Visit:
హైదరాబాద్‌, నవంబర్‌ 30 (నమస్తే తెలంగాణ): జర్నలిస్టులపై కాంగ్రెస్‌ సర్కారు శీతకన్ను చూస్తున్నది. అధికారంలోకి వచ్చిన వెంటనే ఇండ్ల స్థలాలు, అర్హులందరికీ అక్రికెడిటేషన్‌ మంజూరు చేస్తామంటూ ఊదరగొట్టిన కాంగ్రెస్‌.. ఆచరణలో అలసత్వాన్ని ప్రదర్శిస్తున్నది. రెండేండ్లయినా వాటి ఊసేలేదు. 100 కోట్ల సంక్షేమనిధి పత్తాలేదు.. హెల్త్‌కార్డుల జాడలేదు. కొత్త అక్రెడిటేషన్ల ప్రక్రియను దాటవేస్తుండటంపై జర్నలిస్టు సంఘాలు ఆగ్రహం వ్యక్తం చేస్తున్నాయి. ఇప్పటికే ఆరుసార్లు గడువు పొడిగించిన ప్రభుత్వం మరోసారి గడువు పెంచేందుకు సిద్ధమవుతున్నదని మండిపడుతున్నాయి. సంబంధిత మంత్రి నెలకోసారి సమీక్షా సమావేశం పెట్టడం తప్ప చేసిందేమీలేదని ఆగ్రహం వ్యక్తంచేస్తున్నాయి.
గత బీఆర్‌ఎస్‌ ప్రభుత్వం 2022లో 16,337 మంది జర్నలిస్టులకు అక్రెడిటేషన్లు మంజూరు చేసింది. ఈ గడువు 2024 జూన్‌ 30తో ముగిసింది. అప్పటి నుంచి కాంగ్రెస్‌ సర్కారు మూడు నెలలకోసారి గడువు పొడిగిస్తూ వస్తున్నది. సెప్టెంబర్‌తో కలుపుకుని ఆరుసార్లు పొడిగించింది. మరోసారి గడువు పెంచేందుకు అడుగులు వేస్తున్నదని జర్నలిస్టు సంఘాలు ఆరోపిస్తున్నాయి.
అక్రెడిటేషన్ల మంజూరులో తీవ్ర నిర్లక్ష్యాన్ని ప్రదర్శిస్తున్న ప్రభుత్వం.. ఇండ్ల స్థలాల మాటే ఎత్తడం లేదు. ఈ విషయంపై జర్నలిస్టు సంఘాలు ఉన్నతాధికారులు, మంత్రికి విన్నవించినా రేపు మాపు అంటూ దాటవేత ధోరణిని అవలంబిస్తున్నారు. కోర్టు కేసులు, భూ వివాదాలను సాకుగా చూపి తప్పించుకుంటున్నదని జర్నలిస్టు సంఘ నాయకులు మండిపడుతున్నారు.
కాంగ్రెస్‌ సర్కారుకు జర్నలిస్టులంటే ఎందుకంత చిన్నచూపని సమస్యల పరిష్కారానికి 3న మహాధర్నా జర్నలిస్టుల సమస్యలు పరిష్కరించాలని డిమాండ్‌ చేస్తూ టీయూడబ్ల్యూజే (ఐజేయూ) పోరుబాటకు సిద్ధమైంది. ఈ క్రమంలో ఈనెల 3న హైదరాబాద్‌, మాసాబ్‌ట్యాంక్‌లోని రాష్ట్ర సమాచార కమిషనర్‌ కార్యాలయం ఎదుట మహాధర్నా నిర్వహించనున్నామని యూనియన్‌ బాధ్యులు ప్రకటించారు. ఇప్పటికే సన్నాహలు పూర్తిచేశామని పేర్కొన్నారు. ఈ కార్యక్రమంలో జర్నలిస్టులు అధిక సంఖ్యలో పాల్గొని విజయవంతం చేయాలని పిలుపునిచ్చారు.
