భూపాలపల్లిలో సమ్మె సంపూర్ణం

• మూడోరోజూ విధులకు గైర్హాజరైన కార్మికులు
• స్తంభించిన బొగ్గు ఉత్పత్తి, రవాణా
• మూడురోజుల్లో 47,445 టన్నుల ఉత్పత్తికి విఘాతం
• టీబీజీకేఎస్‌ ఆధ్వర్యంలో భారీ ర్యాలీ, ధర్నా
• పాల్గొని సంఘీభావం తెలిపిన ఎమ్మెల్యే గండ్ర వెంకటరమణారెడ్డి
• బంద్‌ పాటించిన భూపాలపల్లి పట్టణ వ్యాపారులు

భూపాలపల్లి, డిసెంబర్‌ 11: భూపాలపల్లి ఏరియాలో సమ్మె సంపూర్ణంగా జరిగింది. కేంద్రంలోని బీజేపీ సర్కారు అవలంబి స్తున్న కార్మికవ్యతిరేక విధానాలను నిరసిస్తూ, సింగరేణి నాలుగు బొగ్గు బ్లాకుల వేలం నిర్ణయాన్ని ఉపసంహరించుకోవాలని జేఏసీ మూడు రోజుల సమ్మెకు పిలుపునిచ్చింది. చివరి రోజైన శనివారం అత్యవసర సిబ్బంది మినహా కార్మికులంద రూ స్వచ్ఛందంగా సమ్మెలో పాల్గొన్నారు. దీంతో భూపాలపల్లి ఏరియాలోని కేటీకే-1, కేటీకే-5, కేటీకే -6, కేటీకే -8 భూగర్భ గనులతోపాటు కేటీకే ఓసీపీ-2, కేటీకే ఓసీపీ-3లలో బొగ్గు ఉత్పత్తి పూర్తిగా నిలిచింది. బొగ్గు రవాణా కూడా జరుగలేదు. లారీలు, టిప్పర్లు ఎక్కడికక్కడే నిలిచాయి. జనరల్‌, మొదటి షిఫ్టుల్లో మొత్తం 3,400 మంది ఉద్యోగులు హాజరుకావాల్సి ఉండగా, అత్యవసర సిబ్బంది 501మంది ఉద్యోగులు మాత్ర మే హాజరయ్యారు. రెండో షిఫ్టులో మొత్తం 1,109 మంది ఉద్యోగులు హాజరుకావాల్సి ఉండగా అత్యవసర సిబ్బంది 169 మంది మాత్రమే హాజరయ్యారని భూపాలపల్లి ఏరియా సింగరేణి అధికార ప్రతినిధి అజ్మీరా తుకారాం తెలిపారు.

టీబీజీకేఎస్‌ ఆధ్వర్యంలో బైక్‌ ర్యాలీ, ధర్నా
టీఆర్‌ఎస్‌ అనుబంధ సింగరేణి గుర్తింపు సంఘమైన తెలంగాణ బొగ్గు గని కార్మిక సంఘం (టీబీజీకేఎస్‌) భూపాలపల్లి బ్రాంచి కమిటీ ఉపాధ్యక్షుడు కొక్కుల తిరుపతి ఆధ్వర్యంలో జిల్లా కేంద్రంలోని ప్రధాన రహదారి, కార్మిక కాలనీల్లో భారీ ద్విచక్రవాహన ర్యాలీ నిర్వహించారు. అనంతరం ఏరియాలోని కేటీకే ఓసీపీ-2వ గని వద్ద పెద్ద ఎత్తున ధర్నా చేపట్టారు. ఈ ర్యాలీ, ధర్నాలో భూపాలపల్లి ఎమ్మెల్యే గండ్ర వెంకటరమణారెడ్డి స్వయంగా పాల్గొని సంఘీభావం తెలిపారు. ఈ కార్యక్రమంలో భూపాలపల్లి మున్సిపల్‌ చైర్‌పర్సన్‌ సెగ్గం వెంకటరాణిసిద్ధు, శ్రీ భక్తాంజనేయ ఆలయ కమిటీ చైర్మన్‌ గడ్డం కుమార్‌రెడ్డి, టీఆర్‌ఎస్‌ భూపాలపల్లి పట్టణ అధ్యక్షుడు కటకం జనార్ధన్‌, కౌన్సిలర్లు, టీఆర్‌ఎస్‌ నాయకులు, టీబీజీకేఎస్‌ నాయకులు రత్నం సమ్మిరెడ్డి, బడితల సమ్మయ్య, తుమ్మెటి రఘోత్తంరెడ్డి, రాజిరెడ్డి, నలబెల్లి సదానందం, రాయిశెట్టి కనకయ్య, కొచ్చర్ల రవికుమార్‌, గాజే సాంబయ్య, భాషణపల్లి కుమారస్వామి పాల్గొన్నారు.
సింగరేణికే బొగ్గు బ్లాకులను కేటాయించాలి

• భూపాలపల్లి ఎమ్మెల్యే గండ్ర వెంకటరమణారెడ్డి
  అపార అనుభవం కలిగిన సింగరేణి సంస్థకే బొగ్గు బ్లాకులను కేటాయించాలని భూపాలపల్లి ఎమ్మెల్యే గండ్ర వెంకటరమణారెడ్డి కేంద్ర ప్రభుత్వాన్ని డిమాండ్‌ చేశారు. శనివారం టీబీజీకేఎస్‌ ఆధ్వర్యంలో నిర్వహించిన భారీ బైక్‌ ర్యాలీ, ధర్నాలో పాల్గొని సంఘీభావం తెలిపారు. ఈ సందర్భంగా ఎమ్మెల్యే మాట్లాడుతూ నరేంద్రమోదీ ప్రధాని అయిన తర్వాత దేశంలోని ప్రభుత్వ రంగ సంస్థలను నిర్వీర్యం చేస్తూ కారుచౌకగా ప్రైవేట్‌ వ్యక్తులకు అమ్మే ప్రయత్నం చేస్తున్నారని దుయ్యబట్టారు. సింగరేణిలో 45వేల మంది పర్మినెంట్‌ కార్మికులు, 25వేల మంది కాంట్రాక్ట్‌ కార్మికులు ప్రత్యక్షంగా, 10 లక్షల మంది ప్రజలు పరోక్షంగా ఉపాధి పొందుతున్నారని ఎమ్మెల్యే చెప్పారు. కేంద్రం నిర్ణయానికి వ్యతిరేకంగా సింగరేణి పర్మినెంట్‌, కాంట్రాక్ట్‌ కార్మికులు మెరుపు సమ్మె చేస్తున్నారన్నారు. లాభాలు ఆర్జిస్తున్న సింగరేణి సంస్థకు అదనంగా బొగ్గు బ్లాకులను కేటాయించాల్సింది పోయి, నాలుగు బ్లాకులను ప్రైవేట్‌ వ్యక్తులకు అప్పగించాలనే నిర్ణయాన్ని సింగరేణి కార్మికలోకం, యావత్‌ తెలంగాణ సమాజం ముక్తకఠంతో వ్యతిరేకిస్తోందన్నారు. తెలంగాణ రాష్ట్ర ముఖ్యమంత్రి కల్వకుంట్ల చంద్రశేఖర్‌రావు ఇక్కడి అవసరాలను దృష్టిలో పెట్టుకుని 2015లోనే సింగరేణి సంస్థకు ఇక్కడి బొగ్గు బ్లాకులతోపాటు ఒడిషా రాష్ట్రంలోని బొగ్గు బ్లాకులను కేటాయించాలని కేంద్రాన్ని కోరినట్లు తెలిపారు. సింగరేణి నాలుగు బ్లాకులను ప్రైవేట్‌ వ్యక్తులకు వేలం ద్వారా అప్పగించాలని చూస్తున్న కేంద్రంలోని మోదీ ప్రభుత్వం మున్ముందు సింగరేణి సంస్థలో ఉన్న కేంద్రం వాటా 49 శాతం కూడా అమ్మకానికి పెట్టే ప్రమాదం ఉందని ఎమ్మెల్యే ఆందోళన వ్యక్తం చేశారు. సింగరేణి సంస్థ గణనీయమైన వృద్ధిరేటు సాధిస్తూ ప్రతి ఆర్థిక సంవత్సరం లాభాలను గడిస్తోందని, సింగరేణికే బొగ్గు బ్లాకులను కేటాయిస్తే, సంస్థ భవితవ్యం బాగుంటుందన్నారు. సింగరేణి సొంతంగా రైల్వే లైన్లు కూడా వేసుకుంటోందని తెలిపారు. కేంద్ర ప్రభుత్వం బొగ్గు బ్లాకుల వేలం నిర్ణయాన్ని వెనక్కు తీసుకునే వరకు పోరాటం కొనసాగుతుందన్నారు.