వానకాలం.. పాదాలు పైలం

చిన్నపాటి వాన కురిసినా.. వీధులన్నీ బురదమయం అవుతాయి. ఆ బురద, మురుగునీటిలో నడిస్తే.. పాదాలకు ఇన్ఫెక్షన్లు సోకుతాయి. చర్మం పొట్టు ఊడటం, దురద లాంటి సమస్యలూ చుట్టుముడతాయి.

చిన్నపాటి వాన కురిసినా.. వీధులన్నీ బురదమయం అవుతాయి. ఆ బురద, మురుగునీటిలో నడిస్తే.. పాదాలకు ఇన్ఫెక్షన్లు సోకుతాయి. చర్మం పొట్టు ఊడటం, దురద లాంటి సమస్యలూ చుట్టుముడతాయి. వానకాలంలో బురదనీటి ప్రభావం నుంచి పాదాలను రక్షించడంలో ఈ కింది చిట్కాలు సమర్థంగా పనిచేస్తాయి.

•  గోరు వెచ్చని నీటిలో కొద్దిగా యాంటీ సెప్టిక్‌ లిక్విడ్‌ లేదా కొద్దిగా ఉప్పు, పసుపు వేసి కలపాలి. అందులో పాదాలను ఐదు నిమిషాలపాటు ఉంచితే.. క్రిములు నశిస్తాయి. ఆ తర్వాత సబ్బుతో పాదాలను, వేళ్ల సందులను బాగా రుద్ది కడగాలి. పాదాలు పూర్తిగా తడి ఆరిపోయేలా, వేళ్ల మధ్యలో తేమ లేకుండా శుభ్రంగా తుడుచుకోవాలి. వేళ్ల మధ్య యాంటీ ఫంగల్‌ పౌడర్‌ రాసుకోవాలి. దీనివల్ల ఫంగల్‌ ఇన్ఫెక్షన్లు రాకుండా ఉంటాయి.
• కాళ్లు, పాదాలే కాదు.. వర్షాకాలంలో గోళ్ల పరిశుభ్రత కూడా చాలా ముఖ్యం. బురద నీళ్లు గోళ్ల కిందికి చేరితే.. ఇన్ఫెక్షన్‌తోపాటు గోళ్లు దెబ్బతినే అవకాశం ఉంటుంది. కాబట్టి, కాలి గోళ్లను చిన్నగా కత్తిరించుకోవాలి.
• కొబ్బరినూనెలో కొద్దిగా వేపనూనె లేదా పసుపు కలిపి.. రాత్రి పడుకునే ముందు పాదాలకు రాసుకోవాలి. దీనివల్ల చర్మం ఇన్ఫెక్షన్ల బారిన పడకుండా ఉంటుంది.
• ఈ కాలంలో త్వరగా ఆరిపోయే గమ్‌ బూట్లు, రబ్బర్‌ లేదా సిలికాన్‌ చెప్పులు వాడటం మంచిది. పాదాలకు గాలి తగిలేలా ఉండే ఓపెన్‌ ఫుట్‌వేర్‌ వాడితే.. నీరు, బురద లోపల నిలిచిపోకుండా బయటికి పోతుంది. ఇక క్యాన్వాస్‌ లేదా తోలు బూట్లను నివారించడమే మంచిది. లేకుంటే, ఇవి నీటిని ఎక్కువగా పీల్చుకుని ఇన్ఫెక్షన్లకు కారణమవుతాయి.
• పాదాలపై ఏవైనా చిన్న గాయాలు, పగుళ్లు, దెబ్బలు ఉంటే.. బురద నీటిలో అస్సలు నడవకూడదు. మురుగునీటిలోని బ్యాక్టీరియా.. ఈ గాయాల ద్వారా శరీరంలోకి ప్రవేశించే ప్రమాదం ఉంటుంది. తప్పనిసరి అయితే.. గాయానికి వాటర్‌ప్రూఫ్‌ బ్యాండేజ్‌ వేసుకుని వెళ్లాలి.
• బురద నీటి వల్ల వేళ్ల మధ్య చర్మం తెల్లగా మారి ఊడిపోతున్నా, తీవ్రమైన దురద, మంట ఉన్నా.. ఏమాత్రం నిర్లక్ష్యం చేయవద్దు. వెంటనే చర్మ వైద్యుణ్ని సంప్రదించాలి.