క్లే ఆర్ట్.. మట్టితో బొమ్మలకు ప్రాణం పోసే వినూత్న సృజన. పర్యావరణ హితమైన ఈ కళలో పట్టున్న అతికొద్దిమందిలో హైదరాబాద్కు చెందిన సంగిశెట్టి సంగీత ఒకరు. క్లే ఆర్ట్ చిత్రకారిణిగా సంగీత ప్రతిభకు మెచ్చి ‘ఇండియా బుక్ ఆఫ్ రికార్డ్స్’, ‘తెలుగు బుక్ ఆఫ్ రికార్డ్స్’ తమ రికార్డు పుస్తకాల్లో ఆమెకో పేజీని కేటాయించాయి.
చిన్నప్పుడు మట్టితో ఆడుకుంటాం. మట్టి ముద్దలతో వినాయక విగ్రహాలు, బండి చక్రాలు చేసి మురిసిపోతాం. పెద్దయ్యాక మట్టి జోలికే వెళ్లం. కానీ, హైదరాబాద్కు చెందిన సంగిశెట్టి సంగీత చిన్ననాటి జ్ఞాపకాలను మదిలో పదిలంగా దాచుకొని.. ‘క్లే ఆర్ట్’ మీద పట్టు సాధించారు. మట్టిబొమ్మలకు ప్రాణం పోస్తున్నారు. క్లే ఆర్ట్లో అచ్చంగా పూలను పోలిన క్యారికేచర్ తరహా బొమ్మలు, వస్తువులు తయారు చేయవచ్చు. పెండ్లయిన తర్వాతే, సంగీత క్లే ఆర్ట్లో ప్రావీణ్యం సంపాదించారు. తన కాన్సెప్ట్కు తగ్గట్లుగా ఎటువంటి రికార్డూ లేకపోవడంతో 74 పని గంటల్లో.. పిస్తా పొట్టుపై మైక్రో క్లే ఆర్ట్ రూపంలో 154 కూరగాయలు, ఆహార పదార్థాలు, స్వీట్స్ బొమ్మలకు రూపం ఇచ్చారు. పిస్తా పొట్టు చాలా చిన్నగా ఉంటుంది. దానిపై మట్టి బొమ్మలు అంటే నేర్పు, ఓర్పు అవసరం. ఎంతో ఒత్తిడి ఎదురైనా, లెక్కచేయకుండా అనుకున్నది సాధించారు సంగీత. దీంతో ఇండియా బుక్ ఆఫ్ రికార్డ్స్, తెలుగు బుక్ ఆఫ్ రికార్డ్స్ ఓ సరికొత్త రికార్డును సంగీత పేరిట నమోదు చేశాయి. క్లే క్రాఫ్ట్స్కు మార్కెట్లో మంచి డిమాండ్ ఉంది. ఆన్లైన్ వేదికగానూ తన బొమ్మలను విక్రయిస్తున్నారు సంగీత. వీటిని గృహాలంకరణకు ఉపయోగించుకోవచ్చు. పెండ్లిళ్లు, పుట్టినరోజులకు బహుమతిగానూ ఇవ్వవచ్చు. గృహిణులకు, విద్యార్థులకు శిక్షణ కూడా ఇస్తున్నారు సంగీత (9177334491).