Visit:
హైద‌రాబాద్ : కాంగ్రెస్ పార్టీ ఎంపీ రాహుల్ గాంధీపై టీఆర్ఎస్ ఎమ్మెల్యే జీవ‌న్ రెడ్డి నిప్పులు చెరిగారు. కాంగ్రెస్ అంటే ఇండియన్ నేషనల్ క్లబ్ పార్టీ అని ధ్వ‌జ‌మెత్తారు. టీఆర్ఎస్ ఎల్పీలో టీఆర్ఎస్ ఎమ్మెల్యే విద్యాసాగ‌ర్ రావు, ఎంపీ బ‌డుగుల లింగ‌య్య యాద‌వ్‌తో క‌లిసి జీవ‌న్ రెడ్డి మీడియాతో మాట్లాడారు.
కాంగ్రెస్ పార్టీది రైతు సంఘ‌ర్ష‌ణ సభ కాదు.. అది కాంగ్రెస్ కొట్లాట సభ అని విమ‌ర్శించారు. ఆయన రాహుల్ గాంధీ కాదు.. రాజ‌రిక‌పు గాంధీ అని ఎద్దెవా చేశారు. కాంగ్రెస్ డిక్లరేషన్ కాదు.. ఫ్రస్టేషన్ అని దుయ్య‌బ‌ట్టారు. ఢిల్లీ వాసి రాహుల్… గల్లీ సన్నాసి రేవంత్‌ను ఏం మాట్లాడాలని అడుగుతున్నారని జీవ‌న్ రెడ్డి తీవ్ర విమ‌ర్శ‌లు చేశారు.
రాహుల్‌ది ఐరన్ లెగ్…ఆయన ఎక్కడ సభ పెట్టినా అక్కడ కాంగ్రెస్ ఔట్ అని జీవ‌న్ రెడ్డి అన్నారు. రాహుల్ ఏ హోదాలో తెలంగాణ‌కు వ‌చ్చాడు.. ఆయన ఏమైనా కాంగ్రెస్ అధ్య‌క్షుడా? అని ప్ర‌శ్నించారు. రాహుల్ ఎలా డిక్లరేషన్ ప్రకటిస్తాడ‌ని నిల‌దీశాడు.
రాష్ట్రానికి అనేక మంది పొలిటిక‌ల్ టూరిస్టులు వ‌స్తున్నారు.. అలాంటి వారిని ప‌ట్టించుకోవాల్సిన అవ‌స‌రం లేద‌ని జీవ‌న్ రెడ్డి సూచించారు. కేసీఆర్ పోరాటం వల్లే తెలంగాణ వ‌చ్చింద‌న్నారు. కాంగ్రెస్ పార్టీకి గ్యారంటీ లేదు.. వారంటీ లేద‌ని విమ‌ర్శ‌లు చేశారు. రాహుల్ మీటింగ్‌కు కోమ‌టిరెడ్డి రాజ‌గోపాల్ రెడ్డి హాజ‌రు కాలేద‌న్నారు. సొంత పార్టీ నేత‌లే కాంగ్రెస్‌ను న‌మ్మ‌ట్లేదు.. అలాంటిది తెలంగాణ ప్ర‌జ‌లు ఎలా న‌మ్ముతారు అని జీవ‌న్ రెడ్డి ప్ర‌శ్నించారు.
