పాపాయికి వెచ్చని స్వాగతం

నవజాత శిశువుల్లో దాదాపు 15 శాతం మంది తక్కువ ఉష్ణోగ్రత సమస్యను ఎదుర్కొంటున్నారు. కాన్పు జరిగే గది ఉష్ణోగ్రత పుట్టబోయే శిశువుకు సరిపోయేలా చర్యలు తీసుకోవడం ద్వారా హైపోథెర్మియా సమస్యను నివారించవచ్చు. దీంతోపాటు శిశువు జన్మించిన వెంటనే కొద్దిగా వేడిగా ఉండే ప్రదేశంలో ఉంచి, అంతకుముందే వేడి చేసి ఉంచిన పొడి వస్త్రంతో తుడిచి, మరొక పొడి వస్ర్తాన్ని

September 20, 2022 / 12:47 AM IST

నవజాత శిశువుల్లో దాదాపు 15 శాతం మంది తక్కువ ఉష్ణోగ్రత సమస్యను ఎదుర్కొంటున్నారు. కాన్పు జరిగే గది ఉష్ణోగ్రత పుట్టబోయే శిశువుకు సరిపోయేలా చర్యలు తీసుకోవడం ద్వారా హైపోథెర్మియా సమస్యను నివారించవచ్చు. దీంతోపాటు శిశువు జన్మించిన వెంటనే కొద్దిగా వేడిగా ఉండే ప్రదేశంలో ఉంచి, అంతకుముందే వేడి చేసి ఉంచిన పొడి వస్త్రంతో తుడిచి, మరొక పొడి వస్ర్తాన్ని శిశువుకు ఆచ్ఛాదనగా చుట్టడం వల్ల శిశువుకు సరైన వాతావరణం కల్పించవచ్చు.

జాగ్రత్తలు

రెండు కిలోల కన్నా తక్కువ బరువు ఉన్న శిశువును నర్సరీలో ఉంచాల్సి రావచ్చు. 1.8 కిలోల కన్నా తక్కువ బరువున్న శిశువును ‘ఓపెన్‌ కేర్‌ ఇంక్యుబేటర్‌’లో ఉంచాలి. ఒక కిలో కన్నా తక్కువ బరువు ఉండే శిశువుల మంచంపై సన్నని ప్లాస్టిక్‌ షీట్‌ కప్పడం వల్ల శరీర ఉష్ణోగ్రత తగ్గకుండా, నీరు ఆవిరి రూపంలో బయటికి వెళ్లకుండా నివారించవచ్చు.
శిశువు ఉష్ణోగ్రత సమతుల్యతను కాపాడే మరొక అంశం బ్రౌన్‌ఫాట్‌ అనే ఒక ప్రత్యేకమైన కొవ్వు పదార్థం. ఇది గర్భం చివరి 3 నెలలలో శిశువు శరీరంలో నిలువ అవుతుంది. మెడ, వీపు పైభాగం మధ్య, చంకలు, కటివలయం, మూత్రపిండాల చుట్టూ పేరుకొని ఉంటుంది. దీనినుంచి ఉష్ణం విడుదలై రక్తం ద్వారా శరీరంలోని వివిధ భాగాలకు చేరుతుంది.
చల్లని పరిసరాలలో ప్రసవం జరగడం, జన్మించిన వెంటనే చన్నీటితో స్నానం చేయించడం, చల్లని వస్త్రంతో తుడవడం, నర్సరీకి తరలించే సమయంలో తగిన జాగ్రత్తలు తీసుకోకపోతే శిశువులు హైపోథెర్మియాకు లోనవుతారు.

లక్షణాలు
హైపోథెర్మియాకు గురైన శిశువుల కాళ్లు, చేతులు మొదట చల్లబడతాయి. చికాకు పడుతుంటారు. ఏడుస్తుంటారు. సరైన చర్యలు చేపట్టనట్లయితే శరీర కదలికలు తగ్గుతాయి. రక్తనాళాలు సంకోచించడం వల్ల చర్మంపై చిన్నచిన్న మచ్చలు ప్రారంభమవుతాయి. గుండె వేగం, రక్తపోటు తగ్గుతుంది. శ్వాసక్రియ ఆగిపోవచ్చు. దీనినే ‘అప్నియా’ అంటారు. శరీరవ్యాప్తంగా ఉన్న రక్తనాళాలలో రక్తం గడ్డకట్టడాన్ని ‘డిస్సెమినేటెడ్‌ ఇంట్రా వాస్క్యులర్‌ కొయాగ్యులేషన్‌’ అంటారు. హైపోథెర్మియా వల్ల పచ్చ పసరికలు తీవ్రరూపం దాల్చి చివరికి మరణానికి దారితీయవచ్చు.

నివారణ
శిశువు నిద్రించే గదిలో ఉష్ణోగ్రత 25 డిగ్రీ సెంటిగ్రేడ్‌, నర్సరీలో 28 డిగ్రీ సెంటిగ్రేడ్‌ ఉండాలి. శరీర ఉష్ణోగ్రత 36.50 డిగ్రీ సెంటిగ్రేడ్‌ ఉండేలా చూసుకోవాలి. ప్రమాదకరమైన ప్రసవాలు జరిగే అవకాశం ఉన్నప్పుడు నర్సరీ ఉన్న పెద్దాసుపత్రిలోనే కాన్పు జరిగేలా జాగ్రత్తపడాలి. ఒకవేళ ప్రసవం ఇతర ప్రదేశాలలో జరిగినప్పుడు శిశువును నర్సరీకి వెచ్చగా పంపడానికి ‘ట్రాన్స్‌పోర్ట్‌ ఇంక్యుబేటర్‌’ వాడతారు. ఒకవేళ ఇవి అందుబాటులో లేనప్పుడు ఉన్ని వస్త్రంతో గానీ, దూదితో గానీ శరీరాన్ని కప్పి, వెదురు డబ్బాలో లేదా థర్మోకోల్‌ డబ్బాలో ఉంచి పంపించాలి. శిశువుకు తగలకుండా డబ్బాలో వేడినీటి సీసాలను ఉంచాలి.

గృహవైద్యం
హైపోథెర్మియాకు వైద్యం కన్నా నివారణే మేలు. తల్లిదండ్రులకు హైపోథెర్మియా లక్షణాలను, ప్రమాదాలను వివరించడం వల్ల ప్రథమ దశలోనే వైద్యం చేయవచ్చు. శిశువు అరిచేతులు, పాదాలు వెచ్చగా, గులాబీ రంగులో ఉన్నాయో లేదో తరచుగా గమనించాలి. చలికాలం, తుఫాను సమయంలో శిశువు నిద్రించే గదిని వెచ్చగా ఉంచాలి. గదిలో 200 వోల్టుల బల్బుగాని, రూమ్‌ హీటర్‌గాని అమర్చి గది ఉష్ణోగ్రత 25 డిగ్రీ సెంటిగ్రేడ్‌ ఉంచాలి. చలిగా ఉన్న రోజు స్నానం చేయించకుండా మధ్యాహ్నం వేడినీటిలో ముంచిన వస్త్రంతో శరీరాన్ని తుడవవచ్చు.