RRR Alignment | ట్రిపుల్‌ ఆర్‌ అలైన్‌మెంట్‌ మార్పు అసలు గుట్టు తేల్చాలి.. సీబీఐ ద‌ర్యాప్తు జ‌ర‌పాల్సిందే.. ప్ర‌శాంత్ రెడ్డి డిమాండ్ 

RRR Alignment | నేషనల్‌ హైవే అథారిటీ ఆఫ్‌ ఇండియా (ఎన్‌హెచ్‌ఏఐ) గతంలోనే రూపొందించిన ఆర్‌ఆర్‌ఆర్‌ దక్షిణ భాగం అలైన్‌మెంట్‌ను మార్చటం వెనుక మతలబు ఏమిటని రాష్ట్ర ప్రభుత్వాన్ని మాజీమంత్రి, ఎమ్మెల్యే వేముల ప్రశాంత్‌రెడ్డి ప్రశ్నించారు.

• కేంద్ర మంత్రి బండి సంజయ్‌ చొరవ తీసుకోవాలి
• లేదంటే కాంగ్రెస్‌ – బీజేపీలు కుమ్మక్కు అయినట్టే
• అలైన్‌మెంట్‌ మార్పుతో ప్రభుత్వ పెద్దల భూదందా
• వందల ఎకరాల చెర.. అందుకే ట్రిపుల్‌ ఆర్‌పై కుట్ర
• ఫోర్త్‌సిటీ కోసం రూట్‌ మార్చారన్నది పచ్చి అబద్ధం
• కొత్త అలైన్‌మెంట్‌తోనే రింగ్‌రోడ్డు మరింత దూరం
• మార్పుల మర్మమేమిటో ముఖ్యమంత్రి చెప్పాలి
• అలైన్‌మెంట్‌కు గ్రామసభల ఆమోదం పొందాలి
• మార్పుతో లాభనష్టాలను ప్రజలకు వివరించాలి
• యథేచ్ఛగా మారిస్తే కేంద్రం ట్రిపుల్‌ఆర్‌ చేపట్టదు
• అందుకే రాష్ట్ర ప్రభుత్వమే ప్రాజెక్టు చేపట్టేలా స్కెచ్‌
• తద్వారా సొంత కాంట్రాక్టర్లకు లబ్ధి చేకూర్చే ప్లాన్‌
• వరల్డ్‌బ్యాంకు అప్పు కోసం దేబరింపు దానికోసమే
• పెద్దల స్వలాభానికి ప్రజలపై 12,500 కోట్ల భారం
• ట్రిపుల్‌ఆర్‌ తెచ్చానన్న కిషన్‌రెడ్డి స్పందించట్లేదేం?
• కొత్త అలైన్‌మెంట్‌పై మాజీమంత్రి ప్రశాంత్‌రెడ్డి ఫైర్‌

RRR Alignment | హైదరాబాద్‌ సిటీబ్యూరో ప్రధాన ప్రతినిధి, సెప్టెంబర్‌ 20 (నమస్తే తెలంగాణ): నేషనల్‌ హైవే అథారిటీ ఆఫ్‌ ఇండియా (ఎన్‌హెచ్‌ఏఐ) గతంలోనే రూపొందించిన ఆర్‌ఆర్‌ఆర్‌ దక్షిణ భాగం అలైన్‌మెంట్‌ను మార్చటం వెనుక మతలబు ఏమిటని రాష్ట్ర ప్రభుత్వాన్ని మాజీమంత్రి, ఎమ్మెల్యే వేముల ప్రశాంత్‌రెడ్డి ప్రశ్నించారు. ఫ్యూచర్‌ సిటీ కోసమే ఈ మార్పు అని కాంగ్రెస్‌ ప్రభుత్వ పెద్దలు చెప్తున్నా.. మునుపటిదాని కంటే కొత్త అలైన్‌మెంట్‌ ఆ సిటీకి మరింత దూరం ఎందుకు పోతున్నదో సమాధానం చెప్పాలని డిమాండ్‌చేశారు.

గత కొన్నిరోజులుగా ఆర్‌ఆర్‌ఆర్‌ దక్షిణ భాగం అలైన్‌మెంట్‌ మార్పుపై గ్రామాల్లో ఆందోళన వ్యక్తమవుతున్న తరుణంలో శుక్రవారం తెలంగాణభవన్‌లో ప్రశాంత్‌రెడ్డి మీడియా సమావేశం నిర్వహించారు. అలైన్‌మెంట్‌ మార్పు వెనుక కుట్రలు ఉన్నాయని పక్కా ఆధారాలతో గుట్టు విప్పారు. దక్షిణ భాగం మొత్తం అలైన్‌మెంట్‌ మారకుండా కేవలం కాంగ్రెస్‌, ప్రభుత్వ పెద్దలకు సంబంధించి వందల ఎకరాల భూములు ఉన్నచోటే ఎందుకు మారింది? అంటూ నిలదీశారు. కాంగ్రెస్‌ ప్రభుత్వం వచ్చిన నెల రోజుల నుంచే పేద రైతులు దశాబ్దాల నుంచి సాగు చేసుకుంటున్న కుందారం భూములు బిగ్‌ బ్రదర్స్‌ ఖాతాలోకి పోతున్న వైనాన్ని ఎండగట్టారు.

ఆ కుందారం భూముల సమీపంలోకే రింగ్‌ రోడ్డు అలైన్‌మెంట్‌ పరుగులు పెట్టడం వెనుక ఆంతర్యమేమిటి? అని ఎండగట్టారు. కేవలం ప్రభుత్వ పెద్దల భూముల ధరలు పెంచుకునేందుకే అలైన్‌మెంట్‌ మార్పు కుట్ర జరుగుతున్నదని కుండబద్దలు కొట్టా రు. మార్పు వల్ల కేంద్రం నుంచి తెలంగాణకు రూ.12,500 కోట్ల నిధులు రాకున్నా.. ప్రపంచ బ్యాంకు రుణంతో ఆ ప్రాజెక్టును చేపట్టి తమ భూ ముల ధరలు పెంచుకునే మహా పన్నాగాన్ని రేవంత్‌ ప్రభుత్వం రచించిందని ఆరోపించారు.

తెలంగాణ ప్రజలను అప్పుల ఊబిలోకి నెట్టడంతో పాటు అ మాయక, పేద రైతుల భూములను చీల్చుతున్న, కొల్లగొడుతున్న ఈ అరాచక వ్యవహారంపై వెంటనే కేంద్రం సీబీఐ విచారణ జరిపించాలని డిమాండ్‌ చేశారు. కేంద్ర మంత్రులు కిషన్‌రెడ్డి, బండి సంజ య్‌ వెంటనే సీబీఐ విచారణ వేయించాలని, లేకపోతే బీజేపీ-కాంగ్రెస్‌ ఒకటేనని తెలంగాణ ప్రజలు నమ్మాల్సి వస్తుందని హెచ్చరించారు. మీడియా సమావేశ వివరాలు వేముల మాటల్లోనే..

ఆర్‌ఆర్‌ఆర్‌ కథ ఇదీ..
అంతకుముందు వాహనాలు జాతీయ రహదారుల మీదుగా ఢిల్లీ, బెంగళూరు, ముంబైకి వెళ్లాలం టే హైదరాబాద్‌ సిటీ నుంచి వెళ్లాయి. నగర ట్రాఫిక్‌పై తీవ్ర ఒత్తిడి పెరగటంతో అప్పట్లో ఇన్నర్‌ రింగ్‌రోడ్డు ఏర్పాటు చేశారు. దీంతో ఆ వాహనాలన్నీ ఇన్నర్‌ రింగు రోడ్డు మీదుగా వెళ్లేవి. కాలక్రమేణా ఆ ఇన్నర్‌ రింగు రోడ్డు కూడా నగర ట్రాఫిక్‌తో కిక్కిరిసిపోయింది. అనంతరం ఔటర్‌ రింగ్‌రోడ్డు నిర్మా ణం చేపట్టారు. ఇన్నర్‌ రింగ్‌ రోడ్డు నుంచి 20-25 కిలోమీటర్ల దూరంలో ఔటర్‌ రింగ్‌ రోడ్డు కట్టి.. జాతీయ రహదారుల మీదుగా వచ్చే వాహనాలన్నింటినీ ఈ ఔటర్‌ రింగ్‌ రోడ్డు మీదికి మళ్లించారు.

ఆ సమయంలో తెలంగాణ ఏర్పడి బీఆర్‌ఎస్‌ ప్రభు త్వం అధికారంలోకి వచ్చింది. హైదరాబాద్‌ ఇంకా విస్తరిస్తుందన్న దూరదృష్టితో ఆలోచించిన అప్పటి సీఎం కేసీఆర్‌.. నగరానికి 60 కిలోమీటర్ల దూరం లో కొత్త ఎకనామిక్‌ జోన్‌ ఏర్పాటు కావాలని ఆకా ంక్షించారు. అందుకు ప్రాంతీయ రింగ్‌ రోడ్డు (ఆర్‌ఆర్‌ఆర్‌) ప్రతిపాదనలు రూపొందించారు. దాన్ని జాతీయ రహదారిగా పరిగణించాలని కేంద్రానికి ప్రతిపాదనలు పంపారు. ఓఆర్‌ఆర్‌ లోపల ఉన్న జాతీయ రహదారులను రాష్ట్ర ప్రభుత్వం తీసుకొ ని.. ఆర్‌ఆర్‌ఆర్‌ను జాతీయ రహదారిగా నిర్మాణం చేపట్టాలని కేంద్ర, రాష్ట్ర ప్రభుత్వాలు నిర్ణయించా యి. కేంద్రం ప్రాజెక్టును చేపడితే కేంద్ర అధికారయంత్రాంగమే అలైన్‌మెంట్‌ వంటి ప్రక్రియను నిర్వహిస్తుంది. నిర్ధారణ అయ్యాక రాష్ర్టానికి పంపి సమ్మతమేనా? అని మాత్రమే అడుగుతుంది.

లాభనష్టాలు బేరీజు వేసుకున్నరు
తొమ్మిది నెలల కిందట కాంగ్రెస్‌ ప్రభుత్వం వచ్చింది. ఆర్‌ఆర్‌ఆర్‌ దక్షిణ భాగానికి సంబంధించిన ఫైల్‌ ఆమోదం కోసం కేంద్రం వద్ద ఉన్నదన్న విషయం ఈ ప్రభుత్వానికి తెలుసు. అందుకే గతంలోనే ఫైనల్‌ అయిన అలైన్‌మెంట్‌ వల్ల తమకేం లాభం అనుకొన్నరు. తమ భూములు ఎక్కడెక్కడ ఉన్నయో చూసుకున్నరు. అట్ల బేరీజు వేసుకొని అనేక మంది పేద రైతుల భూముల్లోకి అలైన్‌మెం ట్‌ మళ్లించి, వారి భూములను చీల్చి అలైన్‌మెంట్‌ను వాళ్ల భూముల దగ్గరకు మలుపుకున్నరు. కొన్ని నెలలుగా ఈ ప్రభుత్వం అదే పని మీద ఉన్న ది. అలైన్‌మెంట్‌ మార్పు మీద ఇటీవల ఒక ప్లాన్‌ కూడా రిలీజ్‌ చేసినరు.

ప్రభుత్వ పెద్దల స్వలాభం కోసమే
158 కిలోమీటర్ల ఆర్‌ఆర్‌ఆర్‌ ఉత్తర భాగానికి రూ.4 వేల కోట్లు భూసేకరణ, రూ.8-9వేల కోట్లు రోడ్డు వేయడానికి ఖర్చవుతుండగా, అందులో భూసేకరణలో సగం రాష్ట్ర ప్రభుత్వం భరిస్తుందని కేసీఆర్‌ సర్కారు కేంద్రానికి స్పష్టం చేస్తే కేంద్రం కూడా అంగీకరించింది. 189 కిలోమీటర్ల దక్షిణ భాగం భూసేకరణకు రూ.5 వేల కోట్లు, రోడ్డు వే సేందుకు రూ.10 వేల కోట్లు అవసరమవుతుంది. కేంద్రం గతంలో అంగీకరించిన ప్రకారం దక్షిణభాగానికి సంబంధించి భూసేకరణలో సగం అంటే రూ.2,500 కోట్లు రాష్ట్రం ఇస్తే సరిపోతుంది. మిగిలిన రూ.12,500 కోట్లు కేంద్రమే ఇస్తుంది. కానీ రేవంత్‌రెడ్డి ప్రభుత్వం మాత్రం వేరే విధంగా ఆలోచిస్తున్నది. గతంలోనే నిర్ణయించిన అలైన్‌మెంట్‌ వల్ల తమకు ఏం లాభం లేదనుకొని, వాళ్ల భూ ముల దగ్గరకు రింగ్‌రోడ్డును తీసుకుపోవాలని కొత్త అలైన్‌మెంట్‌ ఇచ్చుకున్నారు. అందులోనే భారీ ఎత్తున ప్రభుత్వ పెద్దల స్వలాభం దాగి ఉన్నది.

• నాగార్జునసాగర్‌ జాతీయ రహదారిలో మాల్‌ సమీపంలోని గొల్లపల్లి వద్ద పాత అలైన్‌మెంట్‌ ఉంటే.. దాన్ని రెండు కిలోమీటర్లు బయటికి జరిపి కుర్మపల్లి ఎక్స్‌ రోడ్డు దగ్గర అలైన్‌మెంట్‌ను ఖరారు చేశారు.
• శ్రీశైలం జాతీయ రహదారిలో గత అలైన్‌మెంట్‌ ప్రకారం ఆమన్‌గల్‌ కాటన్‌ మిల్లు సమీపంలో ఉంటే దాన్ని 3-4 కిలోమీటర్లు శ్రీశైలం హైవే వైపు జరిపారు. ఆమన్‌గల్‌ను దాటి మేడిగడ్డ తండా దగ్గరికి మార్చారు. మరి ఎందుకు మా ర్చారని మీడియా, ప్రజలు అడిగితే.. ఫ్యూచర్‌ సిటీ కోసం అలైన్‌మెంట్‌ను మారుస్తున్నట్టు ప్ర భుత్వం చెప్పింది. కానీ వాస్తవ పరిస్థితులు చూ స్తే.. లేమూరు-యాచారం-కొత్తూరు-ముచ్చర్ల పరిధిలో ఫోర్త్‌ అలియాస్‌ ఫ్యూచర్‌ సిటీ విస్తరించి ఉన్నది. ఈ క్రమంలో పాత అలైన్‌మెంట్‌ ప్రకారమైతే ఈ ఫోర్త్‌ సిటీకి ఆర్‌ఆర్‌ఆర్‌ అలైన్‌మెంట్‌ 10 కిలోమీటర్ల దూరంలోనే ఉంటుం ది. కానీ ప్రస్తుత అలైన్‌మెంట్‌ ప్రకారం 2 కిలోమీటర్లు పెరిగి 12 కిలోమీటర్ల దూరంలోకి పో యింది. సాగర్‌ హైవేపై చూస్తే.. ఫోర్త్‌ సిటీ నుం చి గొల్లపల్లి 20 కిలోమీటర్ల వరకు ఉంటే ఇ ప్పుడు రెండు కిలోమీటర్లు అవతలికి జరిగి దూ రం ఇంకా పెరిగింది. అంటే ఫ్యూచర్‌ సిటీ కోసం అలైన్‌మెంట్‌ మార్చారు అన్నది శుద్ధ అబద్ధం.

మరెందుకు మార్చారు?

• శ్రీశైలం హైవే వైపు అలైన్‌మెంట్‌ మార్చడానికి కారణం.. కుందారం భూములు. ఈ భూములను దశాబ్దాలుగా పేద రైతులు సాగు చేసుకుంటున్నా వారికి పట్టాలు లేవు. అందుకే కాంగ్రెస్‌ ప్రభుత్వంలోని కొందరు పెద్దలు ఆ రైతుల నుం చి చాలా అగ్గువకు ఆ భూములను బెదిరించి తీసుకున్నారు. అక్కడి రైతులను అడిగితే మా త్రం బిగ్‌ బ్రదర్స్‌ అని చెప్తున్నరు. అదెలాగంటే.. కబ్జా రద్దు ఒప్పంద పత్రాలు అని స్టాంపు పేపర్ల మీద రాయించుకుంటున్నరు. ప్రభుత్వం వచ్చి న మరుసటి నెల నుంచే పేద రైతులను బయటికి పంపించి కుందారం భూములను ఆక్రమించడం మొదలుపెట్టారు. గద్దల్లా వచ్చి వారిని భ యపెట్టి రూ.40-50 లక్షలుంటే రూ.3-4 లక్షలకు గుంజుకుంటున్నరు. 30 ఏండ్ల నుంచి వ్యా పారంలో ఉన్న బిల్డర్‌ను నేను. ఇప్పటివరకు కబ్జా రద్దు ఒప్పంద పత్రం అనేది చూడలేదు.
• గతంలోని అలైన్‌మెంట్‌ను మార్చి ఖానాపూర్‌ సమీపంలోకి తీసుకువచ్చారు. అది ఒక కాంగ్రె స్‌ ఎమ్మెల్యే గ్రామం. ఆయనకు అక్కడ సొంతం గా కొనుగోలు చేసిన (ఈ ఏడెనిమిది నెలల కాలంలో) భూములు ఉన్నాయి.
• పాత అలైన్‌మెంట్‌ను మరిన్ని కిలోమీటర్లు ముందుకు జరిపి మాడ్గులలోని నల్లచెరువు వద్ద కు అలైన్‌మెంట్‌ను తీసుకుపోయారు. మాడ్గుల లో సీఎం రేవంత్‌రెడ్డి బంధువులకు పెద్ద ఎత్తున భూములు ఉన్నాయనేది అందరికీ తెలుసు.
• చేవెళ్ల సమీపంలోని ఇంతకుముందు అంగడి చిట్టంపల్లి గేటు సమీపంలో అలైన్‌మెంట్‌ ఉంటే దానిని ఐదు కిలోమీటర్లు ముందుకు జరిపి మన్నెగూడ క్రాస్‌రోడ్డు నుంచి తీసుకుపోతున్నరు. దానివల్ల షాద్‌నగర్‌ క్రాస్‌ రోడ్డు నుంచి సంగారెడ్డి వరకు ముందుకు జరపటం వల్ల అక్కడ ఉన్న మరో కాంగ్రెస్‌ ఎమ్మెల్యే, మాజీ ఎంపీ, మాజీమంత్రి, చాలామంది కాంగ్రెస్‌ నాయకులకు ల్యాండ్‌ బ్యాంక్‌ ఉండటం వల్ల మేలు జరుగుతుందని ప్రజలే అంటున్నరు. అంతేకాదు.. ఈ ప్రాంతంలో కూడా బిగ్‌ బ్రదర్స్‌ స్వయంగా భారీఎత్తున భూములు సేకరించి పెట్టుకున్నారని స్థానికులు చెప్తున్నారు. అందుకే అలైన్‌మెంట్‌ మార్చారు.

అక్కడే ఎందుకు జరిగింది?
గత అలైన్‌మెంట్‌ హైదరాబాద్‌ నగరానికి 50 కిలోమీటర్ల దూరంలో ఉన్నదని అనుకుంటే.. కాంగ్రెస్‌ ప్రభుత్వం వచ్చిన తర్వాత మాకు 50 కాదు.. 60 కిలోమీటర్ల దూరం వరకు ఆర్‌ఆర్‌ఆర్‌ కావాలనుకుంటే దక్షిణ భాగం మొత్తం ఆ మేరకు 10 కిలోమీటర్లు పాత అలైన్‌మెంట్‌ ముందుకు జరగాలి. కానీ కేవలం నాలుగైదు చోట్ల ఎంపిక చేసినట్టు మాత్రమే ఎందుకు జరిగింది? దీని వెనక మతలబు ఏంది? కాంగ్రెస్‌ ప్రభుత్వంలోని పెద్దలు, పార్టీ నేతల భూములతో పాటు ప్రభుత్వం వచ్చిన తర్వాత వాళ్లు పేదల్ని భయపెట్టి, రెవెన్యూ లొసుగులను ఆసరాగా చేసుకొని ఎక్కడెకక్కడ భూముల్ని చవకగా గుంజుకున్నరో ఆయా ప్రాంతాల్లోనే రింగు రోడ్డు అలైన్‌మెంట్‌ను మార్చే ప్రయత్నం చేశారు.

తెలంగాణను ముంచి.. వాళ్ల భూముల ధరలు పెంచి..
కేంద్రం అలైన్‌మెంట్‌ ప్రకారం దక్షిణ భాగం నిర్మాణం చేపడితే కేంద్రం నుంచి రూ.12,500 కోట్లు వస్తాయి. కానీ అలైన్‌మెంట్‌ను ఇష్టమొచ్చినట్టు మారిస్తే నిధులు ఇవ్వరు. రాష్ట్ర ప్రభుత్వంలోని పెద్దలు కొందరు తమ స్వలాభం కోసం అలైన్‌మెంట్‌ మార్చారని తెలిస్తే ప్రాజెక్టును కేంద్రం చేపట్టకపోవచ్చు. ఇవన్నీ రాష్ట్ర ప్రభుత్వంలో ఉన్నవారికి తెలుసు. అయినప్పటికీ ప్రభుత్వం ముందుకుపోతున్నది. ఎందుకంటే.. మాకున్న సమాచారం ప్రకారం కేంద్రం రూ.12,500 కోట్లు ఇవ్వకున్నా.. తెలంగాణ ఆ నిధులు నష్టపోయినా సరే! రింగ్‌ రోడ్డు మాత్రం మా భూముల గుండానే పోవాలి. అలైన్‌మెంట్‌ మార్చాల్సిందే అని అనుకుంటున్నరు. కేంద్రం నిధులు ఇవ్వకున్నా ప్రపంచ బ్యాంకు లోన్‌ తీసుకుందామనుకుంటున్నరు. తెలంగాణపై రూ.12,500 కోట్ల భారం మోపైనా రింగ్‌ రోడ్డును తమ భూముల గుండా తీసుకుపోవాలి.. ఆ భూముల ధరలు పెరగాలనేది ఈ ప్రభుత్వ ఆలోచనగా ఉన్నది.

సీబీఐ విచారణ జరపకపోతే మీరంతా ఒక్కటే!
కేంద్రం నిర్ణయించిన అలైన్‌మెంట్‌ ప్రకార మే దక్షిణ భాగాన్ని చేపట్టాలి. అప్పుడే కేంద్రం నుంచి తెలంగాణకు రూ.12,500 కోట్ల సా యం అందుతుంది. కేంద్రమంత్రి కిషన్‌రెడ్డి కూడా ఈ విషయంలో జోక్యం చేసుకొని, పాత అలైన్‌మెంట్‌ ప్రకారమే దక్షిణ భాగం పనులు మొదలయ్యేలా చూడాలి. నష్టపోతున్న పేద రైతుల బాధలు అర్థం చేసుకోవాలి. గిరిజనుల బాధ తెలుసుకోవాలి. కొత్త అలైన్‌మెంట్‌ చాలా బాగుందని రాష్ట్ర ప్రభుత్వం అనుకుంటే పారదర్శకంగా శ్వేత పత్రం విడుదల చేయాలి. కొత్త అలైన్‌మెంట్‌ మారడం వల్ల నష్టపోతున్న గ్రా మాల్లో సభలు నిర్వహించి, అక్కడి ప్రజల బాధ లు తీర్చాలి. ఆ రైతులకు మంచి నష్టపరిహారం ఇచ్చి ప్రాజెక్టును చేపట్టాలి.

కానీ మీ భూముల కోసం, ఆ భూముల ధరలు పెంచుకునేందుకు నిరుపేద రైతులు, గిరిజనులు, రాష్ర్టాన్ని బలిపెట్టి అప్పులఊబిలోకి తీసుకుపోతామంటే మాత్రం బీఆర్‌ఎస్‌ పోరాటం చేస్తుంది. అలైన్‌మెంట్‌ మార్పు ఎవరి కోసం? ఎవరి భూముల ధరలు పెరగడానికి? ఏ గద్దల భూదందా జరగడానికి? అనేది బయటకు రావాలి. అంటే.. ఈ వ్యవహారంపై సీబీఐ విచారణ జరపాలని కేంద్ర హోంశాఖ సహాయ మంత్రి బండి సంజయ్‌ను కోరుతున్నా. దీని వెనకాల ఎవరి హస్తం ఉందనేది ప్రజలకు తెలియాలి. పేద రైతులను బెదిరించటంపైనా సీబీఐ విచారణ జరగాలి. లేకపోతే బండి సంజయ్‌, కిషన్‌రెడ్డి.. రేవంత్‌రెడ్డి ఒక్కటేనని.. బీజేపీ, కాంగ్రెస్‌ ఒక్కటేనని తెలంగాణ ప్రజలు నమ్ముతరు’ అని పేర్కొన్నారు.

ఎలాంటి జోక్యం లేకుండానే ఉత్తర-దక్షిణ అలైన్‌మెంట్లు పూర్తి
బీఆర్‌ఎస్‌ ప్రభుత్వ హయాంలో ఉత్తర-దక్షిణ భాగాలకు ఆర్‌ఆర్‌ఆర్‌ అలైన్‌మెంట్‌ను కేంద్రమే పూర్తిచేసింది. అందులో ఎలాంటి రాజకీయ జోక్యంగానీ, తెలంగాణ ప్రభుత్వ జోక్యంగానీ లేదు. కేంద్రం నుంచి అలైన్‌మెంట్‌ ప్రతిపాదనలు వస్తే కొన్ని అభ్యంతరాలను అప్పట్లో చెప్పాం. ముఖ్యంగా అలైన్‌మెంట్‌ సర్వే సమయంలోలేని బస్వాపూర్‌ రిజర్వాయర్‌తో కాళేశ్వరం ప్రాజెక్టులోని పలు కాల్వలు, జలాశయాలు వచ్చే చోట కొంత అలైన్‌మెంట్‌ తప్పించాలని చెప్పాం. అది సహేతుకం కావడంతో వాటిని మార్పు చేశారు.

అలైన్‌మెంట్‌ విషయంలో ఏ ఒక్క రైతు కూడా అభ్యంతరాలు వ్యక్తం చేయలేదు. కేంద్రం తొలుత ఉత్తర భాగం చేపడతామని చెప్పటంతో ఆ మేరకు అలైన్‌మెంట్‌ను అధికారికంగా నిర్ధారించి, భూసేకరణ కూడా 30-50 శాతం వరకు పూర్తి చేశారు. దక్షిణ భాగం అలైన్‌మెంట్‌ కూడా ఖరారైనందున దాన్ని కూడా వెంటనే చేపట్టాలని అప్పట్లోనే మేం కోరటంతో దక్షిణ భాగానికి సంబంధించిన అలైన్‌మెంట్‌ను కూడా పరిశీలించి, అభ్యంతరాలుంటే చెప్పాలని అన్నారు. మేం దానిని పరిశీలించి, నల్లగొండ జిల్లాలో డిండి ఎత్తిపోతల పథకంలో భాగంగా నిర్మించే శివన్నగూడెం రిజర్వాయర్‌ వచ్చే చోట అలైన్‌మెంట్‌ వస్తున్నందున దాన్ని తప్పించాలని సూచించటంతో ఆ మేరకు మార్పు చేశారు. అలైన్‌మెంట్‌ను ఫైనల్‌ చేశారు. దానికి సంబంధించిన ఫైల్‌ కేంద్రం వద్దే ఉన్నది. అయితే ఆ ప్రాజెక్టును భారత్‌మాల కింద చేపట్టాలా? మరో పథకమా? అని పరిశీలిస్తున్నారని తెలిసింది.

అలైన్‌మెంట్‌ తప్పిందిలా…

• బీఆర్‌ఎస్‌ ప్రభుత్వ హయాంలోనే ట్రిపుల్‌ఆర్‌ దక్షిణ భాగం అలైన్‌మెంట్‌ను రూపొందించిన కేంద్రం
• అప్పట్లో ఏ ఊరిలోనూ ఒక్క రైతైనా ఆందోళన చెందలేదు
• దక్షిణ భాగాన్ని భారత్‌మాల కింద చేపట్టాల్నా?మరో పథకం కింద చేపట్టాల్నా? అని కేంద్రం యోచన
• ఈ తరుణంలో సౌత్‌లో భారీ మార్పులు చేసిన ప్రభుత్వం
• పూర్తిగా కాకుండా కొన్నిచోట్ల పాత అలైన్‌మెంటుకు2-5 కిలోమీటర్ల దూరం జరిగిన రింగు
• అక్కడే ప్రభుత్వ పెద్దలకు, కాంగ్రెస్‌ నేతలకు, ఓ కీలక నేత కుటుంబానికి భారీ ఎత్తున ల్యాండ్‌ బ్యాంక్‌
• ఫ్యూచర్‌/ఫోర్త్‌ సిటీ కోసమే మార్పు అనేది ఒక సాకు. కొత్త మ్యాప్‌లోనే మరింత దూరంగా రింగ్‌ రోడ్డు
• రీజినల్‌ రింగ్‌రోడ్డు అలైన్‌మెంట్‌ ఇష్టానుసారంగా మార్చితే ప్రాజెక్టు నుంచి తప్పుకోనున్న కేంద్ర ప్రభుత్వం
• కేంద్రం తప్పుకుంటే దక్షిణ భాగం నిర్మాణానికి రాష్ట్రంపై రూ.12,500 కోట్ల భారం
• ప్రపంచబ్యాంకు రుణంతో చేపట్టాలని ప్రభుత్వ యత్నం
• తమ భూముల రేట్ల కోసం తెలంగాణ ప్రజలపై రుణ భారం
• అధికారంలోకి వచ్చిన నెలకే కుందారం భూముల చెర
• ట్రిపుల్‌ఆర్‌ తెచ్చానన్న కిషన్‌ రెడ్డి ఎందుకు మాట్లాడరు?
• ట్రిపుల్‌ ఆర్‌ భూ దందాపై కేంద్రమంత్రి బండి సంజయ్‌ సీబీఐ విచారణ జరిపించాలి. లేకపోతే కాంగ్రెస్‌-బీజేపీలు ఒక్కటేనని తేలిపోయినట్టే.