ప్రయాణాల్లో పాయిజనింగ్‌!

వర్షాకాలంలో ప్రకృతికాంత సరికొత్తగా ముస్తాబవుతుంది. సందర్శనకు రా రమ్మని ఆహ్వానిస్తుంది. అందుకే.. ఈ కాలంలో ‘నేచర్‌ టూరిజం’ టాప్‌ గేర్‌లో దూసుకెళ్తుంది. కానీ, ప్రకృతి సౌందర్యాన్ని ఆస్వాదిద్దామని వెళ్తే.. ‘ఫుడ్‌ పాయిజన్‌' ప్రమాదం పొంచి ఉంటుంది. తేమతో నిండిపోయే ఈ వాతావరణంలో.. ఆహారం త్వరగా పాడవుతుంది. ఆరోగ్యాన్ని దెబ్బతీస్తుంది. ఈ క్రమంలో, వర్షాకాలపు ప్రయాణాల్లో ఫుడ్‌ పాయిజన్‌ బారిన పడకుండా ఉండాలంటే.. ఈ సూచనలు పాటించండి.

వర్షాకాలంలో ప్రకృతికాంత సరికొత్తగా ముస్తాబవుతుంది. సందర్శనకు రా రమ్మని ఆహ్వానిస్తుంది. అందుకే.. ఈ కాలంలో ‘నేచర్‌ టూరిజం’ టాప్‌ గేర్‌లో దూసుకెళ్తుంది. కానీ, ప్రకృతి సౌందర్యాన్ని ఆస్వాదిద్దామని వెళ్తే.. ‘ఫుడ్‌ పాయిజన్‌’ ప్రమాదం పొంచి ఉంటుంది. తేమతో నిండిపోయే ఈ వాతావరణంలో.. ఆహారం త్వరగా పాడవుతుంది. ఆరోగ్యాన్ని దెబ్బతీస్తుంది. ఈ క్రమంలో, వర్షాకాలపు ప్రయాణాల్లో ఫుడ్‌ పాయిజన్‌ బారిన పడకుండా ఉండాలంటే.. ఈ సూచనలు పాటించండి.

• వర్షాల్లో ప్రకృతిని ఆస్వాదించాలంటే.. అడవిబాట పట్టాల్సిందే! ఇలాంటి మారుమూల ప్రాంతాల్లో పరిశుభ్రత పరిమితంగానే ఉంటుంది. కాబట్టి ఫారెస్ట్‌ టూరిజం చేసేటప్పుడు.. బేస్‌ క్యాంప్‌లో తాజాగా వండిన, వేడివేడి ఆహారాన్ని తిని బయల్దేరడమే సురక్షితం. అడవుల్లో ఈగలు, దోమల బెడదా ఎక్కువే! కాబట్టి, చల్లారిన ఆహారం, బఫే లాంటివి మానుకోండి.
• ప్రాంతమేదైనా.. ట్రావెలింగ్‌ అంటేనే స్ట్రీట్‌ ఫుడ్‌! చిరుజల్లుల్లో ప్రయాణిస్తున్నప్పుడు రోడ్డుపక్కన మిర్చీ బజ్జీలో, పకోడీనో కనిపిస్తే.. ఆత్మారాముడు ఆవురావురుమంటాడు. అయితే, వేరే కాలాల సంగతి ఎలా ఉన్నా.. వర్షాకాలంలో స్ట్రీట్‌ ఫుడ్‌ ఏమాత్రం మంచిదికాదు. మరీ జిహ్వాచాపల్యం ఆపుకోలేకపోతే.. అధిక టర్నోవర్‌ ఉండే స్టాల్స్‌ను ఎంచుకోండి. ఆహారం ఎలా తయారు చేస్తున్నారో చూడండి. మీ ముందే తాజాగా వండినవే ఆర్డర్‌ ఇవ్వండి.
• ముక్కలుగా కోసి రోడ్డు పక్కన అమ్మే పండ్లు ఆకర్షణీయంగా కనిపిస్తాయి. కానీ, అలాంటిచోట్ల పరిశుభ్రత తక్కువ. కలుషితమైన నీటితోనే పండ్లను కడుగుతుంటారు. కాబట్టి, ప్రయాణాలకు ప్లాన్‌ వేసినప్పుడే.. సీజనల్‌ పండ్లను వెంట తీసుకెళ్లండి. అందులోనూ అరటిపండ్లు, నారింజ, మందపాటి తొక్కలు ఉన్నవే ఎంచుకోండి.
• వర్షాకాలంలో నీటితోనే ఎక్కువ రోగాలు వ్యాపిస్తాయి. అందుకే, ఎక్కడపడితే అక్కడ నీళ్లు తాగకండి. వాటర్‌ బాటిల్స్‌ను.. అందులోనూ పేరున్న బ్రాండ్లనే ఎంచుకోండి.
• సాధారణంగా సలాడ్స్‌.. ఆరోగ్యకరమైన ఆహార పదార్థాలే! కానీ, వర్షాకాలంలో మాత్రం అనారోగ్యాన్ని కలిగించే అవకాశం ఉంటుంది. తడిగా ఉండే వాతావరణంలో కూరగాయలు, ఆకుకూరల్లో బ్యాక్టీరియా ఎక్కువగా వ్యాపిస్తుంది. ఉడికించకుండా తింటే.. ఆరోగ్యం దెబ్బతింటుంది.
• ఇక ప్రయాణాల్లో హ్యాండ్‌ శానిటైజర్‌ను వెంట ఉంచుకోండి. చేతులను తరచూ శుభ్రం చేసుకోండి.
• కడుపు నొప్పి, వికారం, విరేచనాలు వంటి లక్షణాలు కనిపిస్తే.. విశ్రాంతి తీసుకోండి. ఓఆర్‌ఎస్‌, ఎలక్ట్రోలైట్‌ పానీయాలతో శరీరాన్ని హైడ్రేటెడ్‌గా ఉంచుకోండి. లక్షణాలు తగ్గేవరకు ఘన ఆహారాన్ని పక్కన పెట్టండి. అవసరమైతే వైద్యుడిని సంప్రదించండి.