త్వరలో కొత్త పాఠ్యపుస్తకాలు

రాష్ట్రంలో నేషనల్‌ కరిక్యులం ఫ్రేమ్‌వర్క్‌(ఎన్సీఎఫ్‌)-2023 ప్రకారం విద్యాశాఖ కొత్త పాఠ్యపుస్తకాలను దశలవారీగా రూపొందించనున్నది. 2014 తర్వాత కేసీఆర్‌ సర్కారు హయాంలో పాఠ్యపుస్తకాల్లో మార్పులు చేశారు.

• దశలవారీగా అందుబాటులోకి

హైదరాబాద్‌, సెప్టెంబర్‌ 21 (నమస్తే తెలంగాణ): రాష్ట్రంలో నేషనల్‌ కరిక్యులం ఫ్రేమ్‌వర్క్‌(ఎన్సీఎఫ్‌)-2023 ప్రకారం విద్యాశాఖ కొత్త పాఠ్యపుస్తకాలను దశలవారీగా రూపొందించనున్నది. 2014 తర్వాత కేసీఆర్‌ సర్కారు హయాంలో పాఠ్యపుస్తకాల్లో మార్పులు చేశారు. కేంద్ర విద్యాశాఖ విడుదల చేసిన నేషనల్‌ కరిక్యులం ఫ్రేమ్‌వర్క్‌(ఎన్సీఎఫ్‌)-2023 ఆధారంగానే కొత్త కరిక్యులం రూపొందించాల్సి ఉంది.

ప్రస్తుతం తెలుగు, హిందీ, ఉర్దూ వంటి భాషలను మినహాయించి నాన్‌ లాంగ్వేజ్‌ సబ్జెక్టులకు కొత్త కరిక్యులాన్ని రూపొందించే అవకాశాలున్నాయి. ఆ తర్వాత భాషలకు సంబంధించిన కరిక్యులాన్ని సైతం మార్చనున్నారు.

ఎన్సీఎఫ్‌ సూచనలిలా..

• పాఠ్యప్రణాళికల్లో 20%స్థానిక, 30% ప్రాంతీయ, 30% జాతీయ, 20% అంతర్జాతీయ అంశాలుండాలి.
• కంఠస్తం, బట్టిపట్టే పద్ధతుల నుంచి విద్యార్థులను దూరంచేసేలా కరిక్యులాన్ని తయారుచేయాలి.
• 6 నుంచి 8వ తరగతి వరకు సామాజిక శాస్ర్తాల బోధనకు థీమాటిక్‌ విధానం అవలంభించాలి. 9వ తరగతి తర్వాతే చరిత్ర, భూగోళం, ఆర్థికశాస్త్రం, రాజకీయశాస్త్రంగా విభజించాలి.
• పరీక్షలను సంస్కరించాలి. 10, 12 తరగతుల పరీక్షలను ఏడాదికి రెండుసార్లు నిర్వహించాలి.
• గణితం సమస్యా పరిష్కరణ దిశలో అమూర్త, తార్కిక ఆలోచన సామర్థ్యాలను పెంపొందించేలా ఉండాలి.
• పాఠ్యాంశాలుండాలి. సైన్స్‌, ప్రయోగ కృత్యాలు వాస్తవ ప్రపంచంలోకి ప్రవేశించేందుకు ఉపయోగపడాలి.
• భాషల బోధన పాఠ్యపుస్తక సరిహద్దులు దాటి ఉండాలి. విద్యార్థి మూడు భాషలను అధ్యయనం చేసే స్వేచ్ఛనివ్వాలి.