Viral Video: క్రాకర్స్‌కు భయపడిన గుర్రం… కూర్చొన్న పెళ్లి కుమారుడితో సహా పరుగు

న్యూఢిల్లీ: ఒక్కసారిగా పటాకులు కాల్చడంతో భయపడిన గుర్రం, పైన కూర్చొన్న పెళ్లి కుమారుడితో సహా అక్కడి నుంచి పరుగెత్తింది. ఒక పెళ్లి వేడుకలో జరిగిన ఈ ఘటనకు సంబంధించిన వీడియో సోషల్‌ మీడియాలో వైరల్‌ అయ్యింది. సాధారణంగా పెళ్లిళ్లలో ఊరేగింపు కోసం గుర్రాలను వినియోగిస్తారు. అయితే బ్యాండ్‌ మేళం, టపాకుల మోతకు అవి బెదిరిపోతాయి. అలాంటప్పుడు గుర్రాలను నియంత్రించడం చాలా కష్టం. కొన్నిసార్లు ఊహించని ప్రమాదాలు కూడా జరుగుతుంటాయి.

ఇలాంటి తరహా ఘటన ఒక పెళ్లి వేడుకలో జరిగింది. పెళ్లి కొడుకు గుర్రంపై కూర్చొన్నాడు. ఊరేగింపునకు అంతా సిద్ధమవుతున్నారు. దీనికి ముందు కొన్ని పూజలు నిర్వహించారు. అయితే ఒకవైపు మేళ తాళాలకు ఆ గుర్రం బెదిరి ఉన్నది. మరోవైపు కొందరు ఉన్నట్టుండి క్రాకర్స్‌ కాల్చారు. దీంతో భయంతో మరింత బెదిరిపోయిన ఆ గుర్రం అక్కడి నుంచి వేగంగా పరుగెత్తింది. దాని పైనే పెళ్లి కుమారుడు కూర్చొని ఉన్నాడు. అతడి పరిస్థితిని మాటల్లో చెప్పలేం.

మరోవైపు గుర్రానికి చెందిన వ్యక్తి కూడా దాని వెంట పరుగెత్తాడు. అయితే గుర్రం వేగాన్ని అందుకోలేకపోయాడు. ఊహించని ఈ ఘటనకు పెళ్లి కుమారుడి కుటుంబ సభ్యులు, బంధువులు షాక్‌ అయ్యారు. ఏమి చేయాలో అన్నది వారికి పాలుపోలేదు. ‘గంటా’ అనే ఇన్‌స్టాగ్రామ్‌ ఖాతాలో పోస్ట్‌ చేసిన ఈ వీడియో సోషల్‌ మీడియాలో వైరల్‌ అయ్యింది. ఇప్పటికే 40 లక్షలకుపైగా ఈ వీడియోను వీక్షించారు. గుర్రంపైన ఉన్న పెళ్లి కుమారుడి పరిస్థితిపై పలువురు ఫన్నీగా కామెంట్లు చేశారు.

 

View this post on Instagram

 

A post shared by memes | comedy (@ghantaa)