ఉత్సాహాన్నిచ్చే హార్మోన్‌ ఫుడ్‌

మనం ఏం చేశాం, ఏం చేయలేదు అన్నదానితో సంబంధం లేకుండా ఊరికే కొందరు అలసటకు గురవుతుంటారు. మధ్యాహ్నంలోపే సత్తువ లేనట్టు అయిపోతుంటారు. ఇది హార్మోన్ల అసమతుల్యతకు సంకేతం అంటున్నారు ఆరోగ్యనిపుణులు. వీటిని బ్యాలెన్స్‌ చేసుకునేందుకు మందులతో అవసరం లేకుండా కొన్ని ఆహార చిట్కాలనూ సూచిస్తున్నారు.

మనం ఏం చేశాం, ఏం చేయలేదు అన్నదానితో సంబంధం లేకుండా ఊరికే కొందరు అలసటకు గురవుతుంటారు. మధ్యాహ్నంలోపే సత్తువ లేనట్టు అయిపోతుంటారు. ఇది హార్మోన్ల అసమతుల్యతకు సంకేతం అంటున్నారు ఆరోగ్యనిపుణులు. వీటిని బ్యాలెన్స్‌ చేసుకునేందుకు మందులతో అవసరం లేకుండా కొన్ని ఆహార చిట్కాలనూ సూచిస్తున్నారు.

• సరిపడా నీళ్లు తాగడం వల్ల మెదడు త్వరగా అలసిపోదు. అలాగే నీళ్లలో పుదీన, నిమ్మరసం, బెర్రీల్లాంటి ఇతర పండ్లను చేర్చడం ద్వారా హార్మోన్ల పనితీరూ మెరుగవుతుంది.
• గ్రీక్‌ యోగర్ట్‌, పప్పు దినుసులు, టోఫు, గుడ్డులాంటివి ఒత్తిడిని కలిగించే హార్మోన్‌ అయిన కార్టిసోల్‌ స్థాయులను తగ్గిస్తాయి. అంతేకాదు, వీటిలో ఉండే ప్రొటీన్‌ రోజంతా ఉత్సాహంగా పనిచేయడానికి
  ఉపకరిస్తుంది.
• మంచి జీర్ణవ్యవస్థ మన హార్మోన్ల స్థాయిని సమతులంగా ఉంచేందుకు సాయపడుతుంది. అందుకోసం పీచు పదార్థాలు బాగా తినాలి. పీచులు ఉండే బీర, సొర, చిక్కుడులాంటి కూరగాయలు, తృణ ధాన్యాలు, చియా గింజల్లాంటివి ఇందుకోసం తీసుకోవాలి.
• శరీరంలో మెగ్నీషియం పుష్కలంగా ఉంటే తక్కువగా అలసటకు గురవుతారు. డార్క్‌ చాకొలెట్‌,
  పాలకూర లాంటి వాటిల్లో ఇది పుష్కలంగా దొరుకుతుంది. మెగ్నీషియం స్ట్రెస్‌ హార్మోన్లను నియంత్రణలో ఉంచేందుకు, కండరాలు త్వరగా కోలుకునేందుకు సాయపడుతుంది.
• నెమ్మదిగా జీర్ణమయ్యే కార్బోహైడ్రేట్లు కూడా హార్మోన్ల అసమతుల్యతను పోగొట్టేందుకు పనిచేస్తాయి. అందుకోసం క్వినోవా, చిలగడదుంప, ఓట్స్‌లాంటివి తింటే సరి.