ఆరోగ్యరేఖ తెలంగాణ.. తగ్గిన జనన, మరణాల రేటు

తెలంగాణలో వైద్యారోగ్య రంగం పటిష్ఠంగా ఉన్నదని రిజర్వ్‌బ్యాంక్‌ నివేదిక ధ్రువీకరించింది. తాజాగా విడుదల చేసిన హ్యాండ్‌బుక్‌లో రాష్ట్రంలో జననాల రేటు, మరణాల రేటు తగ్గిందని వెల్లడించింది.

• ఎంఎంఆర్‌, ఎన్‌ఎంఆర్‌లోనూ గణనీయ మార్పు
• డాక్టర్ల కొరత లేదు ఆర్బీఐ హ్యాండ్‌బుక్‌లో వెల్లడి

హైదరాబాద్‌, నవంబర్‌ 19 (నమస్తే తెలంగాణ): తెలంగాణలో వైద్యారోగ్య రంగం పటిష్ఠంగా ఉన్నదని రిజర్వ్‌బ్యాంక్‌ నివేదిక ధ్రువీకరించింది. తాజాగా విడుదల చేసిన హ్యాండ్‌బుక్‌లో రాష్ట్రంలో జననాల రేటు, మరణాల రేటు తగ్గిందని వెల్లడించింది. రాష్ట్రంలో నవజాత శిశు మరణాల రేటు ఆరేండ్లలో 40%, మాతృ మరణాల రేటు ఐదేండ్లలో 30% తగ్గినట్టు వెల్లడించింది.

ఆర్బీఐ నివేదికలోని ముఖ్యాంశాలు

• 2014లో మరణాల రేటు 6.7గా నమో దు కాగా.. 2020 నాటికి 6కు తగ్గింది.
• జనాభా నియంత్రణపై విస్తృతంగా అవగాహన కల్పించడంతో జననాల రేటు తగ్గింది. 2014లో జననాల రేటు 18 నమోదు కాగా, 2020కి 16.4కు తగ్గింది.
• సంతానోత్పత్తి రేటు సైతం భారీగా తగ్గింది. 2014లో 1.8గా ఉన్న సంతానోత్పత్తి రేటు 2020 నాటికి 1.5కు తగ్గింది.
• రాష్ట్రంలో నవజాత శిశు మరణాల రేటు (ఐఎంఆర్‌) గణనీయంగా తగ్గింది. 2014లో 35గా ఉన్న ఐఎంఆర్‌.. 2020 నాటికి 21కి దిగి వచ్చింది. ఆరేండ్లలో 40% తగ్గుదల నమోదైంది.
• మాతృ మరణాలను (ఎంఎంఆర్‌) అరికట్టడంలోనూ తెలంగాణ గణనీయమైన మెరుగుదల సాధించింది. 2014-16 కాలానికి 81గా ఉన్న ఎంఎంఆర్‌.. 2017-19 నాటికి 56కు తగ్గింది. ఐదేండ్లలో 30% తగ్గుదలను నమోదు చేసింది.
• తెలంగాణలో డాక్టర్ల కొరత లేదని ఆర్బీఐ నివేదిక వెల్లడించింది. 2021 నాటికి పీహెచ్‌సీల్లో 634 మంది వైద్యుల అవసరం ఉండగా, ప్రభుత్వం 1,254 పోస్టులను మంజూరు చేసిందని తెలిపింది. ఇందులో 1,213 పోస్టులను భర్తీ చేసిందని, కేవలం 41 మాత్రమే ఖాళీగా ఉన్నాయని పేర్కొన్నది. సర్జన్లు, గైనకాలజిస్టులు, ఫిజీషియన్లు, పీడియాట్రిషియన్ల వంటి నిపుణుల కొరత సైతం పెద్దగా లేదని పేర్కొన్నది.