ఎస్టీ కోటాకు రోస్టర్‌

రాష్ట్రంలో గిరిజనులకు విద్య, ఉద్యోగావకాశాల్లో అమలవుతున్న రిజర్వేషన్లను 6 శాతం నుంచి 10 శాతానికి పెంచిన ప్రభుత్వం తాజాగా వాటి అమలుకు రోస్టర్‌ పాయింట్లు ఖరారు చేసింది. ఇందుకు సంబంధించి రాష్ట్ర ప్రభుత్వ ప్రధాన కార్యదర్శి సోమేశ్‌కుమార్‌ బుధవారం జీవో (నంబర్‌ 130) జారీ చేశారు.

• సుదీర్ఘ కసరత్తు తర్వాత జీవో .. గిరిజనులకు 10% కోటా.. నెరవేరిన సీఎం కేసీఆర్‌ హామీ

హైదరాబాద్‌, నవంబర్‌ 9 (నమస్తే తెలంగాణ): రాష్ట్రంలో గిరిజనులకు విద్య, ఉద్యోగావకాశాల్లో అమలవుతున్న రిజర్వేషన్లను 6 శాతం నుంచి 10 శాతానికి పెంచిన ప్రభుత్వం తాజాగా వాటి అమలుకు రోస్టర్‌ పాయింట్లు ఖరారు చేసింది. ఇందుకు సంబంధించి రాష్ట్ర ప్రభుత్వ ప్రధాన కార్యదర్శి సోమేశ్‌కుమార్‌ బుధవారం జీవో (నంబర్‌ 130) జారీ చేశారు. రిజర్వేషన్‌ పెంచేందుకు అవసరమైన సబార్డినేట్‌ సర్వీస్‌ రూల్స్‌ మార్చేందుకు ప్రభుత్వం సుదీర్ఘ కసరత్తు చేసి కీలకమైన రోస్టర్‌ పాయింట్లను నిర్ణయించింది. రాష్ట్రంలో ఎస్టీలకు 6 శాతం రిజర్వేషన్‌ ఉన్నప్పుడు రోస్టర్‌ పాయింట్లు 6. ఉదాహరణకు ఉద్యోగ నియామకాల్లో 100 పోస్టులు, విద్యాసంస్థల్లో 100 సీట్లు భర్తీ చేయాల్సి ఉంటే ఇప్పటిదాకా రోస్టర్‌ పాయింట్లు.. 8, 25, 33, 58, 75, 83 ఉండేవి.

10 శాతం రిజర్వేషన్‌తో…

• గిరిజన జనాభా దామాషాకు అనుగుణంగా రిజర్వేషన్‌ 10 శాతం అమలు కానున్నది. 10 ఉద్యోగాలు, 10 సీట్లు భర్తీ చేయాల్సి ఉంటే రోస్టర్‌ పాయింట్లు.. 8,15, 25, 33, 42, 58, 67, 75, 83, 92 కేటాయించారు. కాగా, పెంచిన 10 శాతం రిజర్వేషన్‌లో మహిళలకు 33.3 శాతం కేటాయించారు. అంటే ప్రతి 10 ఉద్యోగాలు లేదా 10 సీట్లలో.. 3 పోస్టులు లేదా 3 సీట్లు మహిళలకు దక్కుతాయి.
• గిరిజన రిజర్వేషన్ల పెంపుపై ప్రభుత్వ సుదీర్ఘ కసరత్తు
• ఎస్టీ రిజర్వేషన్ల పెంపుపై 2015 మార్చి 3న రిటైర్డ్‌ ఐఏఎస్‌ డాక్టర్‌ చెల్లప్ప నేతృత్వంలో కమిషన్‌ ఏర్పాటు.
• రిజర్వేషన్‌ 10 శాతం పెంచడానికి ప్రతిపాదిస్తూ 2016 డిసెంబర్‌ 8న ప్రభుత్వానికి కమిషన్‌ నివేదిక.
• కమిషన్‌ నివేదికను ఆమోదిస్తూ 2017 ఏప్రిల్‌ 15న రాష్ట్ర మంత్రివర్గం ఆమోదం.
• 2017 ఏప్రిల్‌ 16న ఎస్టీ రిజర్వేషన్‌ పెంపు బిల్లుపై అసెంబ్లీ తీర్మానం, ఆమోదం.
• 2017 మే 29న బిల్లును రాష్ట్రపతి ఆమోదానికి కేంద్ర హోంశాఖకు నివేదన.
• 2011 రాష్ట్ర జనాభాకు అనుగుణంగా తెలంగాణ గిరిజనుల రిజర్వేషన్లు 9.08 శాతానికి తగ్గకుండా ఉండాలంటూ కేంద్ర గిరిజన వ్యవహారాల శాఖ రాష్ట్రానికి (ఎఫ్‌ నం.42018/24/2017 ఎస్టాబ్లిష్డ్‌ డేట్‌ 8.12.2017 పేరుతో) అందిన లేఖ. ఇందుకు అనుగుణంగా విద్య, ఉద్యోగాల్లో రిజర్వేషన్‌ అమలుకు రాష్ట్రపతి అనుమతి కావాలని కోరుతూ సీఎం కేసీఆర్‌ స్వయంగా 2018 ఆగస్టు 4న కేంద్రానికి లేఖ. కేంద్రం నుంచి స్పందన రాకపోవడంతో 2019 అక్టోబర్‌ 4న ప్రధానికి మరో లేఖ.
• రాష్ట్ర ప్రభుత్వ తీర్మానం, సీఎం కేసీఆర్‌ రాసిన లేఖలకు అనుగుణంగా నిర్ణయం ప్రకటించాలంటూ 2021 ఫిబ్రవరి 5న రాష్ట్ర గిరిజన శాఖ కేంద్రానికి మరోలేఖ.
• తెలంగాణ అసెంబ్లీ ఆమోదించిన బిల్లును స్వీకరించినట్టు అంగీకరిస్తూ 2022 ఫిబ్రవరి 9న కేంద్ర గిరిజన వ్యవహారాల మంత్రిత్వశాఖ నుంచి రాష్ట్రానికి లేఖ. అలాగే కేంద్ర హోంశాఖ నుంచి ఫిబ్రవరి 11న రాష్ర్టానికి మరో లేఖ.
• సుప్రీంకోర్టులో ఏపీ ప్రభుత్వం వర్సెస్‌ ఎస్టీ మురళీధర్‌రావుకు మధ్య జరిగిన 2020 కేసును ఉటంకిస్తూ విద్య, ఉద్యోగాల్లో రిజర్వేషన్‌ అమలుపై 2022 మార్చి 7న కేంద్ర హోం సహాయ మంత్రిత్వ శాఖ నుంచి రాష్ట్ర గిరిజన సంక్షేమ శాఖకు లేఖ.
• సెప్టెంబర్‌ 17, 2022న హైదరాబాద్‌ బంజారాహిల్స్‌లో కుమ్రంభీం ఆదివాసీ భవన్‌, సంత్‌సేవాలాల్‌ బంజారా భవనాల ప్రారంభోత్సవం సందర్భంగా గిరిజన రిజర్వేషన్లను 6% నుంచి 10% పెంచుతున్నట్టు సీఎం కేసీఆర్‌ ప్రకటన.
• సెప్టెంబర్‌ 30, 2022న రిజర్వేషన్‌ పెంచుతూ జీవో (33) జారీ.
• నవంబర్‌ 9, 2022న రిజర్వేషన్ల పెంపునకు అనుగుణంగా రోస్టర్‌ పాయింట్లు ఖరారు చేస్తూ జీవో (130) జారీ.

గిరిజన సంఘాల హర్షం

రాష్ట్రంలో విద్య, ఉద్యోగ నియామకాల్లో గిరిజనులకు 6 నుంచి 10 శాతం రిజర్వేషన్‌ పెంచుతూ రోస్టర్‌ పాయింట్లు ఖరారు చేయడంపై గిరిజన సంఘాలు హర్షం వ్యక్తం చేశాయి. రిజర్వేషన్ల పెంపు విషయంలో మోదీ మోసం చేసినా కేసీఆర్‌ తమ జీవితాల్లో వెలుగులు నింపుతున్నారని పేర్కొన్నాయి. రిజర్వేషన్ల పెంపు సమయంలో తొండి మాటలు మాట్లాడిన కేంద్రమంత్రి కిషన్‌రెడ్డి, బండి సంజయ్‌ ఇప్పుడేం మాట్లాడుతారని ప్రశ్నించాయి.