Visit:
నమస్తే తెలంగాణ నెట్‌వర్క్‌ : ఉద్యమ నాయకుడు కేసీఆర్‌ దీక్షా దక్షత తెలంగాణకు దారి చూపింది. సకల జనులను ఏకం చేసింది.. 11 రోజుల ఆమరణ నిరాహార దీక్ష స్వరాష్ట్ర సాధనకు పునాదులు వేసింది. తెలంగాణ సమాజాన్ని జాగృతం చేసి.., ఊరూరూ పిడికిలెత్తి కొట్లాడేలా.. ‘ఇది నా తెలంగాణ’ అని గర్జించేలా కార్యోణ్ముకులను చేసింది. 2009 నవంబర్‌ 29న కేసీఆర్‌ చేపట్టిన ఆమరణ నిరాహార దీక్ష ఢిల్లీ మెడలు వంచి.., రాష్ర్టాన్ని సాధించేలా తెలంగాణ సమాజాన్ని ముందుకు నడిపింది. ఏటా ఇదే రోజు దీక్షా దివస్‌ పేరుతో బీఆర్‌ఎస్‌ ఆధ్వర్యంలో ప్రత్యేక కార్యక్రమాలు నిర్వహిస్తున్నారు. తెలంగాణకు అడుగడుగునా అడ్డుపడిన ఆంధ్రా పాలకుల కుట్రలను ఛేదిస్తూ రాష్ట్రం సాధించిన తీరును యాది చేసుకుంటున్నారు. శనివారం ఉమ్మడి వరంగల్‌ జిల్లావ్యాప్తంగా ‘దీక్షా దివస్‌’ పేరుతో ప్రత్యేక కార్యక్రమాలు నిర్వహించారు.
సమరోత్సాహంతో పాల్గొన్ని బీఆర్‌ఎస్‌ శ్రేణులు తెలంగాణ తొలి ముఖ్యమంత్రి కేసీఆర్‌ చిత్రపటాలకు పాలాభిషేకాలు చేశారు. హనుమకొండ జిల్లాలోని కాళోజీ విగ్రహం వద్ద బీఆర్‌ఎస్‌ జిల్లా అధ్యక్షుడు దాస్యం వినయ్‌భాస్కర్‌ ఆధ్వర్యంలో నిర్వహించిన కార్యక్రమంలో ముఖ్యఅతిథిగా శాసన మండలిలో ప్రతిపక్ష నేత, ఎమ్మెల్సీ మధుసూదనాచారి, రాజ్యసభ మాజీ సభ్యుడు కెప్టెన్‌ లక్ష్మీకాంతరావు, మాజీ ఎమ్మెల్యేలు చల్లా ధర్మారెడ్డి, వొడితల సతీశ్‌బాబు పాల్గొన్నారు. తెలంగాణకు 60 ఏండ్లలో జరిగిన వివక్షత, అన్యాయాన్ని ప్రజలకు తెలిసేలా చేసి, నాటి పాలకుల మెడలు వంచి తెలంగాణను సాధించిన నేత కేసీఆర్‌ అని అన్నారు. త్యాగాల పునాదులపై ఏర్పడిన తెలంగాణ రాష్ర్టానికి ఏనాడు జై తెలంగాణ అనని పాపాల రేవంత్‌రెడ్డి ముఖ్యమంత్రి అయ్యాడని మధుసూదనాచారి అన్నారు.
మహబూబాబాద్‌ జిల్లాకేంద్రంలోని బీఆర్‌ఎస్‌ పార్టీ జిల్లా కార్యాలయంలో పార్టీ జిల్లా అధ్యక్షురాలు మాలోత్‌ కవిత అధ్యక్షతన నిర్వహించిన కార్యక్రమంలో ఎమ్మెల్సీ తక్కళ్లపల్లి రవీందర్‌రావు, మాజీ మంత్రి సత్యవతిరాథోడ్‌, మాజీ ఎమ్మెల్యేలు డీఎస్‌ రెడ్యానాయక్‌, శంకర్‌నాయక్‌ పాల్గొన్నారు.తెలంగాణ రాష్ట్రం ఇస్తామని చెప్పి కేంద్రంలో, రాష్ట్రంలో అధికారంలోకి వచ్చిన కాంగ్రెస్‌ పార్టీ మోసం చేయడంతో 2009 నవంబర్‌ 29న కేసీఆర్‌ ఆమరణ నిరాహార దీక్షకు పూనుకున్నారని, దెబ్బకు కేంద్రం దిగొచ్చి తెలంగాణ రాష్ట్రం ఇచ్చిందని తకళ్లపల్లి రవీందర్‌రావు అన్నారు. జనగామ జిల్లా యశ్వంతాపూర్‌లోని బీఆర్‌ఎస్‌ జిల్లా కార్యాలయంలో నిర్వహించిన వేడుకల్లో ముఖ్య అతిథిగా ఎమ్మెల్యే డాక్టర్‌ పల్లా రాజేశ్వర్‌ రెడ్డి, విశిష్ట అతిథిగా మాజీ మంత్రి ఎర్రబెల్లి దయాకర్‌రావు, మాజీ ఎమ్మెల్యే డాక్టర్‌ తాటికొండ రాజయ్య పాల్గొన్నారు.
అలాగే పాలకుర్తి, పర్వతగిరి మండలకేంద్రాల్లో కేసీఆర్‌ చిత్రపటానికి తెలంగాణ ఉద్యమకారులు, బీఆర్‌ఎస్‌ శ్రేణులతో కలిసి మాజీ మంత్రి ఎర్రబెల్లి దయాకర్‌రావు పాలాభిషేకం చేశారు. ఈ సందర్భంగా ఆయన మాట్లాడుతూ.. ఆమరణ నిరాహార దీక్షతో ఢిల్లీ మెడలు రాష్ర్టాన్ని సాధించిన గొప్ప నాయకుడు కేసీఆర్‌ అని కొనియాడారు. ములుగు జిల్లా ఏటూరునాగారంలోని బస్టాండ్‌ సెంటర్‌లో ఉన్న ప్రొఫెసర్‌ జయశంకర్‌, తెలంగాణ తల్లి విగ్రహాలకు పార్టీ జిల్లా అధ్యక్షుడు కాకులమర్రి లక్ష్మీనర్సింహారావు పూల మాలలు వేసి, పాలాభిషేకం చేశారు. జయశంకర్‌ భూపాలపల్లి జిల్లా కేంద్రంలోని బీఆర్‌ఎస్‌ పార్టీ జిల్లా కార్యాలయంలో భూపాలపల్లి మాజీ ఎమ్మెల్యే గండ్ర వెంకటరమణారెడ్డి, బీఆర్‌ఎస్‌ పార్టీ జిల్లా అధ్యక్షురాలు గండ్ర జ్యోతిరెడ్డి, వరంగల్‌ జిల్లా పోచంమైదాన్‌ సెంటర్‌లో నిర్వహించిన దీక్షా దివస్‌లో మాజీ ఎమ్మెల్యే నన్నపునేని నరేందర్‌, నర్సంపేట పట్టణంలోని అమరవీరుల స్తూపం వద్ద జరిగిన దీక్షా దివస్‌లో మాజీ ఎమ్మెల్యే పెద్ది సుదర్శన్‌రెడ్డి పాల్గొన్నారు.
అలాగే హనుమకొండలోని కాకతీయ యూనివర్సిటీ ఎస్డీఎల్సీఈ ప్రాంగణంలో నిర్వహించిన దీక్షా దివస్‌లో మాజీ వికలాంగుల కార్పొరేషన్‌ చైర్మన్‌, విద్యార్థి ఉద్యమ నాయకుడు కేతిరెడ్డి వాసుదేవరెడ్డి, ప్రొఫెసర్‌ దినేష్‌కుమార్‌, బీఆర్‌ఎస్వీ కేయూ అధ్యక్షుడు బైరపాక ప్రశాంత్‌, యూనివర్సిటీ ఇన్‌చార్జి జెట్టి రాజేందర్‌, బీఆర్‌ఎస్వీ రాష్ట్ర ప్రధాన కార్యదర్శి మాచర్ల శరత్‌చంద్రతో పాటు విద్యార్థులు తదితరులు పాల్గొన్నారు.
