మోదీ మాట్లాడరేం.. దేశంలో యథేచ్ఛగా మానవ హక్కుల ఉల్లంఘన

భారత్‌లో పౌరహక్కుల ఉల్లంఘన యథేచ్ఛగా సాగుతున్నదని ‘ఐక్యరాజ్యసమితి మానవ హక్కుల కమిషన్‌ (యూఎన్‌హెచ్‌ఆర్‌సీ)’ ఆందోళన వ్యక్తం చేసింది.

• కొన్ని వర్గాల వారిపై ఉపా కేసులు, వేధింపులు
• మోదీ సర్కారు తీరుపై యూఎన్‌ ఆగ్రహం
• ఏకపక్ష చర్యలపై సభ్య దేశాల ప్రశ్నల వర్షం
• తీరు మార్చుకోవాలని హితవు

(స్పెషల్‌ టాస్క్‌ బ్యూరో) హైదరాబాద్‌, నవంబర్‌ 17 (నమస్తే తెలంగాణ): భారత్‌లో పౌరహక్కుల ఉల్లంఘన యథేచ్ఛగా సాగుతున్నదని ‘ఐక్యరాజ్యసమితి మానవ హక్కుల కమిషన్‌ (యూఎన్‌హెచ్‌ఆర్‌సీ)’ ఆందోళన వ్యక్తం చేసింది. లక్షిత వర్గంపై ఉపా (చట్టవ్యతిరేక కార్యకలాపాల నిరోధక చట్టం) వంటి తీవ్రవాద వ్యతిరేక చట్టాలను అకారణంగా ప్రయోగించడం ఇటీవలి కాలంలో పెరిగిందని మండిపడింది. ‘యూనివర్సల్‌ పీరియాడిక్‌ రివ్యూ’ (యూపీఆర్‌) పేరిట నాలుగేండ్లకు ఒకసారి జరిగే ఈ సమీక్షా సమావేశంలో సభ్యదేశాల ప్రతినిధులు, పౌరహక్కుల కార్యకర్తలు, జర్నలిస్టులు భారత్‌లో నెలకొన్న పరిస్థితులపై ఆందోళన వ్యక్తం చేశారు. మోదీ సర్కారుకు పలు ప్రశ్నలు వేయడంతో పాటు.. సూచనలూ చేశారు.

ప్రపంచ దేశాల ప్రశ్నలు, సూచనలు

• ‘ఉపా’ చట్టం పేరుతో హక్కుల కార్యకర్తలను, మై నారిటీలను అరెస్టు చేసి జైల్లో నిర్బంధిస్తున్నారు. సుదీర్ఘకాలం విచారణ పేరిట హింసిస్తున్నారు. ఈ చర్యలను మానుకోవాలి:అమెరికా
• అంతర్జాతీయ మావన హక్కుల చట్టాలకు అనుగుణంగా ఉపా చట్టంలో మార్పులు చేయాలి. మతస్వేచ్ఛను రక్షించాలి: కెనడా
• అణగారిన వర్గాల హక్కులను కాపాడాలి:జర్మనీ
• సామాజిక మాధ్యమాల వినియోగంపై ఆంక్షలు వద్దు. ఇంటర్నెట్‌ షట్‌డౌన్‌లను తగ్గించాలి: స్విట్జర్లాండ్‌
• జైల్లో నిర్బంధించిన హక్కుల కార్యకర్తలను విడుదల చేయాలి: ఐర్లాండ్‌, బెల్జియం, లక్సెంబర్గ్‌
• వాక్‌ స్వాతంత్య్రం, నిరసన తెలిపే హక్కుకు అవకాశం కల్పించాలి: లాటిన్‌ అమెరికా, ఐరోపా దేశాలు

మోదీ పాలనలో ఉపా చట్టం ఇలా..

• మొత్తం అరెస్టులు-10,552
• అభియోగాలు రుజువైనవారు-253 దేశద్రోహం కేసులు ఇలా..
• మొత్తం దేశద్రోహం కేసులు-7,110
• మోదీని విమర్శించినందుకు కేసులు-149