మండలి పక్షనేతగా సిరికొండ

బీఆర్‌ఎస్‌ శాసన మండలి పక్షనేతగా ఉమ్మడి వరంగల్‌ జిల్లాకు చెందిన పార్టీ వ్యవస్థాపక సభ్యుడు, ఎమ్మెల్సీ సిరికొండ మధుసూదనాచారిని పార్టీ అధినేత కేసీఆర్‌ మంగళవారం నియమించారు.

• ఎమ్మెల్సీ మధుసూదనాచారిని నియమించిన పార్టీ అధినేత కేసీఆర్‌

జయశంకర్‌ భూపాలపల్లి, జూలై 23 (నమస్తే తెలంగాణ) : బీఆర్‌ఎస్‌ శాసన మండలి పక్షనేతగా ఉమ్మడి వరంగల్‌ జిల్లాకు చెందిన పార్టీ వ్యవస్థాపక సభ్యుడు, ఎమ్మెల్సీ సిరికొండ మధుసూదనాచారిని పార్టీ అధినేత కేసీఆర్‌ మంగళవారం నియమించారు. మధుసూదనాచారి తొలి తెలంగాణ శాసన సభాపతిగా సేవలందించారు. ప్రస్తుతం ఆయన ఎమ్మెల్సీగా కొనసాగుతున్నారు. ఉమ్మడి వరంగల్‌ జిల్లాలోని పరకాల మండలం నర్సక్కపల్లి గ్రామానికి చెందిన సిరికొండ మధుసూదనాచారి 1982 నుంచి 1997 వరకు తెలుగుదేశం పార్టీలో వివిధ స్థాయిల్లో పనిచేశారు.

వరంగల్‌ జిల్లా టీడీపీ అధ్యక్షుడిగా, రాష్ట్ర పార్టీ కార్యాలయ కార్యదర్శిగా, పొలిట్‌ బ్యూరో సభ్యుడిగా, అధికార ప్రతినిధిగా, బాధ్యతలు నిర్వర్తించారు. రాష్ట్ర ఫిలిం సెన్సార్‌ బోర్డు సభ్యుడిగా, వివిధ కార్పొరేషన్ల డైరెక్టర్‌గా సుదీర్ఘ కాలం సేవలందించారు. 1994లో మొదటిసారి శాయంపేట ఎమ్మెల్యేగా టీడీపీ నుంచి ఎన్నికై 1999 వరకు కొనసాగారు. 2000 సంవత్సరం నుంచి బీఆర్‌ఎస్‌ వ్యవస్థాపక సభ్యుడిగా కల్వకుంట్ల చంద్రశేఖర్‌ రావుతో కలిసి ముందుకు నడిచారు. బీఆర్‌ఎస్‌లో కార్యాలయ కార్యదర్శిగా, పొలిట్‌బ్యూరో సభ్యుడిగా, రాష్ట్ర అధికార ప్రతినిధిగా పనిచేశారు. 2014లో భూపాలపల్లి నుంచి ఎమ్మెల్యేగా గెలుపొంది శాసన సభాపతిగా సేవలందించారు. అనంతరం జరిగిన ఎన్నికల్లో ఎమ్మెల్యేగా పోటీ చేసి ఓటమి చెందినప్పటికీ కేసీఆర్‌ ఎమ్మెల్సీగా అవకాశం కల్పించారు. 2021 డిసెంబర్‌ 14 నుంచి ఎమ్మెల్సీగా కొనసాగుతున్న మధుసూదనాచారికి శాసన మండలి పక్షనేతగా కేసీఆర్‌ అవకాశం కల్పించారు.