Visit:
ధర్మపురి, ఆగస్టు 3 : ఇందిరమ్మ ఇండ్ల పథకంలో అర్హులను వదిలిపెట్టి అధికారి పార్టీ నాయకులు చెప్పిన వారికి ఇండ్లు కేటాయించారని, అన్ని అర్హతలు ఉన్నా ఇందిరమ్మ ఇంటి పథకానికి నోచుకోలేకపోతున్నామని ఆవేదన వ్యక్తం చేస్తున్నారు. జగిత్యాల జిల్లా బుగ్గారం మండలం గోపులాపూర్‌లో ఇందిరమ్మ కమిటీ సభ్యులు గ్రామంలో 60 కుటుంబాలను ఇల్లులేని లేనివారిగా గుర్తించారు. ఇందులో నుంచి మొదటి లిస్టులో 27 మంది లబ్ధిదారులను ఫైనల్‌ చేసి ప్రొసీడింగ్స్‌ అందజేశారు. గోపులాపూర్‌కు చెందిన దళిత దంపతులైన నాతరి లక్ష్మి-మొండయ్య పూర్తి శిథిలావస్థకు చేరిన ఇంట్లో నివసిస్తూ ఇందిరమ్మ ఇంటి కోసం దరఖాస్తు చేసుకున్నారు. ఇల్లు మంజూరు చేయించాలని కాంగ్రెస్‌ నాయకుల కాళ్లు పట్టుకున్నారు. రోజూవారి కూలి చేసుకుంటూ జీవిస్తున్న వీరికి ఇద్దరు కూతుళ్లు. వీరికి ఇందిరమ్మ ఇల్లు మంజూరైందని ఓ రోజు కమిటీ సభ్యులు తెలిపారు.
దీంతో ఖాళీ జాగ కోసం వీరున్న పాత ఇంటిని కూలగొట్టి, పక్కనే ఉన్న మరొకరి ఇంటి స్థలంలో తాత్కాలికంగా టార్ఫాలిన్‌ కవర్లతో ఓ గుడిసె వేసుకొని నివసిస్తున్నారు. ఖాళీ జాగా చూపిస్తే వచ్చి ముగ్గు పోస్తామని చెప్పిన ఇందిరమ్మ కమిటీ సభ్యులు చివరికి లిస్టులో పేరులేదని చేతులెత్తేశారు. ఇప్పుడు ఏంచేయాలో తోచక లక్ష్మి- మొండయ్య లబోదిబోమంటున్నారు. ఈ విషయమై గ్రామ కార్యదర్శి అమీర్‌ను వివరణ కోరగా.. గ్రామంలో 27మంది లబ్ధిదారులను గుర్తించామని, వారిలో నాతరి లక్ష్మి పేరు గలిగిన వారు మరో ముగ్గురు ఉన్నారని, ఇందులో నాతరి లక్ష్మి-మొండయ్య పేరులేదని స్పష్టం చేశారు. న్యాతరి లక్ష్మికి అధికారికంగా ఇల్లు మంజూరైందని చెప్పలేదని, ఇందిరమ్మ కమిటీ సభ్యులు చెప్పి ఉండవచ్చని తెలిపారు. 27మంది లబ్ధిదారుల్లో ఐదుగురు ఇల్లు కట్టుకోవడానికి మొగ్గు చూపడం లేదని, అందులో నాతరి లక్ష్మికి అవకాశం కల్పిస్తామని సమాధానమిచ్చారు.
