Stone Carving Jewellery | ఈ రాతి న‌గ‌లు ధ‌రిస్తే ఆరోగ్యానికి ఇన్ని లాభాలా?

Stone Carving Jewellery | బీచ్‌లోనో, జలపాతాల దగ్గరో నున్నగా, అందంగా ఏ రాయి కనిపించినా మనసు పారేసుకుంటాం. ఆ సహజ సౌందర్యానికి పాషాణ హృదయాలు సైతం కరిగిపోతాయి. ప్రేమగా చేతుల్లోకి తీసుకుంటాం. వీలైతే బ్యాగులో వేసుకుంటాం. అవకాశం ఉంటే షోకేస్‌లో కాస్తంత చోటిస్తాం. ఓ అడుగు ముందుకేసి.. ఆభరణాలుగా మలుచుకుంటున్నవారూ ఉన్నారు. కాబట్టే, ‘స్టోన్‌ కార్వింగ్‌ జువెలరీ’ మహిళల ముస్తాబులో భాగం అవుతున్నది.

కంటికి ఇంపుగా కనిపించే రకరకాల కూరగాయలు, పండ్లను కళాత్మకంగా కార్వింగ్‌ చేస్తారు పాకశాస్త్ర నిపుణులు. అలానే, తళుకులీనుతున్న రాళ్లను మరింత అందంగా చెక్కి చక్కని ఆభరణాలుగా మలుస్తున్నారు జువెలరీ డిజైనర్లు. పల్చగా ఉన్న నున్నని రాళ్లను చెవికమ్మలు, పెండెంట్లు, లాకెట్లుగా మార్చేస్తున్నారు. వాటి సహజ ఆకృతిని ఆసరాగా చేసుకుని రంగురంగుల బొమ్మలు వేసి ఆకట్టుకునే ఆభరణాలను రూపొందిస్తున్నారు.

దేవుళ్లు, జంతువులు, పక్షుల రూపాలను చెక్కిన పెండెంట్లూ అందుబాటులో ఉన్నాయి. బంగారం, వెండి, ప్లాటినం ప్రస్తావన లేదు కాబట్టి.. ధర చవకే. సాక్షాత్తు ప్రకృతే తీర్చిదిద్దుతుంది కాబట్టి, వైవిధ్యానికి కొదవ లేదు. ఈ యూనిసెక్స్‌ జువెలరీని పురుషులూ సింగారించుకోవచ్చు.

స్టోన్‌ కార్వింగ్‌ నగలు ఆరోగ్యానికి కూడా మంచి చేస్తాయి. వీటిని ధరించడం వల్ల ఎటువంటి చర్మ సమస్యలూ తలెత్తవు. ఆ స్పర్శతో మనసుకు ప్రశాంతంగా అనిపిస్తుంది. సంప్రదాయ దుస్తులతోపాటు వెస్ట్రన్‌వేర్‌ పైనా చక్కగా అమరిపోతాయి. కాలేజీ, ఆఫీసు అలంకరణలోనూ భాగం చేసుకోవచ్చు. ఏ సముద్రతీరానికో వెళ్లినప్పుడు సేకరించి తెచ్చుకుంటే.. మన నగలకు మనమే డిజైనర్లు అయిపోవచ్చు.

Read More :

దుస్తులే కాదు చెప్పులు, బ్యాగులు అన్నిటిపైనా ముత్యాలే ఫ్యాష‌న్‌.. అస‌లు వీటి వాడ‌కం ఎప్పుడు మొదలైంది?”