ఉల్లాసంగా.. ఉత్సాహంగా

కేయూలో ఇంటర్‌ కాలేజియేట్‌ అథ్లెటిక్స్‌ పోటీలు ఉత్సాహంగా మొదలయ్యాయి. వర్సిటీ క్రీడా ప్రాంగణంలో రెండు రోజుల పాటు జరిగే ఈ పోటీలను వీసీ ప్రొఫెసర్‌ రమేశ్‌ ప్రారంభించారు.

• కేయూలో ఇంటర్‌ కాలేజియేట్‌ స్పోర్ట్స్‌ షురూ
• 38 కళాశాలల నుంచి పాల్గొన్న 300మంది విద్యార్థులు
• తొలిరోజు సత్తాచాటిన క్రీడాకారులు
• వర్సిటీకి పేరు తేవాలి : కేయూ వీసీ రమేశ్‌

నయీంనగర్‌, నవంబర్‌ 16 : కేయూలో ఇంటర్‌ కాలేజియేట్‌ అథ్లెటిక్స్‌ పోటీలు ఉత్సాహంగా మొదలయ్యాయి. వర్సిటీ క్రీడా ప్రాంగణంలో రెండు రోజుల పాటు జరిగే ఈ పోటీలను వీసీ ప్రొఫెసర్‌ రమేశ్‌ ప్రారంభించారు. పోటీలకు ఉమ్మడి వరంగల్‌, ఖమ్మం, ఆదిలాబాద్‌ జిల్లాల్లోని 38 కళాశాలల నుంచి 300మంది క్రీడాకారులు పాల్గొంటుండగా తొలిరోజు బుధవారం నిర్వహించిన పరుగుపందెం, షాట్‌పుట్‌, లాంగ్‌జంప్‌, డిస్కస్‌త్రో విభాగాల్లో పలువురు సత్తాచాటారు.

పోటీపోటీగా..

మొదటిరోజు క్రీడాకారులు తమ అద్భుతమైన ఆటతీరుతో ఆకట్టుకున్నారు. పరుగుపందెం పోటీల్లో చిరుతల్లా పరుగెత్తుతూ నువ్వా నేనా అన్నట్లు తలపడ్డారు. హోరాహోరీగా సాగిన పరుగుపందెం పోటీల్లో పలువురు సత్తాచాటారు. బుధవారం పరుగుపందెం పోటీల విజేతలను ప్రకటించగా, గురువారం షాట్‌పుట్‌, లాంగ్‌జంప్‌, డిస్కస్‌త్రో పోటీల విజేతలను ప్రకటించనున్నారు. ఈ సందర్భంగా వీసీ రమేశ్‌ మాట్లాడుతూ విద్యార్థులకు మానసిక ఆరోగ్యంతో పాటు శారీరక ఆరోగ్యం ఎంతో అవసరమన్నారు. విశ్వవిద్యాలయ పేరుప్రతిష్టలు పెంచేలా ప్రతి విద్యార్థి కృషిచేయాలని ఆయన కోరారు.

తొలిరోజు విజేతలు..

• మహిళల 1500 మీటర్ల పరుగు పందెం పోటీలో కేయూ వ్యాయామ కళాశాల విద్యార్థి ఎం.కావ్య మొదటి స్థానం, ఖమ్మం ఎస్‌ఆర్‌ అండ్‌ బీజీఎన్‌ఆర్‌కు చెందినా షేక్‌ సమ్రీన్‌ రెండో స్థానం, మంచిర్యాల సీవీ రామన్‌ కళాశాల విద్యార్థి జే హని మూడో స్థానంలో నిలిచారు.
• పురుషుల విభాగంలో ఖమ్మం ఎస్‌ఆర్‌ అండ్‌ బీజీఎన్‌ఆర్‌కు చెందిన వి.రాజు, వి.జ్ఞానేశ్వర్‌ మొదటి, రెండో స్థానంలో సత్తాచాటగా ఆదిలాబాద్‌ మహర్షి డిగ్రీ కాలేజీ విద్యార్థి ఎస్‌.వంశీ ఉన్నారు.
• 100 మీటర్ల పురుషుల పరుగు పందెంలో మంచిర్యాల శ్రీ వికాస్‌ డిగ్రీ కాలేజీకు చెందిన పీఎస్‌.అభిలాష్‌ మొదటి స్థానం, మరిపెడ టీఎస్‌డబ్ల్యూఆర్‌డీసీకి చెందిన బి.రాము, బి.అనిల్‌ రెండు, మూడో స్థానాల్లో నిలిచారు.
• మహిళల విభాగంలో ఖమ్మం టీఎస్‌డబ్ల్యూఆర్డీసీ విద్యార్థి వి.సంధ్య మొదటి, టి.శ్రీవిద్య మూడో స్థానంలో నిలువగా ఆదిలాబాద్‌ ఆర్ట్స్‌ అండ్‌ కామర్స్‌ కళాశాల నుంచి కే.జంగూబాయి ప్రతిభచూపింది.

నేడు పోటీల ముగింపు

కేయూలో ఇంటర్‌ కాలేజియేట్‌ పోటీలు గురువారం ముగియనున్నాయి. పలు విభాగాల్లో సత్తాచాటిన విజేతలకు పతకాలు అందించనున్నారు. కార్యక్రమంలో క్యాంపస్‌ కళాశాల ప్రిన్సిపాల్‌ బి.సురేశ్‌లాల్‌, సవితా జ్యోత్స్న, వి.రమేశ్‌రెడ్డి, జి.సునీల్‌రెడ్డి, ఎస్‌.కుమారస్వామి, రవి, సురేందర్‌, వెంకన్న, సోమన్న, రవీందర్‌, కిరణ్‌కుమార్‌, పి.భాసర్‌, టి.శ్రీదేవి పాల్గొన్నారు.