Telangana | అమ్మో ఒకటో తారీఖు.. జీతాలు అందక చిరుద్యోగుల విలవిల!

వారంతా చిరుద్యోగులు. ప్రభుత్వశాఖల్లో పనిచేస్తున్నామన్న పేరే తప్ప ఉద్యోగ భద్రత ఉండదు. నెలంతా పనిచేస్తే వచ్చేది రూ.15 నుంచి 20వేల లోపే. శ్రమదోపిడీకి చిరునామాగా మారిన కాంట్రాక్ట్‌, ఔట్‌సోర్సింగ్‌ ఉద్యోగులను రేవంత్‌ సర్కారు ముప్పుతిప్పలు పెడుతోంది.

Telangana | హైదరాబాద్‌, ఆగస్టు 30 (నమస్తే తెలంగాణ) : వారంతా చిరుద్యోగులు. ప్రభుత్వశాఖల్లో పనిచేస్తున్నామన్న పేరే తప్ప ఉద్యోగ భద్రత ఉండదు. నెలంతా పనిచేస్తే వచ్చేది రూ.15 నుంచి 20వేల లోపే. శ్రమదోపిడీకి చిరునామాగా మారిన కాంట్రాక్ట్‌, ఔట్‌సోర్సింగ్‌ ఉద్యోగులను రేవంత్‌ సర్కారు ముప్పుతిప్పలు పెడుతోంది. నెలంతా పనిచేస్తే ఇవ్వాల్సిన వేతనాలు, గౌరభృతి, పారితోషికాలను చెల్లించడం లేదు. ఒకటో తారీకున జీతాలిస్తామన్న రేవంత్‌ ప్రభుత్వం కొలువుదీరి 8 నెలలు గడిచినా పరిస్థితిలో మార్పురాలేదు. రాష్ట్రంలోని కొంతమంది ఉద్యోగులకు నెలల తరబడి వేతనాలు అందడం లేదు.

వేతనాలు అందనిది వీరికే..

• మోడల్‌ స్కూళ్లలోని అవర్లీ బేస్డ్‌ టీచర్లకు జూలై వేతనం అందలేదు. మరో 17 పాఠశాలల్లో జూన్‌ వేతనం ఇప్పటికీ అందని ద్రాక్షలాగా మారింది. ఇదే మోడల్‌ స్కూళ్లలో ఔట్‌సోర్సింగ్‌ సిబ్బందికి మూడు నెలలుగా వేతనాలు ఇవ్వలేదు.
• ఇంటర్‌ విద్యలో పనిచేస్తున్న గెస్ట్‌ లెక్చరర్లకు రెండు నెలలుగా వేతనాలు అందడం లేదు.
• కేజీబీవీ టైప్‌-4 సిబ్బందికి గత నాలుగు నెలలుగా వేతనాలు రాలేదు.
• గురుకులాల్లో గెస్ట్‌ ఫ్యాకల్టీకి జూన్‌, జూలై, ఆగస్టు మాసాల వేతనం అందలేదు. సెంటర్‌ ఆఫ్‌ ఎక్సలెన్సీల్లోని బోధనా సిబ్బందిదీ ఇదే పరిస్థితి.
• అకాడమీల్లో పనిచేస్తున్న సిబ్బంది మూడు నెలలుగా వేతనాలు పొందలేదు.
• వైద్యశాఖలోని టీవీవీపీ పరిధిలో ఔట్‌సోర్సింగ్‌ కింద పనిచేస్తున్న శానిటేషన్‌, పేషంట్‌ కేర్‌, సెక్యూరిటీ సిబ్బందికి ఆరు నెలలుగా వేతనాలు అందలేదు. ప్రభుత్వం ఏజెన్సీలకు ఫిబ్రవరి వరకు బిల్లులు చెల్లించింది. ఆ తర్వాత పెండింగ్‌ పెట్టడంతో కాంట్రాక్టర్లు సిబ్బందికి ఆరు నెలలుగా వేతనాలు ఇవ్వ లేదు.