఏడాదికి వంద రోజుల పని కల్పిస్తున్నాం. జిల్లాలో 549 పల్లె ప్రకృతి వనాలు మంజూరు కాగా, అన్ని చోట్లా పూర్తి చేశాం. 80 బృహత్‌ పల్లె ప్రకృతి వనాలు మంజూరు కాగా, 16 పూర్తయి, మిగిలినవి ఎనిమిదో విడుత హరితహారంలో పూర్తి చేసేందుకు ప్రణాళికలు సిద్ధమయ్యాయి.
• జిల్లాలో 8333 స్వయం సహాయక సంఘాలకు మెప్మా, సెర్ఫ్‌ ద్వారా బ్యాంకు లింకేజీతో 2022-23 ఆర్థిక సంవత్సరానికిగాను రూ. 388 కోట్లు ఇవ్వాలని లక్ష్యం పెట్టుకున్నారు. 16 మండలాల్లోస్త్రీ నిధి పథకం కింద రూ. 87 కోట్లు లక్ష్యంగా చేసుకొని ప్రణాళికతో ముందుకు సాగుతున్నారు. ఆసరా ఫించన్‌ ద్వారా 27,810 మంది వృద్ధులు, 36,909 మంది వితంతులు, 11,575 మంది వికలాంగులు, 287 మంది బీడీ కార్మికులు, 2,325 మంది ఒంటరి మహిళలు, 265 మంది బోధకాలు బాధితులు లబ్ధిపొందుతున్నారు. l పురపాలక సంఘాలకు రాష్ట్ర ప్రభుత్వం పెద్ద ఎత్తున నిధులు కేటాయించింది. ఏడు మున్సిపాలి టీల్లో సమీకృత కూరగాయల మార్కెట్లు, వైకుంఠధామాలు, డంప్‌యా ర్డులు, ప్లేగ్రౌండ్‌లు, చిల్డ్రన్‌ పార్కులు, మురుగు కాలువలు, మహిళా భవనాలు, ఓపెన్‌ జిమ్‌లు, అంతర్గత రోడ్లు, వీధి దీపాల ఏర్పాట్లు, సెంట్రల్‌ లైటింగ్‌ సిస్టమ్స్‌, పబ్లిక్‌టాయిలెట్స్‌, మౌలిక సదుపాయాలు ఏర్పాటు చేశాం. మంచిర్యాల పురపాలక పరిధిలో చేపట్టిన పారిశుధ్య నిర్వహణకు రాష్ట్ర ప్రభుత్వం ఉత్తమ అవార్డు అందించింది. ఈ నెల మూడో తేదీ నుంచి 18వ తేదీ వరకు చేపట్టనున్న పల్లె ప్రగతి, పట్టణ ప్రగతి కార్యక్రమాలను విజయవంతం చేయాలి.
• జిల్లాలో 423 రేషన్‌ దుకాణాల ద్వారా 2,20 ,313 ఆహార భద్రత, అంత్యోదయ, అన్నపూర్ణ కార్డుదారుల ద్వారా 33,768 మెట్రిక్‌ టన్నుల బియ్యం సరఫరా చేస్తున్నాం. మధ్యాహ్న భోజన పథకంలో భాగంగా 51,509 మంది విద్యార్థులకు ప్రతి నెలా 129 మెట్రిక్‌టన్నుల బియ్యం సరఫరా చేస్తున్నాం. l 2021 యాసంగిలో మే 10వ తేదీ వరకు 1,39,195 మంది రైతుల ఖాతాల్లో రైతుబంధు పథకం ద్వారా రూ. 64 కోట్ల 59 లక్షలు జమ చేశాం. 82,666 మంది రైతులను రైతుబీమా ప్రయోజనం కింద చేర్చాం. వానకాలం వ్యవసాయ సహకార కేంద్రాల ద్వారా 6,250 క్వింటాళ్ల జీలుగ, 827 క్వింటాళ్ల జనుము విత్తనాలతో పాటు పచ్చిరొట్ట విత్తనాలు రైతులకు పంపిణీ చేశాం.
• పంట మార్పిడి పద్ధతిలో భాగంగా జిల్లాలో ఆయిల్‌ పామ్‌ సాగును విస్తృతంగా ప్రోత్సహించాలని రాష్ట్ర ప్రభుత్వం నిర్ణయం తీసుకుంది. ఇందులో భాగంగా మంచిర్యాల, కుమ్రం భీం ఆసిఫాబాద్‌ జిల్లాలో మ్యాట్రిక్స్‌ కంపెనీకి రాష్ట్ర ప్రభుత్వం ఆయిల్‌ పామ్‌ మొక్కల పెంపకం కేటాయించింది. చెన్నూర్‌ నియోజక వర్గంలోని భీమారం వద్ద ఆయిల్‌పామ్‌ నర్సరీని ఏర్పాటు చేసి రైతులకు సబ్సిడీపై మొక్కలు అందజేస్తుంది. జిల్లాలో 580 ఎకరాలకుపైగా ఆయిల్‌పామ్‌ సాగవుతోంది. రూ. 500 కోట్లతో పామాయిల్‌ ఫ్యాక్టరీని కూడా త్వరలోనే ఏర్పాటు చేయబోతున్నాం.
• నీలి విప్లవం పథకం కింద మత్స్య సంపద పెంచేందుకు 113 మత్స్యశాఖ చెరువులు, 243 జీపీల్లోని నీటి వనరులు, మూడు రిజర్వాయర్లలో 2 కోట్ల 20 లక్షల చేప పిల్లలు, పది పెరినియల్‌, రిజర్వాయర్లలో 53 లక్షల రొయ్య పిల్లలను వేశాం.
• మన ఊరు – మన బడి కార్యక్రమం ద్వారా ప్రైవేట్‌, కార్పొరేట్‌ విద్యా సంస్థలకు ధీటుగా ప్రభుత్వ పాఠశాలల్లో అన్ని రకాల మౌలిక సదుపాయాలు కల్పిస్తూ విద్యార్థులకు మెరుగైన ఆంగ్ల విద్య అందిస్తున్నాం. మొదటి విడుతలో భాగంగా జిల్లాలో 248 పాఠశాలలను ఎంపిక చేసి ఇంజినీరింగ్‌ విభాగాల ద్వారా అభివృద్ధి కార్యక్రమాలు చేపట్టాం. ఇంటర్మీడియట్‌ విద్యాశాఖ పరిధిలో 56 జూనియర్‌ కళాశాలల్లో17,224 మంది విద్యార్థులు విద్యనభ్యసిస్తున్నారు. పరీక్షల మూల్యాంకనం క్యాంపు మంచిర్యాల ప్రభుత్వ జూనియర్‌ కళాశాలలో ఏర్పాటు చేశారు. గ్రామీణ క్రీడాకారులు క్రీడా రంగంలో రాణిస్తూ జిల్లాను ఉన్నత స్థానంలో నిలబెట్టే విధంగా రాష్ట్ర ప్రభుత్వం క్రీడా మైదానాలు ఏర్పాటు చేసి ప్రోత్సహిస్తుంది. 548 క్రీడామైదానాలు ఏర్పాటు చేసే క్రమంలో ప్రస్తుతం మండలానికి రెండు క్రీడామైదానాల చొప్పున 16 మండలాల్లో 32 క్రీడామైదానాలు, ఏడు మున్సిపాలిటీల్లో 18 క్రీడా మైదానాలు ఆవిర్భావ దినోత్సవం రోజున ప్రారంభించాం.
• జిల్లా కేంద్రంలోని గ్రంథాలయంలో పోటీ పరీక్షలకు శిక్షణ పొందుతున్న అభ్యర్థులు ప్రభుత్వ ఉద్యోగాలు సాధిస్తారన్న నమ్మకముంది.చెన్నూర్‌, బెల్లంపల్లిల్లో గ్రంథాలయ భవనాలు పూర్తి చేసి ప్రారంభించారు. చెన్నూర్‌, మంచిర్యాల, బెల్లంపల్లిల్లో ఏర్పాటు చేసిన శిక్షణ కేంద్రాలను జిల్లాలోని యువత సద్వినియోగం చేసుకొని ప్రభుత్వ కొలువులు సాధించాలని ఆకాంక్షించారు.
• జిల్లాలో వెనుకబడిన తరగతుల అభివృద్ధి శాఖ ద్వారా 13,122 మంది విద్యార్థులకు రూ.7 కోట్ల 8 లక్షలు పోస్టుమెట్రిక్‌ ఉపకార వేతనాలతో పాటు 12,128 మంది విద్యార్థులకు రూ. 6 కోట్ల 73 లక్షల ఫీజు రీయంబర్స్‌మెంటు విడుదల చేయడం జరిగింది. మైనార్టీ సంక్షేమ శాఖ ద్వారా విదేశీ విద్య అభ్యసించేందుకు వెళ్లే అర్హులైన విద్యార్థులకు ఓవర్‌సీస్‌ స్కాలర్‌షిప్‌ పథకం ద్వారా రూ. 20 లక్షల సాయంతోపాటు ప్రయాణపు విమాన ఖర్చులు ప్రభుత్వం భరిస్తుంది. గిరిజన సంక్షేమ శాఖ ద్వారా నూతన, రెగ్యులర్‌ విద్యార్థులకు పోస్ట్‌మెట్రిక్‌ఉపకార రుసుముల కింద 1050 మందికి రూ.96 లక్షల 12 వేలు మంజూరు చేశాం.
• మిషన్‌ భగీరథ కార్యక్రమంలో భాగంగా రూ. 333 కోట్లతో 563 ట్యాంకులు, 2,655 కిలో మీటర్ల అంతర్గత పైపులైన్‌ నిర్మాణం చేపట్టాం. లక్షా 78 వేల 125 ఇంటి నల్లా కనెక్షన్లు పూర్తి చేశాం. జిల్లాలో 570 కిలో మీటర్ల నిడివి గల రహదారులు విస్తరించి ఉన్నాయి.
• జిల్లాలో భారీ, మధ్య తరహా, చిన్న నీటిపారుదల ప్రాజెక్టుల ద్వారా వ్యవసాయానికి సాగు నీరు అందించనున్నాం. మంచిర్యాల నియోజక వర్గ పరిధిలో కడెం ఆయకట్టు, గూడెం ఎత్తిపోతల పథకాల ద్వారా, ఇతరత్రా చెరువుల ద్వారా సాగు నీరు అందిస్తున్నాం. కాళేశ్వరం ప్రాజెక్టు నుంచి చెన్నూర్‌ నియోజక వర్గ పరిధిలో దాదాపు లక్ష ఎకరాలకు 1680 కోట్లతో పది టీఎంసీల నీరు అందించేందుకు రాష్ట్ర ప్రభుత్వం అన్ని పరిపాలనా పరమైన అనుమతులు మంజూరు చేసింది.
• తెలంగాణకే తలమానికమైన సింగరేణి సంస్థలోని బొగ్గుబావులు, ఉపరితల గనుల ద్వారా ఉత్పత్తి చేస్తున్న నల్ల బంగారంతో రాష్ట్రమంతటా విద్యుత్‌ను నిరంతరాయంగా సరఫరా చేస్తున్నాం. జైపూర్‌లో 1200 మెగావాట్ల విద్యుత్‌ ఉత్పత్తి కేంద్రంతో పాటు అదనంగా మరో 10 వేల మెగావాట్ల సౌరవిద్యుత్‌ ఉత్పత్తికి ఏర్పాట్లు పూర్తయ్యాయి. జిల్లా అభివృద్ధికి నిరంతరం కృషి చేస్తున్న ప్రజాప్రతినిధులు, అధికార యంత్రాంగానికి, ప్రెండ్లీ పోలీసింగ్‌, జనమైత్రి, షీటీమ్స్‌, ఆపరేషన్‌ పరివర్తన్‌లాంటి కార్యక్రమాల ద్వారా ప్రజలకు సేవ చేస్తూ ఎల్లవేళలా శాంతిభద్రతలను కాపాడుతున్న పోలీసుశాఖ వారికి, సమాచార శాఖ, ప్రింట్‌, ఎలక్ట్రానిక్‌ మీడియా ప్రతినిధులకు ధన్యవాదాలు తెలిపారు.

పథకాల అమలులో రాజీలేదు

ఆసిఫాబాద్‌, జూన్‌ 2 : కరోనాతో దేశం మొత్తం సంక్షోభంలో పడినా తెలంగాణలో మాత్రం పథకాల అమలులో సీఎం కేసీఆర్‌ రాజీపడింది లేదని ప్రభుత్వ విప్‌ అరికెపూడి గాంధీ పేర్కొన్నారు. గురువారం జిల్లా కేంద్రంలోని కలెక్టర్‌ కార్యాలయ ఆవరణలో తెలంగాణ రాష్ట్ర ఆవిర్భావ దినోత్సవ వేడుకలకు జడ్పీ చైర్‌పర్సన్‌ కోవలక్ష్మి, ఎమ్మెల్యేలు కోనేరు కోనప్ప, ఆత్రం సక్కు, కలెక్టర్‌ రాహుల్‌రాజ్‌, ఎస్పీ సురేశ్‌కుమార్‌, అదనపు కలెక్టర్లు రాజేశం,వరుణ్‌ రెడ్డితో కలసి ముఖ్య అతిథిగా హాజరయ్యారు. అమరవీరుల స్తూపం వద్ద పోలీసుల గౌరవ వందనం స్వీకరించిన అనంతరం, అమరవీరులకు నివాళులర్పించారు.

అనంతరం కలెక్టరేట్‌లో జాతీయ జెండాను ఆవిష్కరించారు. ఈ సందర్భంగా మాట్లాడుతూ అమరుల త్యాగాలతో, కేసీఆర్‌ మొక్కవోని దీక్షతో తెలంగాణ రాష్ట్ర ఏర్పాటు సాధ్యమైందని గుర్తు చేశారు. తెలంగాణ ఏర్పడి టీఆర్‌ఎస్‌ అధికారంలోకి వచ్చిన తర్వాత రాష్ట్రం ఎంతో అభివృద్ధి చెందిందన్నారు. అనంతరం జిల్లాలో జరుగుతున్న ప్రగతిని వివరించారు. అంతకుముందు కాగజ్‌నగర్‌కు చెందిన బిట్ల వెంకటస్వామి నృత్యకళాకారుడి శిశువులు వేధశ్రీ,విశ్వజ చేసిన నృత్యం ఆకట్టుకుంది. సాయంత్రం నిర్వహించిన కవి సమ్మేళనానికి అనుహ్య స్పందన లభించింది. సాలేగూడలో ఏర్పాటు చేసిన క్రీడా మైదానాన్ని విప్‌ ప్రారంభించారు.

ఉత్తమ సర్పంచులకు మెమొంటోలు

జిల్లాలోని 18 ఉత్తమ పంచాయతీలను ఎంపిక చేసి, ఆయా గ్రామాల సర్పంచులకు మెమొంటోలు అందజేశారు. జైనూర్‌ మండలం మార్లవాయి సర్పంచు ప్రతిభకు గోల్డ్‌ మెడల్‌ అందజేశారు. దహెగాం మండలం బీబ్రా సర్పంచ్‌ కృష్ణమూర్తి, రెబ్బెన మండలం కొండపల్లి సర్పంచ్‌ శాంతకు సిల్వర్‌ మెడల్స్‌ అందజేశారు.

మిగతా గ్రామాల సర్పంచులు లావణ్య,రీనా సర్ధార్‌,శ్యామల, మల్లేశ్‌, మౌనిశ్‌, కావ్య,లక్ష్మి, జే.లక్ష్మి, భీంరావు, నానేశ్వర్‌, లక్ష్మి, సోమశేఖర్‌, నాగోరావు, హన్మంత్‌రావు, సుమిత్రకు ప్రశంసాపత్రాలు అందించారు. అలాగే దళితబంధు పథకం ద్వారా మంజూరైన యూనిట్లను 22 మంది లబ్ధిదారులకు అందజేశారు. ఈ కార్యక్రమంలో జడ్పీటీసీ అరిగెల నాగేశ్వర్‌రావు, గ్రంథాలయ సంస్థ చైర్మన్‌ కనక యాదవరావు,ఎంపీపీ మల్లికార్జున్‌ యాదవ్‌, మార్కెట్‌ కమిటీ చైర్మన్‌ గాదవెణి మల్లేశ్‌, ఏఎస్పీ అచ్చేశ్వర్‌రావు, డీఆర్వో కదం సురేశ్‌, ఆర్డీవో సిడాం దత్తు, డీఎస్పీ శ్రీనివాస్‌, డీడబ్ల్యూవో సావిత్రి, డీడీ మణెమ్మ, ప్రత్యేకాధికారి రమేశ్‌, ఎస్సీ, బీసీ సంక్షేమాధికారులు సజీవన్‌, సత్యనారాయణరెడ్డి, డీఆర్‌డీవో సురేందర్‌, వ్యవసాధికారి శ్రీనివాస్‌రావు, నాయకులు పాల్గొన్నారు. కాగా, జిల్లా వ్యాప్తంగా అన్ని ప్రభుత్వ కార్యాలయాల్లో ఆయా శాఖల అధిపతులు జాతీయ జెండాలను ఆవిష్కరించారు.