ఒక పరీక్ష.. 10 తప్పులు.. గ్రూప్‌-1 మెయిన్స్‌ ప్రక్రియ లోపాల పుట్ట

గ్రూప్‌ 1 మెయిన్స్‌ ప్రక్రియలో వరుస తప్పిదాలే టీజీపీఎస్సీ కొంపముంచాయా? అంటే నిపుణులు అవుననే అంటున్నారు. గ్రూప్‌ 1 మెయిన్స్‌ విషయంలో ఒకటి కాదు.. రెండు కాదు ఏకంగా 10 రకాల తప్పలు దొర్లాయి.

• అనేక తప్పులను ఎత్తిచూపిన హైకోర్టు తీర్పు
• తప్పిదాలపై కానరాని దిద్దుబాటు చర్యలు

హైదరాబాద్‌, సెప్టెంబర్‌ 10 (నమస్తే తెలంగాణ): గ్రూప్‌ 1 మెయిన్స్‌ ప్రక్రియలో వరుస తప్పిదాలే టీజీపీఎస్సీ కొంపముంచాయా? అంటే నిపుణులు అవుననే అంటున్నారు. గ్రూప్‌ 1 మెయిన్స్‌ విషయంలో ఒకటి కాదు.. రెండు కాదు ఏకంగా 10 రకాల తప్పలు దొర్లాయి. ఈ తప్పులే గ్రూప్‌ 1 ఫలితాలు, మెరిట్‌ లిస్టు రద్దుకు కారణమయ్యాయి. గ్రూప్‌ 1పై మంగళవారం హైకోర్టు అడిగిన అ నేక ప్రశ్నలకు కమిషన్‌ నీళ్లు నమిలింది. సరైన సమాధానాలు చెప్పలేకపోయింది. పైగా కొన్ని తప్పుడు వాదనలను కోర్టు ముందుంచింది. మరికొన్ని వివరాలను కోర్టుకు సమర్పించనేలేదు. ఇలా గ్రూప్‌ 1 మెయిన్స్‌ అనేక లోపాల పుట్టను తలపించింది. ఆఖరుకు ఫలితాల రద్దుకు దారితీసింది. ఈ కేసులో తుది తీర్పు విషయంలో హైకోర్టు అనేక తప్పులను ఎత్తిచూపింది. ప్రధానంగా 10 తప్పులను గుర్తించింది.

• ప్రిలిమ్స్‌, మెయిన్స్‌కు వేర్వేరు హాల్‌టికెట్లు ఇచ్చింది. కమిషన్‌ ఈ రెండు హాల్‌టికెట్ల జారీ గురించి ఎక్కడా చెప్పలేదు. నిబంధనల్లోనూ పేర్కొనలేదు. అదే యూపీఎస్సీ ఒకే హాల్‌టికెట్‌ నంబర్‌ను జారీచేస్తున్నది. ఉమ్మడి రాష్ట్రంలో 2011లో నిర్వహించిన గ్రూప్‌ 1లో రెండు హాల్‌టికెట్లు జారీ చేశారని కోర్టు ముందు చెప్పింది. కానీ రెండు హాల్‌టికెట్ల జారీచేసినట్టు ఆధారాలను మాత్రం సమర్పించలేదు.
• పరీక్ష కేంద్రాల సంఖ్యను 45 నుంచి 46కు పెంచారు. పైగా కేంద్రాల కేటాయింపులో ర్యాండమైజేషన్‌ వర్తింపజేస్తామన్నారు. కానీ సెంటర్‌ నంబర్‌ 18, 19ని మహిళలకే కేటాయించారు. కోఠి మహిళా కళాశాల అధికారుల వినతి మేరకు మహి ళా అభ్యర్థులకే కేటాయించామని పేర్కొన్నారు. కానీ ఇలా కోరినట్టు ఎలాంటి డాక్యుమెంట్లను కోర్టు ముందుంచలేదు. గతంలో ఇదే కాలేజీలో మహిళలు, పురుషులకు పరీక్షలను నిర్వహించారు.
• అభ్యర్థుల సంఖ్య మొదట 21,075 మంది రాశారని చెప్పారు. తర్వాత 21,085 మంది మార్కుల జాబితాను ప్రకటించారు. అదనంగా వచ్చిన ఆ 10 మంది ఎవరు? అన్నది అనేక సందేహాలకు దారితీసింది.
• పరీక్ష పూర్తయిన తర్వాత ట్రిపుల్‌ మూల్యాంకన పద్ధతిని అనుసరించారు. రెండుసార్లు నిర్వహించిన మూల్యాంకనంలో బార్‌కోడ్‌, బబ్లింగ్‌ను వినియోగించారు. కానీ మూడో మూల్యాంకనంలో బార్‌కోడ్‌, బబ్లింగ్‌లు లేవు. పైగా మూడో మూల్యాంకనానికి సంబంధించిన వివరాలను అందించలేదు.
• నోటిఫికేషన్‌ పేరా నంబర్‌-15 సబ్‌ క్లాజ్‌-2 ప్రకారం వెబ్‌సైట్‌లో మార్కుల జాబితాను ప్రకటించాలి. ఇలా చేయలేదు. కమిషన్‌ తాను వెల్లడించిన సొంత నియమాలను పాటించడంలోనే పూర్తిగా విఫలమైంది.
• జవాబుపత్రాల మూల్యాంకనం కోసం ‘కీ’ లేదని టీజీపీఎస్సీ ఒప్పకున్నది. తర్వాత ‘కీ’ ఉన్నదని చెప్పింది. మూడు సందర్భాల్లో మూడు రకాల సమాధానాలను ఇచ్చింది. చివరికి సీల్డ్‌ కవరలో ‘కీ’ని సమర్పించడం వివాదాస్పదమైంది. పేపర్‌-2కి ఒరిజినల్‌ కీని సమర్పించలేదు. కొన్ని కీ పేపర్లలో సబ్‌ హెడ్డింగ్స్‌ మాత్రమే ఉన్నాయి. కొన్నింటిలో మాత్రం పూర్తి సమాధానాలు ఉన్నాయి.
• రిటైర్డ్‌ లెక్చరర్లు, కోచింగ్‌ సెంటర్ల ఫ్యాకల్టీని వినియోగించారు. ఆర్సీరెడ్డి ఐఏఎస్‌ కోచింగ్‌ సెంటర్‌లో శిక్షకుడైన డాక్టర్‌ ఎంఏ మల్లిక్‌ చేత జవాబుపత్రాలను మూల్యాంకనం చేయించారు. రెగ్యులర్‌ ఫ్యాకల్టీ విషయంలో కమిషన్‌ తప్పుడు సమాచారాన్ని ఇచ్చింది.
• ఉర్దూమీడియం పుస్తకాల్లేవు. స్టడీ మెటీరియల్‌ లేదు. కానీ జనరల్‌ ఎస్సేలో ఉర్దూ మీడియం అభ్యర్థికి 97.5 మార్కులేశారు. ఉర్దూ మీడియం ప్రశ్నపత్రాలను కోర్టుకు సమర్పించలేదు.
• తెలుగు, ఇంగ్లిష్‌ మీడియం పేపర్లను ఒక్కరే మూల్యాంకనం చేశారు. దీంతో తెలుగు భాషపై అవగాహన లేని వారు తెలుగు మీడియం వారికి తక్కువ మార్కులు వేశారు. ఇంగ్లిష్‌ మీడియం నుంచి 89.88 శాతం, తెలుగు మీడియం నుంచి కేవలం 9.95 శాతం మంది అభ్యర్థులు ఎంపికయ్యారు. ఇది సమానత్వ సూత్రానికి విరుద్ధం.
• మొత్తంగా 719 మందికి ఒకే మార్కులొచినట్టు కమిషన్‌ అంగీకరించింది. 240902470, 240902471 అభ్యర్థులకు 253 మార్కులు, 240905306, 240905307 అభ్యర్థులకు 373.5, .240905438, 240905439 హాల్‌టికెట్‌ నంబర్‌ గల అభ్యర్థులకు 270.5 మార్కులొచ్చాయి. 253 మార్కులొచ్చిన వారు 28 మంది, 373.50 మార్కులొచ్చిన వారు 54 మంది, 270.50 మార్కులొచ్చిన వారు 46 మంది, 301.50 మార్కులొచ్చిన వారు 50 మంది, 393.50 మార్కులొచ్చిన వారు 51 మంది చొప్పున ఉన్నారు.