టాపర్లు మన రాష్ట్రంలో చదవట్లే!

ఎప్‌సెట్‌ ప్రవేశ పరీక్షలో టాపర్లుగా నిలిచిన ప్రతిభావంతులు రాష్ట్రంలో చదవడంలేదు. మన రాష్ట్రంలో అడ్మిషన్లు పొందేందుకు ఇష్టపడటంలేదు.

• ఇతర రాష్ర్టాలకు వలసపోతున్న ఎప్‌సెట్‌ టాపర్లు
• వందలోపు ర్యాంకర్లలో చేరింది ముగ్గురే
• వెయ్యిలోపు చేరింది 143 మంది మాత్రమే
• ఇక్కడ అడ్మిషన్లు పొందుతున్న వారు అంతంతే

హైదరాబాద్‌, జూలై 19 (నమస్తే తెలంగాణ) : ఎప్‌సెట్‌ ప్రవేశ పరీక్షలో టాపర్లుగా నిలిచిన ప్రతిభావంతులు రాష్ట్రంలో చదవడంలేదు. మన రాష్ట్రంలో అడ్మిషన్లు పొందేందుకు ఇష్టపడటంలేదు. అత్యధికులు వలసపోతున్నారు. మన రాష్ట్రం వదిలి ఇతర రాష్ర్టాలకు చలో అంటున్నారు. ఎప్‌సెట్‌ టాప్‌-100 ర్యాంకర్లలో కేవలం ముగ్గురు మాత్రమే మన రాష్ట్రంలో అడ్మిషన్‌ పొందారు. 97 మంది ఇతర రాష్ర్టాలకు వలస వెళ్లారు. వీరిలో కొందరు జేఈఈలోనూ మంచి ర్యాంకు సాధించి ఐఐటీల్లో ప్రవేశాలు పొందారు. ఎప్‌సెట్‌ తొలి విడత సీట్లను శుక్రవారం కేటాయించారు. అయితే ఐదువేల లోపు ర్యాంకర్లలో అత్యధికలు ఐఐటీలు, ఎన్‌ఐటీల్లో సీట్లు పొందారు. ఐదువేల ర్యాంకు తర్వాతి ర్యాంకర్లు మాత్రమే రాష్ట్రంలో అడ్మిషన్లు పొందారు. ఈ సారి మొత్తంగా 77,561 సీట్లు భర్తీ అయ్యాయి. ఈ 77వేలకు పైగా సీట్లలో 20వేల నుంచి చివరి ర్యాంకు వరకు గల 46,101 మంది విద్యార్థులు సీట్లు దక్కించుకుని, మన రాష్ట్రంలో ప్రవేశాలు పొందారు.

ర్యాంకర్ల వారీగా వివరాలు..

• 101వ ర్యాంకు నుంచి 200 వరకు వరకు కేవలం ఐదుగురు మాత్రమే రాష్ట్రంలో చేరారు. అంటే 95 మంది వలసపోయారు. టాప్‌-200లోపు ర్యాంకర్లు రాష్ట్రంలో చేరింది కేవలం 8 మంది మాత్రమే.
• 201-500లోపు ర్యాంకర్లలో 36 మంది రాష్ట్రంలో ఇంజినీరింగ్‌ చదువుతున్నారు. 300 మందికి 36 మంది మాత్రమే చేరగా, 264 మంది రాష్ట్రం దాటారు.
• 501 నుంచి వెయ్యిలోపు ర్యాంకర్లలో మన రాష్ట్రంలో చేరింది కేవలం 53 మంది మాత్రమే. ఇక 1001 నుంచి 5వేల ర్యాంకుల లోపు 2,523 మంది విద్యార్థులు మాత్రమే అడ్మిషన్లు పొందారు.
• 5001 నుంచి పది వేల లోపు ర్యాంకర్లలో 3,679 మంది, 10,001 నుంచి 20వేల ర్యాంకర్లలో 7,291 మంది మన దగ్గర సీట్లు దక్కించుకున్నారు.