Health Tips | నిద్రలో కాళ్లూచేతులు పట్టేస్తున్నాయా.. అయితే ఇలా చేయండి!

నిద్రలో తలెత్తే శారీరక సమస్యల్లో చేతులు, కాళ్లు మొద్దుబారినట్టు అనిపించడం చాలామందికి అనుభవమే. తాత్కాలికమే అయినప్పటికీ, తరచుగా జరుగుతుంటే మాత్రం దీన్ని సీరియస్‌గానే తీసుకోవాలి. చేతులు, కాళ్లు మొద్దుబారినప్పుడు జలదరింపుగా, పొడుస్తున్నట్టుగా, మంటగా ఉంటుంది. దీంతో నిద్రకు ఆటంకం కలుగుతుంది. నరాల మీద ఒత్తిడి కారణంగా, రక్త సరఫరాలో ఆటంకం వల్ల, ఇతర అనారోగ్య సమస్యల కారణంగా ఇలా జరగవచ్చు.

Health Tips | నిద్రలో తలెత్తే శారీరక సమస్యల్లో చేతులు, కాళ్లు మొద్దుబారినట్టు అనిపించడం చాలామందికి అనుభవమే. తాత్కాలికమే అయినప్పటికీ, తరచుగా జరుగుతుంటే మాత్రం దీన్ని సీరియస్‌గానే తీసుకోవాలి. చేతులు, కాళ్లు మొద్దుబారినప్పుడు జలదరింపుగా, పొడుస్తున్నట్టుగా, మంటగా ఉంటుంది. దీంతో నిద్రకు ఆటంకం కలుగుతుంది. నరాల మీద ఒత్తిడి కారణంగా, రక్త సరఫరాలో ఆటంకం వల్ల, ఇతర అనారోగ్య సమస్యల కారణంగా ఇలా జరగవచ్చు.

సాధారణంగా ఒకే భంగిమలో ఎక్కువసేపు నిద్రించడం, మధుమేహం, విటమిన్లు లోపించడం, నాడీ వ్యవస్థకు సంబంధించిన సమస్యలు లాంటివి చేతులు, కాళ్లు మొద్దుబారడానికి ముఖ్య కారణాలు. దీనికి సంబంధించిన మరిన్ని వివరాలను అవగాహన చేసుకుందాం. తప్పుడు నిద్రా భంగిమ ఒకే భంగిమలో ఎక్కువసేపు నిద్రపోతే నరాల మీద, రక్త సరఫరా మీద ఒత్తిడి పెరుగుతుంది. ఇది చేతులు, కాళ్లు మొద్దుబారేలా చేస్తుంది.

• తల కింద చేతులు పెట్టుకుని పడుకుంటే చేతులకు రక్త సరఫరాలో ఆటంకం కలుగుతుంది.
• కాళ్లను మడిచి పడుకున్నా, ఏదైనా బరువైన వస్తువు మీద పెట్టుకుని పడుకున్నా సిరల మీద ఒత్తిడి పెరుగుతుంది.
• దిండు, పరుపు సరిగ్గా లేకపోయినా కూడా మెడ, వెన్ను మీద ప్రభావం పడుతుంది. ఇది కూడా చేతులు, కాళ్లు మొద్దుబారడానికి దారితీస్తుంది.

ఏం చేయాలి?

దిండు, పరుపు మరీ మెత్తగా కానీ, మరీ గట్టిగా కానీ ఉండకూడదు. తరచుగా నిద్ర భంగిమను మారుస్తూ ఉండాలి.

నాడులు కుంచించుకుపోవడం

నాడుల మీద ఒత్తిడి కూడా వాటి సాధారణ పనితీరుకు ఆటంకం కలిగిస్తుంది. దాంతో తిమ్మిరిగా, మొద్దుబారినట్టుగా అనిపిస్తుంది.

• కార్పల్‌ టన్నెల్‌ సిండ్రోం: మణికట్టు నాడులపై ఒత్తిడి పడినప్పుడు ఈ పరిస్థితి తలెత్తుతుంది. దీంతో చేతివేళ్లు మొద్దుబారిపోతాయి.
• సయాటిక్‌ నర్వ్‌ కంప్రెషన్‌: వెన్నుపాములో ఉండే సయాటిక్‌ నాడిపై ఒత్తిడి పడినప్పుడు ఈ సమస్య వస్తుంది. దీంతో కాళ్లు మొద్దుబారుతాయి.
• అల్నర్‌ నర్వ్‌ కంప్రెషన్‌: మోచేతి నాడుల్లో ఒత్తిడి వల్ల చేతులు తిమ్మిరెక్కుతాయి.

ఏం చేయాలి?

ఎక్కువ సమయంపాటు ఒకే దగ్గర కూర్చోవడం, ఒకే భంగిమలో పడుకోవడం చేయకూడదు. శరీరంపై ఒత్తిడి పడకుండా తేలికపాటి వ్యాయామాలు చేస్తూ ఉండాలి. సమస్య తగ్గకపోతే మాత్రం వైద్యుణ్ని
సంప్రదించాలి.

రక్త సరఫరాలో ఆటంకం

శరీరంలో ఏదైనా భాగానికి రక్తం తగినంతగా సరఫరా కాకపోయినా, సంబంధిత అవయవం మొద్దుబారినట్టుగా అనిపిస్తుంది. దీనికి కారణాలు..

• ఒకే భంగిమలో ఎక్కువసేపు కూర్చోవడం.
• అధిక రక్తపోటు, డయాబెటిస్‌ లాంటి వ్యాధులు.
• అతిగా ధూమపానం, మద్యపానం.
• కొలెస్ట్రాల్‌ స్థాయులు పెరగడం, రక్తనాళాలు కుంచించుకుపోవడం కూడా చేతులు, కాళ్లు మొద్దుబారడానికి కారణమవుతాయి.

ఏం చేయాలి?

రక్త సరఫరా మెరుగుపడటానికి క్రమం తప్పకుండా వ్యాయామం చేయాలి. నీళ్లు ఎక్కువగా తాగాలి. సమతులాహారం తీసుకోవాలి. ధూమపానం, మద్యపానం వదిలిపెట్టాలి.

విటమిన్లు, పోషక లోపాలు

శరీరంలో కొన్ని అత్యావశ్యక పోషకాలు లోపించినా కూడా చేతులు, కాళ్లు మొద్దుబారే సమస్య వస్తుంది. ముఖ్యంగా, విటమిన్‌ బి12, బి6, మెగ్నీషియం లోపాలు నాడుల పనితీరును ప్రభావితం చేస్తాయి. ఈ లోపం అలాగే కొనసాగితే నాడీ వ్యవస్థ బలహీనంగా మారుతుంది. ఇది చేతులు, కాళ్లలో మొద్దుబారే సమస్యను పెంచుతుంది.

ఏం చేయాలి?

తాజా ఆకుకూరలు, కూరగాయలు, పండ్లు, గింజలు, పాల పదార్థాలను ఆహారంలో భాగం చేసుకోవాలి. అవసరం అనుకుంటే డాక్టర్ల సూచన మేరకు విటమిన్‌ బి12, మెగ్నీషియం సప్లిమెంట్లు తీసుకోవాలి. ప్రాసెస్డ్‌ ఆహార పదార్థాలు, జంక్‌ఫుడ్‌ మోతాదుకు మించి తినడమూ మానుకోవాలి.