Friendship | మీ స్నేహం పదిలంగా ఉండాలంటే..

సంతోష సమయాల్లోనే కాకుండా కష్టకాలంలోనూ అండగా నిలిచేవాళ్లే ప్రాణస్నేహితులు. కొన్నిసార్లు మన కుటుంబసభ్యుల కంటే కూడా నేస్తాలే ఎక్కువ దగ్గరగా అనిపిస్తారు. ఎంత ప్రాణస్నేహితులైనా కూడా అప్పుడప్పుడు పొరపొచ్చాలు రావడం సహజం. దీంతో మిత్రుల మధ్య ఎడం పెరిగే అవకాశం ఉంది.

Friendship | సంతోష సమయాల్లోనే కాకుండా కష్టకాలంలోనూ అండగా నిలిచేవాళ్లే ప్రాణస్నేహితులు. కొన్నిసార్లు మన కుటుంబసభ్యుల కంటే కూడా నేస్తాలే ఎక్కువ దగ్గరగా అనిపిస్తారు. ఎంత ప్రాణస్నేహితులైనా కూడా అప్పుడప్పుడు పొరపొచ్చాలు రావడం సహజం. దీంతో మిత్రుల మధ్య ఎడం పెరిగే అవకాశం ఉంది. ఇలాంటప్పుడు కొన్ని జాగ్రత్తలు తీసుకుని సాధ్యమైనంత తొందరగా స్నేహబంధాన్ని నిలుపుకొనే ప్రయత్నం చేయాలి.

• స్నేహితులతో ఏ అంశంపై అయినా వాదనకు, చర్చకు దిగాల్సి వస్తే ముందుగానే దాని గురించి ఆలోచించుకోవాలి. మీ ఆలోచనలు సరైనవో కాదో పరిశీలించుకోవాలి. భావోద్వేగాలను నియంత్రించుకునే ప్రయత్నం చేయాలి. ఆ తర్వాతే చర్చకు దిగాలి.
• వాదోపవాదాలు జరిగి మనస్పర్ధలు తలెత్తిన పరిస్థితుల్లో ఎవరో ఒకరి వైపు తప్పు ఉంటుంది. కాబట్టి అందులో మీ పాత్ర ఏమైనా ఉందేమో ఏకాంతంగా కూర్చుని నిర్ధారణకు రావాలి. మీరే చిన్న అంశాన్ని పెద్దగా చేసి ఉండొచ్చు. లేదంటే మంచి ఉద్దేశంతోనే అయినప్పటికీ ఎక్కువగా ప్రతిస్పందించి ఉండొచ్చు. ఇలా అనిపిస్తే మీ స్నేహితుడికి తగినవిధంగా సర్ది చెప్పాలి.
• అలా కాకుండా తప్పు మీ దోస్తుదే అయ్యుండొచ్చు. అప్పుడు మీ మనోభావాలు దెబ్బతీసినందుకు దోస్తుపై కోపం పోకుంటే… మీ వరకు మీరు క్షమాపణలు చెప్పాలి. అంతేతప్ప వెంటనే ఎదుటివారి తప్పులు ఎత్తిచూపే ప్రయత్నం చేయకూడదు. మీ దోస్తు మంచి మూడ్‌లో ఉన్నప్పుడు వాటిని గుర్తుచేయొచ్చు.
• ఇక జరిగిన గొడవను పరిష్కరించుకోవాలని అనుకుంటే మీరు ముందుగా మీ మిత్రుడి కోణం నుంచి ఆలోచించాలి. మీ మాటల వల్లనే వాళ్లు బాధపడ్డారేమో అని ఆలోచించాలి. స్నేహబంధంలో సమస్యల పరిష్కారానికి ఎదుటివాళ్ల వైపు నుంచి ఆలోచించడం కూడా కీలకమే.
• కొన్నిసార్లు తప్పు ఇద్దరి నుంచీ ఉండొచ్చు. అలాంటప్పుడు మీ దోస్తుతో విభేదాలను పూర్తిగా తొలగించుకోవాలని అనుకుంటే.. మీ జీవితంలో ఆ స్నేహితుడు ఎంత ముఖ్యమో తెలియజేయాలి. ముందుముందు పొరపొచ్చాలు రాకుండా పరిష్కారాలు సూచించాలి.
• చివరగా ఓ మాట… మీరు క్షమాపణ చెప్పినంత మాత్రాన మీ మిత్రుడు వెంటనే అంగీకరించకపోవచ్చు. కాబట్టి, కొంత సమయం వేచిచూడాలి. మీరిద్దరూ నిజమైన స్నేహితులే అయితే మీ బంధంలో అహానికి సంబంధించిన అంశాలు అసలు ఓ విషయమే కాదని గుర్తుంచుకోండి.