అర్ధాకలి తీర్చేలా అల్పాహార పథకం

రాష్ట్ర ప్రభుత్వం ప్రారంభించనున్న బ్రేక్‌ఫాస్ట్‌ స్కీమ్‌ విద్యార్థుల సగం కడుపే నింపనున్నది. అల్పాహార పథకంతో అర్ధాకలే మిగులనున్నది. ఈ పథకంలో భాగంగా విద్యార్థులకు రోజు రెండు ఇడ్లీలు.. రెండు బొండాలు.. రెండు పూరీలు మాత్రమే ఇవ్వనున్నారు. ఒక చపాతీ/ దోశ మాత్రమే అందించనున్నారు.

• పిల్లలకి ఇచ్చేది రెండు బొండాలు.. రెండు ఇడ్లీలే!
• ఇచ్చే రెండు ఏ మూలకు సరిపోతాయంటున్న టీచర్లు
• ఈ పథకంతో సగం కడుపే నిండుతుందన్న వాదనలు

హైదరాబాద్‌, మార్చి 29 (నమస్తే తెలంగాణ) : రాష్ట్ర ప్రభుత్వం ప్రారంభించనున్న బ్రేక్‌ఫాస్ట్‌ స్కీమ్‌ విద్యార్థుల సగం కడుపే నింపనున్నది. అల్పాహార పథకంతో అర్ధాకలే మిగులనున్నది. ఈ పథకంలో భాగంగా విద్యార్థులకు రోజు రెండు ఇడ్లీలు.. రెండు బొండాలు.. రెండు పూరీలు మాత్రమే ఇవ్వనున్నారు. ఒక చపాతీ/ దోశ మాత్రమే అందించనున్నారు. ఒక చపాతీ, రెండు ఇడ్లీలు, బొండాలతో సర్కార్‌ బడుల్లో చదువుకునే చిన్నారుల కడుపునిండుతుందా.. ఆకలి తీరుతుందా..? అన్న ప్రశ్నలు ఉత్పన్నమవుతున్నాయి. ముఖ్యంగా ప్రీ ప్రైమరీ నుంచి ఇంటర్‌ వరకు గల విద్యార్థులకు అల్పాహార పథకం అమలుచేయనున్నారు. ఈ రెండు ఇడ్లీలు, రెండు బొండాలు హైస్కూళ్లు, ఇంటర్‌ కాలేజీల్లోని విద్యార్థులకు ఏ మాత్రం సరిపోవని ఉపాధ్యాయ సంఘాల నేతలు, టీచర్లు అంటున్నారు.

పోషకాహారం అంటే ఇదేనా!

సహజంగా రెండు ఇడ్లీలు ఏడాది, రెండేండ్ల వయస్సు చిన్నారులకు సరిపోతాయి. ఇడ్లీలతో 89 క్యాలరీలు, బొండాలతో 340, పూరీల్లో 220 క్యాలరీల శక్తి మాత్రమే లభిస్తుంది. ఉదయం అల్పాహారంలో భాగంగా 3-5 ఏండ్ల మధ్య వయస్కులకు 300, 6-10 ఏండ్ల మధ్య వయస్కులకు 300 -400, 11 నుంచి 14 ఏండ్ల మధ్య వారికి 400- 500, 15-17 వయస్సు గల వారికి 500 -600 క్యాలరీల శక్తి గల ఆహారం తీసుకోవాలని నిపుణులు చెబుతున్నారు. ప్రభుత్వమేమో 2 ఇడ్లీలు, 2 పూరీలు మాత్రమే ఇస్తామంటున్నది. పోషకాహారం అంటే.. ఆకలి తీర్చడమంటే ఇదేనా.? అని టీచర్లు ప్రశ్నిస్తున్నారు. ఇదిలా ఉంటే.. బొండాలు ఆయిల్‌ ఫుడ్‌ అన్న వాదనలు వినిపిస్తున్నాయి.

మెనూ ఇదే..

బ్రేక్‌ఫాస్ట్‌ పథకం మెనూను ఇటీవలే ప్రభుత్వం ఖరారుచేసింది. తాజాగా ఈ పథకం మెనూను విడుదల చేసింది. సోమవారం దోశ/ చపాతీ, మంగళవారం రెండు మిల్లెట్‌ ఇడ్లీలు, బుధవారం రెండు పూరీలు, గురువారం రెండు మిల్లెట్‌ ఇడ్లీలు, శుక్రవారం మిల్లెట్‌ ఉప్మా/ పొంగల్‌, శనివారం రెండు బొండాలు ఇవ్వనున్నారు. ఇవేకాకుండా సోమ, బుధ, శుక్రవారాల్లో పాలు, మంగళ, గురు, శనివారాల్లో రాగిజావ అందిస్తారు.

పేరు గొప్ప.. ఊరు దిబ్బ..

పిల్లల ఆరోగ్యాన్ని మెరుగుపరచడం, ఆకలి నిర్మూలన.. పౌష్టికాహార లోప నివారణ పేరిట ప్రభుత్వం ఈ పథకాన్ని ప్రకటించింది. అల్పాహారం పథకం కోసం రాష్ట్ర బడ్జెట్‌లో రూ.540కోట్లు, పాల సరఫరా కోసం రూ. 180కోట్ల చొప్పున రూ. 720కోట్లు కేటాయించింది. రాష్ట్రంలోని 26,178పాఠశాలల్లోని, 18.79లక్షల విద్యార్థులు ఈ పథకంతో లబ్ధిపొందనున్నారు. అయితే సర్కార్‌ ఖరారు చేసిన మెనూతో ఈ పథకం పేరు గొప్ప.. ఊరు దిబ్బ అన్నట్టుగా తయారయ్యిందన్న వాదనలు వినిపిస్తున్నాయి. గతంలో సీఎం బ్రేక్‌ఫాస్ట్‌ పథకాన్ని కేసీఆర్‌ ప్రభుత్వం ప్రారంభించింది. విద్యార్థులకు తిన్నంత బ్రేక్‌ఫాస్ట్‌ను కేసీఆర్‌ ప్రభుత్వం అందించింది. అయితే ఈ పథకాన్ని బంద్‌పెట్టిన రేవంత్‌ సర్కార్‌.. ఇప్పుడు రెండు ఇడ్లీలు. రెండు పూరీల పథకాన్ని తీసుకొచ్చింది.