ఇంటర్నెట్‌ వాడకంలో ఆమెదే పైచేయి

పొద్దున నిద్రలేచింది మొదలు పడుకొనేవరకు ఇంటర్నెట్‌ లేని మనిషి జీవితాన్ని ఊహించలేం. ఇలాంటి పరిస్థితుల్లో ఇప్పటి వరకు ఇంటర్నెట్‌ వాడని వాళ్లు కూడా ఉన్నారంటే నమ్మగలమా? దేశంలోని మగవాళ్లలో సగం మంది ఇంటర్నెట్‌ వినియోగించలేదట. పురుషులతో పోల్చితే మహిళలే ముందువరుసలో ఉన్నారట. ఆశ్చర్యంగా అనిపించినా జాతీయ కుటుంబ ఆరోగ్య సర్వే-5 (2019-21)లో తేలింది ఇదే

• సగం మంది మగవాళ్లకు తెల్వదు
• టీవీ చూడటంలో ఇద్దరూ సమానం
• థియేటర్లలో పురుషులదే పైచేయి
• నామమాత్రంగా రేడియో శ్రోతలు
• జాతీయ కుటుంబ సర్వే నివేదిక

హైదరాబాద్‌, మే 8 (నమస్తే తెలంగాణ): పొద్దున నిద్రలేచింది మొదలు పడుకొనేవరకు ఇంటర్నెట్‌ లేని మనిషి జీవితాన్ని ఊహించలేం. ఇలాంటి పరిస్థితుల్లో ఇప్పటి వరకు ఇంటర్నెట్‌ వాడని వాళ్లు కూడా ఉన్నారంటే నమ్మగలమా? దేశంలోని మగవాళ్లలో సగం మంది ఇంటర్నెట్‌ వినియోగించలేదట. పురుషులతో పోల్చితే మహిళలే ముందువరుసలో ఉన్నారట. ఆశ్చర్యంగా అనిపించినా జాతీయ కుటుంబ ఆరోగ్య సర్వే-5 (2019-21)లో తేలింది ఇదే. అంతేకాదు.. ఆడవాళ్లు టీవీలకు అతుక్కుపోతారని, సీరియళ్ల పిచ్చి ఎక్కువనే భావన అందరిలో ఉన్నది. కానీ ఇది నిజం కాదట. టీవీ చూడటంలో పురుషులు, మహిళలు సమానంగా ఉన్నారని సర్వే పేర్కొన్నది. దేశవ్యాప్తంగా ఉన్న పురుషుల్లో 51.2 శాతం మంది ఇప్పటి వరకు ఇంటర్నెట్‌ వినియోగించలేదని సర్వేలో తేలింది. 48.8 శాతం మందే ఇంటర్నెట్‌ వాడుతున్నట్టు తే ల్చింది. ఈ విషయంలో మహిళలు చాలా ముందు ఉన్నట్టు వెల్లడించింది. 33.3 శాతం మందే ఇంటర్నెట్‌కు దూరంగా ఉన్నారు. అంటే.. 66.7 శాతం మందికి ఇంటర్నెట్‌ పరిచయం ఉన్నది. తెలంగాణలోనూ దాదాపు ఇదే పరిస్థితి. పురుషుల్లో 50 శాతం మంది మాత్రమే ఇంటర్నెట్‌ వాడుతుంటే, మహిళలు ఏకంగా 73.5 శాతం మందికి అంతర్జాలంతో పరిచయం ఉన్నది.

 

సర్వేలోని ఆసక్తికర అంశాలివీ..

• అత్యధికంగా ఛండీగఢ్‌లో 91.9 శాతం మంది పురుషులు, 75.2 శాతం మంది మహిళలు ఇప్పటి వరకు ఇంటర్నెట్‌ను వినియోగించలేదు.
• బీహార్‌ ఇంటర్నెట్‌ వినియోగంలో దేశంలోనే ముందు వరుసలో ఉన్నది. అక్కడ పురుషుల్లో 64.6 శాతం మంది, మహిళల్లో 79.4 శాతం మంది ఇంటర్నెట్‌ వాడుతున్నారు.
• టీవీ చూడటంలో మహిళల కన్నా పురుషులే ఎక్కువ. కనీసం వారానికి ఒకసారి టీవీ చూసేవారి సగటు దేశవ్యాప్తంగా మహిళల్లో 53.5 శాతంగా ఉండగా, పురుషుల్లో 55.9 శాతంగా ఉన్నది. రాష్ట్రంలో 75.1 శాతం మంది మహిళలు వారానికి ఒక సారి టీవీ చూస్తామని చెప్పగా, పురుషుల్లో 75.2 శాతం మంది ఉన్నారు.
• దేశంలో టాప్‌లో గోవాలో 95.5% మంది పురుషులు, 85% మంది మహిళలు టీవీ చూస్తున్నారు.
• అత్యల్పంగా మేఘాలయలో 30.4% పురుషులు, అస్సాంలో 35.9% మహిళలు టీవీ చూస్తున్నారు.
• దేశవ్యాప్తంగా సగటున 5.9 శాతం మంది కనీసం వారానికి ఒకసారి రేడియో వింటామని చెప్పారు. తెలంగాణలో పురుషుల్లో 6.1 శాతం మంది, మహిళల్లో 2.1 శాతం మంది రేడియో వినే అలవాటు ఉన్నదని తెలిపారు. అత్యధికంగా లఢక్‌లో 32.2 శాతం మంది రేడియో శ్రోతలు ఉన్నారు.
• వారానికి ఒక వార్తాపత్రికనో మ్యాగజైనో చదివేవారి సగటు 23.35 శాతమే. తెలంగాణలో పురుషులు 41.6 శాతం, మహిళలు 17.1 శాతం. పేపర్‌ చదవటంలో కేరళ తొలి స్థానం, అస్సాం, అరుణాచల్‌ ప్రదేశ్‌ చివరి స్థానాల్లో ఉన్నాయి.